ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސްވެރިންގެ ބޮޑު އާބާދީއެއް އޮންނަ ދެކުނުގެ ހަތަރު އަތޮޅަކަށް ކުރެއްވި 5 ދުވަހުގެ ދަތުރުފުޅުގައި މަސްވެރިންނާއި ބައްދަލު ނުކުރައްވައި އެނބުރި މާލެ ވަޑައިގެންފި އެވެ.
މިދަތުރުގައި ރާއްޖޭގެ އެންމެ ދެކުނު ހަތަރު އަތޮޅުގެ ސާދަ ރަށަކަށް ވަޑައިގެންނެވި އެވެ. މިހަތަރު އަތޮޅަކީވެސް ނިސްބަތުން މަސްއޮޑިތަކާއި، ކެޔޮޅުންނާއި، މަސްވެރިންނާއި، ގިނަ އަތޮޅުތަކެކެވެ. ޚާއްސަކޮށް މަސްވެރިން ބާނާ މަސް ކިރާ ދެ ފެކްޓަރީއެއް އައްޑޫ ސިޓީއާއި ގއ ކޫއްޑޫގައި އެބަހުއްޓެވެ.
ކަންދިމާކުރިގޮތުން ރައީސްގެ މި ދަތުރު ދިމާވީ މަސްވެރިން ސަރުކާރަށް ވިއްކި މަހަށް ފައިސާ ނުދީގެން މަސްވެރިން އިހުތިޖާޖު ކުރި ދުވަސްތަކާއެވެ. އެހެންކަމުން މަސްވެރިން އުންމީދު ކުރީ ރައީސް ކޮންމެވެސް އެއް އަތޮޅަކުން މަސްވެރިންނާއި ބައްދަލު ކުރައްވާނެކަމަށެވެ. އެހެންނަމަވެސް ދަތުރު ނިންމަވާ ލެއްވީ ބައްދަލު ނުކުރައްވައެވެ. އަތޮޅު ކައުންސިލްތަކާއި، ރަށު ކައުންސިލްތަކާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއެކު ބޭއްވި މަޝްވަރާ ބައްދަލުވުންތަކުގައިވެސް މަސްވެރިންގެ ވާހަކައެއް ނުދައްކަވަ އެވެ. މަސްވެރިންގެ ވާހަކަދެއްކެވީ ހަމަ އެކަނި ތިނަދޫ ރައްޔިތުންނާއެކު ބޭއްވެވި ބައްދަލުވުމުގަ އެވެ. އެއީ ވެސް އަމިއްލަފުޅު އެޖެންޑާއެއް އޮވެގެންނެވެ. އެއީ، ގއ ކޫއްޑޫގައި މަސްވެރިން އިހުތިޖާޖުކޮށް ކޫއްޑޫގެ އޮޕަރޭޝަން ހުއްޓުވާފައިވާތީ ގއ އަށް ވަޑައިގަންނަވަން ދަތިވެގެންނެވެ. ވިދާޅުވީ މަސްވެރިންނާއެކު މަޝްވަރާއަށް ދާން ތައްޔާރަށް ހުންނެވި ކަމަށެވެ. އެހެން ނަަމަވެސް މަސްވެރިން ގާތަށް ވަޑައިގަންނަވަން ކެރި ވަޑައިނުގެންނެވި އެވެ.
