މަސްވެރިންގެ ގައުމީ ދަފްތަރުގައި 500އަށްވުރެ ގިނަ މަސްވެރިން ދަފްތަރުކޮށްފި އެވެ.
ފިޝަރީޒް މިނިސްޓްރީން ބުނީ، މަސްވެރިން ދަފްތަރުކުރުމަށް ކުރެވޭ މަސައްކަތުގެ ދަށުން ރާއްޖޭގެ އެކި ސަރަހައްދުތަކުން މިހާތަނަށް، 542 މަސްވެރިން ރަޖިސްޓްރީކޮށްފައިވާކަމަށެވެ. އަދި، 172 އޮޑިވެރިންވެސް މިހާތަނަށް ދަފްތަރު ކުރެވިފައިވާކަމަށް މިނިސްޓްރީން ބުންޏެވެ.
މިނިސްޓްރީން ބުނީ، މިހާރު ދަފްތަރުގައި ރަޖިސްޓްރީ ކުރަމުންދަނީ ކަނޑު މަސްވެރިންނާއި އޮޑިފަހަރުތައް ކަމަށެވެ. އަދި، ފަރުމަސްވެރިންވެސް މިވަގުތު ރަޖިސްޓްރީކުރަން ބޭނުންވާނަމަ އެކަމުގެ އިންތިޒާމުވެސް ހަމަޖެހިފައިވާކަމަށެވެ.
މަސްވެރިންގެ ދަފްތަރުގައި މިނިސްޓްރީގެ ކެޔޮޅު އެޕް ބޭނުންކޮށްގެން މަސްވެރިން އަމިއްލައަށްވެސް ރަޖިސްޓްރީ ކުރެވެއެވެ. އެހެންނަމަވެސް، މިކަން އިތުރަށް ހަރުދަނާކޮށް، މަސައްކަތް ހަލުވި ކުރުމުގެ ގޮތުން ރާއްޖެ ޒޯނުތަކަކަށް ބަހާލައިގެން، ވުޒާރާގެ ޓީމުތަކާއި ކައުންސިލްތަކުގެ ފޯކަލް ޕޮއިންޓުތަކާ ގުޅިގެން ދަނީ މަސްވެރިންގެ ދަފްތަރު ކުރުމުގެ މަސައްކަތްކުރަމުންނެވެ.
މިނިސްޓްރީން މިއަދު ބުނީ، މަސްވެރިން ދަފްތަރުކުރުމުގެ މަސައްކަތްތައް މިހާރު އިތުރަށް ފުޅާކޮށްފައިވާކަމަށާއި، އެގޮތުގެ މަތިން މިނިސްޓްރީގެ ޓީމްތައް މާދަމާ 10 ސަރަަހައްދަކަށް ފުރާނެކަމަށެވެ. މަސްވެރިން ދަފްތަރުކުރުމުގެ މަސައްކަތް މިހާރު ކުރިޔަށް ގެންދަނީ ސިޓީސް މިނިސްޓްރީގެވެސް އެއްބާރުލުމާއެކުގައެވެ. މިކަމުގައި ކައުންސިލްތަކާއި މަސްވެރިންނާއި، އޮޑިވެރިންވެސް ދަނީ އެއްބާރުލުން ދެމުންނެވެ.
ސަރުކާރުގެ ހަފުތާ-14 މަގުޗާޓުގައި ހިމަނައިގެން، މަސްވެރިންގެ ދަފްތަރު އެކުލަވާލާ، އޭގައި ރަޖިސްޓްރީވުމަށް ފިޝަރީޒް މިނިސްޓްރީންް ހުޅުވާލާފައިވަނީ މި އަހަރުގެ ފެބްރުއަރީ މަހުގެ 16ވަނަ ދުވަހު އެވެ.
މަސްވެރިކަމާބެހޭ ގާނޫނޫ ވުޖޫދުވެފައިވަނީ 5 ސެޕްޓެންބަރު 2019 ގައެވެ. އޭގައި ބުނާގޮތުންނަމަ، ޤާނޫނަށް އަމަލުކުރަން ފަށާތާ 100 ދުވަހުގެ ތެރޭގައި މަސްވެރިންނާއި، ފަޅުވެރިންނާއި، އޮޑިވެރިން އަދި އޮޑިދޯނިފަހަރުގެ މަޢުލޫމާތު ހިމެނޭ ދަފްތަރެއް އެކުލަވާލައި، ޤާނޫނުގެ ދަށުން ހަދާ ގަވާއިދުގައި ބަޔާންކުރާ އުސޫލުތަކާ އެއްގޮތްވާ ގޮތުގެމަތިން މިނިސްޓްރީން އެ ދަފްތަރު ލިޔެ ބަލަހައްޓަންޖެހެއެވެ.