ކަނޑާގުޅޭ މޫސުމީ ބަދަލުތަކުގެ ސަރަހައްދީ ބައްދަލުވުން ކާމިޔާބުކަމާއެކު ނިންމާލައިފި އެވެ.
”ރީޖަނަލް ޑައިލޮގް އޮން އޯޝަން-ބޭސްޑް ކްލައިމެޓް އެކްޝަން“ ގެ ނަމުގައި ބޭއްވި މި ބައްދަލުވުމަކީ ކަނޑާ ގުޅުންހުރި މޫސުމީ ބަދަލުތަކާ ގުޅޭގޮތުން މަޝްވަރާކޮށް، އެކަމާ ގުޅޭ ގޮތުން އަޅަންޖެހޭ ފިޔަވަޅުތަކާ ބެހޭގޮތުން ޚިޔާލު ބަދަލުކުރުމަށް ބޭއްވި މުހިންމު ބައްދަލުވުމެކެވެ.
ބޭންކޮކްގައި ހުންނަ އދ. ގެ ކޮންފަރެންސް ސެންޓަރުގައި އިއްޔެމި ބައްދަލުވުމުގައި ރާއްޖެ ތަމްސީލުކުރެއްވީ، އެންވަޔަރަންމަންޓް މިނިސްޓްރީގެ ޑެޕިއުޓީ މިނިސްޓަރ އަޙްމަދު މުޢާޛު އެވެ.
ޑެޕިއުޓީ މިނިސްޓަރ އަޙްމަދު މުޢާޛު ދެއްކެވި ވާހަކަފުޅުގައި، ކަނޑުގެ މާޙައުލަށް ކުރިމަތިވަމުންދާ ގޮންޖެހުންތަކާއި، އެކަމުގެ ސަބަބުން ކުދި ޖަޒީރާ ޤައުމުތަކަށް ކުރާ ނޭދެވޭ އަސަރުތަކުގެ މައްޗަށް އަލިއަޅުވާލެއްވި އެވެ. އަދި މި ކަންކަމާ ގުޅޭގޮތުން ސަރަޙައްދީ އަދި ބައިނަލްއަޤްވާމީ ފެންވަރުގައި އެއްބާރުލުން އިތުރުކުރުމުގެ މުހިންމުކަން ފާހަގަކުރެއްވި އެވެ.
މި ބައްދަލުވުމުގައި ސަރަޙައްދުގެ އެކި ޤައުމުތަކުގެ ތިމާވެށީގެ ދާއިރާގެ އިސް ބޭފުޅުން ބައިވެރިވެ ވަޑައިގެންނެވި އެވެ. މި ބައްދަލުވުން ކޯ-ހޯސްޓްކުރި ގައުމުތަކުގެތެރޭގައި ވެސް ރާއްޖެ ހިމެނެއެވެ.
މި ބައްދަލުވުމުގައި ރާއްޖެ ބައިވެރިވުމަކީ، ކަނޑުގެ މާޙައުލު ރައްކާތެރިކުރުމާއި މޫސުމީ ބަދަލުތަކާ ގުޅޭގޮތުން ރާއްޖެއިން ކުރަމުންދާ މަސައްކަތްތައް ބައިނަލްއަޤްވާމީ މުޖުތަމަޢުއަށް ހާމަކޮށްދިނުމުގެ މުހިންމު ފުރުޞަތެއް ކަމުގައި ބެލެވެއެވެ.