ރާއްޖޭގެ 11 ރަށެއްގައި އައިސް ޕްލާންޓް ގާއިމުކުރުމަށް ކުރަމުންދާ މަސައްކަތުގެ ދަށުން، 3 ރަށެއްގައި އައިސް ޕްލާންޓު ތަރައްގީކުރުމަށް އަންނަ ހަފުތާ ތެރޭގައި ކޮންޓްރެކްޓަރަކާ ހަވާލުކުރެވޭނެކަމަށް ފިޝަރީޒް މިނިސްޓްރީން ބުނެފި އެވެ.
އެ، މިނިސްޓްރީން މިހެން ބުނެފައިވަނީ، މަސްވެރިކަމާ ގުޅޭ މަޝްރޫއުތައް އަވަސްކުރުމަށް އިފްރަރ ސްޓްރަކްޗަރ މިނިސްޓްރީގެ އިސްވެރިންނާއެކު، އެ މިނިސްޓްރީން ބޭއްވެވި ބައްދަލުވުމެއްގަ އެވެ.
މަސްވެރިންނަށް އައިސް ލިބުމުގައި ދިމާވަމުން އަންނަ ދަތިތައް ހައްލުކޮށް، ރާއްޖޭގެ ހުރިހައި ސަރަހައްދަކުން މަސްވެރިންނަށް އެއްވެސް ތަކުލީފަކާ ނުލައި އައިސް ލިބޭނެ އިންތިޒާމު ހަމަޖައްސައިދިނުމަށްޓަކައި، 11 ރަށެއްގައި އައިސް ޕްލާންޓް ގާއިމުކުރުމަށް ސަރުކާރުން ދަނީ ތައްޔާރުވަމުންނެވެ. އެގޮތުން، ސަރުކާރުގެ ޚަރަދުގައި ކުޅުދުއްފުށި ސިޓީ، ށ. ފުނަދޫ، ޅ. ނައިފަރު، މ. ވޭވަށް، ދ. ބަނޑިދޫ އަދި ދ. މީދޫގައި އައިސް ޕްލާންޓު ގާއިމުކުރުމަށް ސަރުކާރުން ވަނީ ނިންމާފަ އެވެ. މީގެ ތެރެއިން، ށ. ފުނަދޫ، ދ. މީދޫ އަދި ދ. ބަނޑިދޫގައި އައިސް ޕްލާންޓް ގާއިމުކުރުމަށް އަންނަ ހަފުތާ ތެރޭގައި ކޮންޓްރެކްޓަރަކާ ހަވާލުކުރެވޭނެކަމަށް ފިޝަރީޒް މިނިސްޓްރީން ބުނެއެވެ.
އަނެއް 5 އައިސް ޕްލާންޓް ގާއިމުކުރަނީ ސައުދީ އަރަބިއްޔާގެ، ސައުދީ ފަންޑް ފޮރ ޑެވެލޮޕްމެންޓް(އެސްޑީއެފް) ގެ އެހީގަ އެވެ. އެއީ، ހއ. އިހަވަންދޫ، ހއ. ދިއްދޫ، ށ. ކޮމަންޑޫ، އއ. ރަސްދޫ އަދި ގދ. ރަތަފަންދޫގައި ތަރައްގީ ކުރާ އައިސް ޕްލާންޓްތަކެވެ.
ފިނޭންްސް މިނިސްޓްރީން ވަނީ، މިދިޔަ އޯގަސްޓް މަހުގެ 22 ވަނަ ދުވަހު، މި އައިސް ޕްލާންޓްތައް ތަރައްގީކޮށްދޭނެ ބަޔަކު ހޯދުމަށް އިންޓަނޭޝަނަލް ބިޑަށް ހުޅުވާލާފައެވެ. އޮކްޓޯބަރު 15 އާ ހަމައަށް ބީލަމުގައި ބައިވެރިވުމަށް ރަޖިސްޓްރީ ކުރެވޭއިރު،މި މަޝްރޫއުތައް ކުރިޔަށްގެންދަން ޝައުގުވެރިވާ ފަރާތްތަކަށް އޮކްޓޯބަރު 20 އާ ހަމައަށް ބީލަން ހުށަހެޅުމުގެ ފުރުސަތު ލިބެއެވެ.
މަސްވެރިންނަށް ބޭނުންވާ ވަރަށް އައިސް ނުލިބުމާއި، މިހާރު ހުރި ބައެއް އައިސް ޕްލާންޓްތަކުން އައިސް ލިބެންނެތުމާއި، އައިސް ހޯދަން ދުރު ރަށްރަށަށް ތެޔޮ އަންދާފައި ދަތުރުކުރުމަކީ މަސްވެރިންނަށް މިހާރު ކުރިމަތިވެފައިވާ ވަރަށް ބޮޑު ގޮންޖެހުމުކެވެ. އާ އައިސްޕްލާންތްތަކާއެކު މަސްވެރިން އައިސް ހޯދުމުގައި މިހާރު އުފުލަމުންދާ ތަކުލީފަށް ބޮޑު ލުޔެއް އަންނާނެކަމަށް ބެލެވެއެވެ.