އިހުތިޖާޖު ހުއްޓާލައި މަސްވެރިން މަޝްވަރާ އަށް އައުމަށް ރައީސް ގޮވާލައްވައިފި
ކޫއްޑޫގައި ތިބި މަސްވެރިންނާއި ބައްދަލުކުރަން ބޭނުން ނުވާތީ ގއ އަތޮޅުގެ ދަތުރަށް މަގުކޮށަން ފިޝަރީޒް މިނިސްޓަރ އަހްމަދު ޝިޔާމާއި، މިފްކޯގެ ސީއީއޯ އަހްމަދު ޝަމާހް ރަޝީދު ކޫއްޑޫއަށް ފޮނުއްވައި މަސްވެރިން ރުއްސަން މަސައްކަތް ކުރި އެވެ. މަސްވެރިންނާއެކު ވާކަމަށް ވިދާޅުވެ މިނިސްޓަރާއީ ސީއީއޯ ކޫއްޑޫއަށް ވަޑައިގެންނެވި ނަމަވެސް މަސްވެރިންގެ ޑިމާންޑެއް ފުއްދައެއް ނުދެއްވި އެވެ. މިނިސްޓަރ އަނބުރާ މާލެ ވަޑައިގެންނެވީ ބައިބަޔަށް ބަހައިގެން ފައިސާ ދެއްވާނެކަމަށް ވައުދުވެވަޑައިގެންފަ އެވެ. ސީއީއޯ މާލެ ވަޑައިގަތީ މަސްވެރިންނަށް ފިއްލަވައިގެންނެވެ. މިއީ ހައްތާވެސް މަސްވެރިންނަށް އޮޅުވާލަން ކުރި މަސައްކަތް ކަމަށް މަސްވެރިން ބުނެއެވެ. މަސްވެރިން ގިނަ ވިލިގިއްޔަށް ވަޑައިގެންނެވުމުގެ ކުރިން މަސްވެރިންނަށް ދޭން ހުރި ފައިސާގެ ތެރެއިން ހަތްދިހަ މިލިއަން ރުފިޔާ ޕްރޮސެސް ކުރަން ފެށިއެވެ. މިއީ ހައްތާވެސް މަސްވެރިންނާ ރައީސް ބައްދަލުކުރައްވަން ބޭނުންފުޅުވެ ވަޑައިނުގަންނަވާތީ މަސްވެރިންގެ ލޮލުގައި އެޅުވި އަނދުނެއް ކަމަށް މަސްވެރިން ސިފަ ކުރެއެވެ.
މަސްވެރިންނާ ކޫއްޑޫއަށް ބައްދަލުކުރަން ދާންނުކެރުނީ ކީއްވެބާ @MMuizzu ؟
ގައިމު ގަޓް ރައީސްއެކޭ ނެތް ޔަގީނުންވެސް ބުނެވޭކަށް!@HKurusee @dhonamaa_com https://t.co/CxWEHpSFWy
— 𝑨𝒍𝒊 𝑺𝒂𝒋𝒊𝒅 (@AliSajidMV) February 22, 2024
ރައީސްގެ ދަތުރާއި މެދު މަސްވެރިން އެއްވެސް ވަރަކަށް އުފަލެއް ނުވެއެވެ. މަސްވެރިންނަށް ލިބުނީ އިތުރު މާޔޫސްކަމެއް ކަމަށް މަސްވެރިން ބުންޏެވެ.
”ކޮންމެ ވެރިއަކު ބުނާނެ މަސްވެރިކަމަކީ ގައުމުގެ ލޭނާރޭ. ގައުމަށް ޑޮލަރު ވައްދަނީ މަސްވެރިންނޭ. އެކަމަކު މަސްވެރިންނަށް އިހުތިރާމުކުރާ ތަނެއް ނުފެނޭ. އެންމެކުޑަ މިނުން ސާދަ ރަށަށް ދަތުރުކުރެއްވި އިރު އަހަރުމެންނާ ބައްދަލުކުރަން ނުކެރުނު. ކެރިގެން ބުނާނަން. ހަމަ ގަޓެއް ނެތީމައި ބައްދަލު ނުކުރެއްވީ.“ މަސްވެރިއަކު ބުންޏެވެ.
