ލ. މާމެންދޫ އައިސް ޕްލާންޓްގެ ޖެންސެޓުގެ މައްސަލަ ހައްލުކޮށް، ދެތިން ދުވަސްތެރޭގައި ޚިދުމަތް ދޭން ފަށާނެކަމަށް ފެނަކަ ކޯޕަރޭޝަނުން ބުނެފި އެވެ.
ލ. މާމެންދޫ ފެނަކަ އިންޖީނުގެ ކުރިމަތީގައި، ބަނދަރު މައްޗަށް ވާގޮތަށް ހުންނަ މި އައިސްޕްލާންޓަކީ އަމިއްލަ ފަރާތަކުން ގާއިމުކޮށް ހިންގަމުން އައުމަށް ފަހު އެތަން ސަރުކާރުން ގަނެ، ފެނަކައާއި ހިންގަން ހަވާލުކޮށްފައިވާ އައިސް ޕްލާންޓެކެވެ. ނަމަވެސް ފެނަކައިން އައިސްޕްލާންޓް ތަރައްގީކުރުމާއި ހިންގުން ހުއްޓާލަން ނިންމުމާއި ގުޅިގެން، މިހާރު މި އައިސް ޕްލާންޓް މިފްކޯގެ ދަށަށް ގެންދިއުމުގެ މަސައްކަތް ދަނީ ކުރަމުންނެވެ. މިފްކޯއާއި އައިސްޕްލާންޓް ހަވާލުކުރުމުގެ މަރުހަލާ މިހާރު ކުރިޔަށްދާއިރު، އެ އިޖުރާއަތުތައް ފުރިހަމަ ކުރެވެންދެން ފެނަކައިން އައިސްޕްލާންޓް ހިންގައި މަސްވެރިންނަށް އައިސް ދޫކުރާނެކަމަށް ފެނަކައިން މީގެކުރިން ވަނީ ބުނެފަ އެވެ.
އެހެންނަމަވެސް މިހާރު ލ. މާމެންދޫ އައިސްޕްލާންޓުން މަސްއޮޑިފަހަރަށް އައިސްދޫނުކުރާތާ ގިނަ ދުވަސްތަކެއް ވެއްޖެއެވެ. މިހެން މިކަން ދިމާވަނީ އެޕްލާންޓްގައި ހުރި ދެ އިންޖީނުވެސް ހަލާކުވެފައި ހުރުމާއި ގުޅިގެންނެވެ. އަދި، މިވަގުތު އައިސްޕްލާންޓް އޮޕަރޭޓްކުރާނަމަ، އެތަނަށް ކަރަންޓް ދޫކުރަން ޖެހޭނީ ފެނަކައިގެ އިންޖީނު ގެއިންނެވެ. ކަންދިމާކުރި ގޮތުން މި ދަުވަސްވަރު ފެނަކައިގެ އިންޖީނު ގޭގައި ހުރި ތިން އިންޖީނުގެ ތެރެއިން އެއް އިންޖީނު ހުރީ މައްސަލަ ޖެހިފަ އެވެ. އެހެންކަމުން ގޭ ބިސީތަކަށް ކަރަންޓް ދޫކުރުމަށްފަހު، އައިސްޕްލާންޓް ހިންގަން ކަރަންޓް ލޯޑް ނުހިފެހެއްޓޭތީ އައިސްޕްލާންޓް އޮޕަރޭޓްކުރަން ކަރަންޓް ދޫކުރެވޭކަށް ނެތެވެ.
މި މައްސަލައިގައި އެއަތޮޅު، ވަކިން ޚާއްސަކޮށް މާމެންދޫ ކެޔޮޅުން ތިބީ ވަރަށް ހިތްހަމަ ނުޖެހިފަ އެވެ. ކެޔޮޅުން ބުނީ، މާމެންދޫ އައިސްޕްލާންޓުން އައިސް ނުވިއްކާތާ ފަސް މަހަށްވުރެ ގިނަ ދުވަސްވެފައިވާތީ މިހާރު އެމީހުންނަށް ބޮޑު ތަކުލީފަކަށްވެފައިވާކަމަށެވެ. އެންމެ ބޮޑު ކަމަކީ ތެޔޮ ޚަރަދުކޮށްފައިވާ ހޮރައިޒަންއަށް އައިސް ގަންނަން ދަތުރުކުރަންޖެހޭ ކުރުން ކަމަށް ކެޔޮޅުން ފާހަގަކުރެއެވެ.
