މޯލްޑިވްސް ޕޯޓްސް ލިމިޓެޑް(ޢެމްޕީއެލް) އިން އިހަވަންދިއްޕޮޅުގައި މެރިޓައިމްގެ ޚިދުމަތް ދިނުމަށް ގާއިމުކޮށްފައިވާ، އުތުރު މެރިޓައިމް ސަރވިސް (ޔޫއެމްއެސް) އިން ވޯޓަރ ބަންކަރިންގެ ޚިދުމަތް ދިނުމަށް ތައްޔާރުވެއްޖެ އެވެ.
އެގޮތުން މިއަދު އެމްޕީއެލްއިން ވަނީ، ވޯޓަރ ބަންކަރިންގއަށް ބޭނުންވާ ފެން ބާޖް ތިލަދުންމަތި އުތުރުބުރީ ތުރާކުނުގައި ބޭއްވުމަށް ތުރާކުނު ކައުންސިލްއާ ދެމެދު ފަހުމުނަމާއެއްގައި ސޮއިކޮށްފަ އެވެ.
ތުރާކުނު ކައުންސިލްގެ އިދާރާގައި މިއަދު މެންދުރު ބޭއްވި ރަސްމިއްޔާތެއްގައި އެމްޕީއެލްގެ ފަރާތުން ފަހުމުނާމާގައި ސޮއިކުރެއްވީ ސީއީއޯ މުޙައްމަދު ވަޖީހް އިބްރާހީމެވެ. ތުރާކުނު ކައުންސިލްގެ ފަރާތުން ސޮއިކުރެއްވީ ތުރާކުނު ކައުންސިލްގެ ރައީސް ޢަލީ އަބްދުއްލަތީފެވެ.
މި ފަހުމުނާމާގެ ދަށުން، އުތުރުގައި ވޯޓަރ ބަންކަރިންގ ޚިދުމަތް ދިނުމަށް އެމްޕީއެލް އިން ބޭނުންކުރާ ފެން ބާޖް ބާއްވާނީ ތުރާކުނުގައެވެ. އެމްޕީއެލްގެ ސީއީއޯ ވަޖީހް ވިދާޅުވީ ފެން ބާޖް ތުރާކުނުގައި ބާއްވައި، އެ ބާޖް ރީފިލް ކުރުމުގެ މަސައްކަތްވެސް ކުރާނީ ތުރާކުނުގައި ކަމަށެވެ. އަދި ވޯޓަރ ބަންކަރިންގ އަކީ ޔޫއެމްއެސްގެ ތެރެއިން ހުޅުވޭނެ އިތުރު މާކެޓެއް ކަމަށް ޤަބޫލްފުޅުކުރައްވާ ކަމަށް ވިދާޅުވި އެވެ.
”މިހާރުވެސް ގްރީކްގެ 14 ބޯޓު އޮޕަރޭޓްކުރާ ފަރާތަކުން އެބައޮތް ފެން ހޯދަން އެދިފައި. ލަސްތަކެއްނުވެ އެގޮތަށް އެ މަސައްކަތް ފަށާނެ. މި ދާއިރާގެ ތަޖުރިބާކާރުންވެސް ވިދާޅުވަނީ މިއީ ވަރަށް ބޮޑު މާކެޓެއް ހުޅުވިގެންދާނެ ކަމެއް ކަމަށް. އެގޮތަށް ލަފާކުރެވެނީވެސް،“ ސީއީއޯ ވަޖީހް ވިދާޅުވިއެވެ.
ތުރާކުނު ކައުންސިލްގެ ރައީސް އަލީ ވިދާޅުވީ ފެނުގެ ބަންކަރިންގ އަކީ އުތުރުގައި ފޯރުކޮށްދޭ މެރިޓައިމްގެ ޚިދުމަތުގެ މުހިންމު ބައެއް ކަމަށެވެ. އަދި އުތުރުގައި މެރިޓައިމްގެ ޚިދުމަތް ދިނުމަށް އަދުގެ ސަރުކާރުން ކުރަމުންދާ މަސައްކަތަށް ތައުރީފްކުރެއްވި އެވެ.
”މިއީ އުތުރުގައި ފޯރުކޮށްދޭ (މެރިޓައިމް) ޚިދުމަތްތަކުގެ ތެރެއިން ކުޑަ ކޮމްޕޯނަންޓަކަށްވިޔަސް، މުހިންމު ބައެއް. އުތުރުގައި މި (މެރިޓައިމްގެ) ޚިދުމަތްތައް ދިނުމަށް ސަރުކާރުންއަދި އެމްޕީއެލް އިން ކުރަމުންދާ މަސައްކަތްތަކަށް ފުރިހަމަ އެއްބާރުލުން ދޭނަން،“ އަލީ ވިދާޅުވިއެވެ.
އެމްޕީއެލްގެ ސީއީއޯ ވަޖީހް އަދި މެނޭޖްމަންޓްގެ ޓީމުން މިއަދު ވަނީ ތިލަދުންމަތި އުތުރުބުރީ މޮޅަދޫ ކައުންސިލްއާ ބައްދަލުކުރައްވާފަ އެވެ. މި ބައްދަލުވުމުގައި އުތުރުގައި ފޯރުކޮށްދޭ މެރިޓައިމްގެ ޚިދުމަތްތަކުގެ ތެރެއިން މޮޅަދޫގައި ކުރިއަށް ގެންދެވިދާނެ ޚިދުމަތަކާ ގުޅޭގޮތުން މަޝްވަރާކޮށްފަ އެވެ.