ބ. އަތޮޅު ދޮންފަނުގައި މިއަހަރުގެ ’ވޯލްޑް މަންޓާ ޑޭ‘ ފާހަގަކުރުމަށް ތައްޔާރުވެއްޖެއެވެ.
ބ. އަތޮޅު ކައުންސިލާއި ދޮންފަނު ކައުންސިލް ގުޅިގެން،މި ދުވަސް ފާހަގަކުރުމުގެ ގޮތުން ކުޅިވަރާއި މުނިފޫހިފިލުވުމުގެ ޙަރަކާތްތަކެއް ކުރިއަށް ގެންދިއުމަށް ވަނީ އިންތިޒާމުކޮށްފަ އެވެ.
ދޮންފަނުގެ ގިނަ އަދަދެއްގެ ރައްޔިތުންނާއި ސްކޫލް ކުދިން ބައިވެރިވާ މި ހަރަކާތް ބާއްވަނީ މިއަދު ހަވީރު އެރަށުގެ 3 ރުއްޕާކުގައެވެ.
ބ. އަތޮޅު ކައުންސިލުން ބުނީ، މި ހަރަކާތުގައި މަންޓާ ރޭގެ މުހިންމުކަމާ ބެހޭގޮތުން މަޢުލޫމާތު ދިނުމުގެ އިތުރުން، ކުޑަކުދިންނަށް އަމާޒުކޮށްގެން ކުރެހުމުގެ މުބާރާތެއްވެސް ބޭއްވުމަށް ހަމަޖެހިފައިވާކަމަށެވެ. މީގެ އިތުރުން ޕާކުގައި އާއިލާތަކަށް އަމާޒުކޮށްގެން ކުޅިވަރު ޙަރަކާތްތަކެއްވެސް ހިންގުމަށް ރާވާފައިވާކަމަށެވެ.
ވޯލްޑް މަންޓާ ޑޭއަކީ ކޮންމެ އަހަރެއްގެ ސެޕްޓެމްބަރު 17 ވަނަ ދުވަހު ދުނިޔޭގެ އެކި ކަންކޮޅުތަކުގައި ފާހަގަކުރާ ދުވަހެކެވެ. މި ދުވަހުގެ މަޤްޞަދަކީ މަންޓާ ރޭގެ މުހިންމުކަމާއި އެ ދިރޭތަކެތި ރައްކާތެރިކުރުމުގެ މުހިންމުކަން ހާމަކޮށްދިނުމެވެ.