ބައެއް މަސްވެރިން ބުނީ ރައީސް ކުރެއްވީ ކެމްޕޭނު ދަތުރެއް ކަމަށެވެ. މަޖިލިސް އިންތިޚާބުގެ ކުރިން ރަށްރަށަށް ދަތުރުކުރައްވާނެކަމަށް ވައުދުވެވަޑައިގެންނެވީ ސީދާ ރާވައިގެން ރައްޔިތުންގެ ޓެކްސް ފައިސާއިން ކެމްޕޭނަށް ދަތުރުކުރައްވަން ވެގެން ކަމަށެވެ. މަސްވެރިންނަށް ފައިސާ ނުދެއްވައި ދައުލަތުގެ މާލިއްޔާއިން ބޮޑު ޚަރަދެއްކޮށްގެން މިދަނޑިވަޅުގައި ދަތުރު ކުރަންވީ އެއްވެސް ސަބަބެއް ނުވިސްނޭކަމަށް މަސްވެރިން ބުންޏެވެ.
”ދަތުރަކީ އަހަރުމެންނަށް ކުރި ޖެއްސުމެއް. އަހަރުމެންނަކީވެސް އަހަރުމެންގެ އަނބިންނާއި ދަރިންނަކީވެސް ދިވެހި ރައްޔިތުން. އަަހަރުމެން ބަނޑަށް ޖެހިފަ ތިއްބާ ދައުލަތުގެ މާލިއްޔާއިން ލާރި ނަގައިގެން ބޮޑު ފައުޖެއް ގޮވައިގެން ދަތުރު ކުރެއްވީ. ކިހާ ޚަރަދެއް އެކަމަށްވެސް ދާނެ. މާޗު ފަހެއް އަންނަން ދެން އެބައި މީހުންވެސް މަޑު ކުރަންވީނުން ނުކައި ނުބޮވެ މުސާރަ ނުނަގާ. އޭރަށް އިހުސާސް ވާނެ އަހަރުމެން އުޅޭ ހާލު. އެއްފަހަރު އެމީޙުންގެ ކަރަންޓް ކަނޑާލަބަލަ، ފެން ކަނޑާލަ ބަލަ، ނެޓް ކަނޑާލަބަލަ ވާގޮތް ބަަލަން.“ މަސްވެރިއަކު ބުންޏެވެ.
ގިނަ މަސްވެރިންގެ ޝުއޫރުތައް ހުރީ މިހެންނެވެ. ރައީސް ދަތުރު ނިންމަވާލެއްވިއިރު މަސްވެރިންނާ ބައްދަލުނުކުރައްވާ އެނބުރި މާލެ ވަޑައިގެންނެވީ ގަންނާ ކުރެއްވި ބިރުންކަމަށް މަސްވެރިން ބުންޏެވެ. އަދި މަސްވެރިންނަށް ކެމްޕޭނުގައި ވެވަޑައިގެންފައިވާ ވައުދުތައް ފުއްދިފައި ނުވާތީ ދެން އަލުން ދައްކަވާނެ ވާހަކައެއް ނެތީމާ ކަމަށް މަސްވެރިން ބުންޏެވެ.
”ވިދާޅުވި ކެމްޕޭންތެރޭގައި އަހަރުމެން ކިރާ މަހަށް 48 ގަޑީއިރުތެރޭ ފައިސާ ދޭނަމޭ. އަހަރުމެން ތިބީ ލައްކަ އުފަލުން. އެކަމު މިހާރު މިބުނަނީ ފައިސާއެއް ސަރުކާރަކު ނެތޭ. ގޮތް ހޯދައިގެން ދައުރުގެ ކުރީކޮޅު މި ވައުދު ފުއްދާނަމޭ. ދައްކާ ވާހަކަ ތާކުން ތާކު ނުޖެހެއެއްނު؟ ވޯޓު ހޯދަން ކޮންމެ ވާހަކައެއްވެސް ދައްކަންވީ. އެވީ ވައުދުތައް ނުފުއްދުނީމާ އަހަރުމެންނާ ބައްދަލުކުރަން ހަމަ ނުކެރުނީ. ހަމަ ގަޓު ނެތީ.“ މަސްވެރިއަކު ބުންޏެވެ.
ދަތުރުފުޅު ނިންމަވާލެއްވުމަށް ފަހު ރައީސް މާލެ ވަޑައިގެންނެވީ ރޭގެ ވަގުތެއްގަ އެވެ.