”މިހާރު މިޖެހެނީ ދުއްވާފަ ހޮރައިޒަންއަށް ދާން. އެތަނުން ކްރެޑިޓަކަށްވެސް މިހާރު އައިސް ދޫނުކުރޭ. ދޯންޏަކަށް މި ދެނީވެސް ދެޓަނު އައިސް. ވަރަށް ދަތި އަސްލުގަ.“ ކެޔޮޅަކު ބުންޏެވެ.
ކެޔޮޅުންގެ މި ކަންބޮޑުވުންތައް ހުރުމާއެކު، މި މައްސަލައިގަ ފެނަކައިގެ ބަހެއް ހޯދާލުމަށް މިދިޔަ އާދީއްތަ ދުވަހުން ފެށިގެން މި ނޫހުން ދިޔައީ މަސައްކަތްކުރަމުންނެވެ. އެކި ދުވަސްމަތިން އެކުންފުނީގެ ޓޮޕް މެނޭޖްމެންޓްގެ އެކި ބޭފުޅުންނަށް ގުޅުނެވެ. ޖަވާބެއް ލިބޭވަރު ވީ މިއަދުއެވެ.
މި ނޫހުން މިކަމާއި ގުޅިގެން ފޮނުވި ސުވާލުތަކަށް، ފެނަކައިން ދިން ޖަވާބުގައި ބުނެފައިވަނީ، އެކުންފުނީގެ މެނޭޖިންގ ޑިރެކްޓަރު މުއާޒް މުހައްމަދު ރަޝީދް މީގެކުރިން ވިދާޅުވެފައި އޮތްގޮތަށް މިފްކޯއަށް އައިސްޕްލާންޓްތައް ބަދަލު ކުރުމުގެ މަސައްކަތް ނިމެންދެން އައިސް ޕްލާންޓްތަކުގެ ޙިދުމަތް ދިނުމަށް ހަމަޖެހިފައިވާކަމަށެވެ.
”ފެނަކައިން އައިސްޕްލާންޓްތަކުގެ ޚިދުމަތް ހުއްޓާލާފައި ނުވާކަން ފާހަގަކުރަން. ނަމަވެސް، ލ. މާމެންދޫ އައިސް ޕްލާންޓުގައި ބެހެއްޓިފައި ހުރި ޖެންސެޓަކަށް ދިމާވި މައްސަލައަކާއި ގުޅިގެން މިވަގުތު އެ އައިސް ޕްލާންޓުގެ ޙިދުމަތް ވަނީ މެދު ކަނޑާލާފައި.“ ފެނަކައިގެ ޖަވާބުގައި ވެއެވެ.
ފެނަކައިން ބުނީ، ކުރިއަށް އޮތް ދެތިން ދުވަސް ތެރޭގައި ޖެންސެޓުގެ މައްސަލަ ހައްލުކޮށް، އައިސް ޕްލާންޓަށް ކަރަންޓުދީ، އައިސް ޕްލާންޓުން ޙިދުމަތް ދޭން ފަށާނެކަމަށެވެ.
ލ. މާމެންދޫ އައިސްޕްލާންޓަކީ 50 ޓަނުގެ ކެޕޭސިޓީގެ އައިސް ޕްލާންޓެކެވެ. ދެ ކޮމްޕްރެސަރު އެއް ފަހަރާ ޖައްސައިގެން އައިސް އުފައްދާނަމަ ގަޑިއެއްގެ ތެރޭގައި ދޮޅުޓަނުގެ އައިސް އުފެއްދޭނެއެވެ.