މަސްދޯނިތަކުގައި ރެފްރިޖަރޭޓެޑް ސީ ވޯޓަރ(އާރްއެސްޑަބްލިއު) ސިސްޓަމް އިންސްޓޯލްކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ(އެމްޓީސީސީ) ގެ އެއްބާރުލުން ހޯދުމާ ގުޅޭގޮތުން މަޝްވަރާކޮށްފި އެވެ.
މި މަޝްވަރާތައް ކުރިޔަށް ދިޔައީ މިއަދު ފިޝަރީޒް މިނިސްޓަރު އަހްމަދު ޝިޔާމް، އެމްޓީސީސީގެ މެނޭޖިންގ ޑިރެކްޓަރު ޑެޕިއުޓީ ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ސަޢުދީއެއެކު ބޭއްވެވި ބައްދަލުވުމެއްގަ އެވެ. މި ބައްދަލުވުމުގައި ފިޝަރީޒް މިނިސްޓްރީއާއި، އެމްޓީސީސީގެ އިސް ބޭފުޅުން ބައިވެރިވަޑައިގެންނެވި އެވެ.
ފިޝަރީޒް މިނިސްޓްރީން ބުނީ، އެ ބައްދަލުކުރެއްވުމުގައި މަސްދޯނިތަކުގައި ލޮނުފެނުގެ ނިޒާމުން މަސް ފިނިކުރާ ނިޒާމް ނުވަތަ އާރްއެސް ޑަބްލިއު ސިސްޓަމްތައް އެޅުމަށް އެމްޓީސީސީގެ އެއްބާރުލުން ބޭނުންވާ ދާއިރާތަކާ ގުޅޭ ގޮތުން ދެބޭފުޅުން މަޝްވަރާކުރައްވާފައިވާކަމަށެވެ.
މި ބައްދަލުވުމުގައި ވަޒީރު އަޙްމަދު ޝިޔާމް ވިދާޅުވީ، އާރް.އެސް.ޑަބްލިއު ޕްރޮޖެކްޓުގެ ވެންޑަރެއްގެ ގޮތުގައި އެމްޓީސީސީ ރަޖިސްޓަރީވުމަކީ މުހިންމު ކަމެއް ކަމަށެވެ. އަދި އެމްޓީސީސީއިން ފޯރުކޮށްދޭ އާފްޓަރ ސޭލްސް ސަރވިސްއާއި ސްޕެއަރ ޕާޓްސް ލިބުމުގެ ޔަގީންކަން މަސްވެރިންނަށް ލިބިގެންދިއުމުގެ މުހިންމުކަން ފާހަގަކުރެއްވި އެވެ. މީގެ ސަބަބުން ދޯނިތަކުގެ އާރް.އެސް.ޑަބްލިއު ނިޒާމަށް ދިމާވާ މައްސަލަތަކަށް އަވަސް ޙައްލެއް ލިބިގެންދާނެ ކަމަށް ވަޒީރު ވިދާޅުވި އެވެ.
މީގެ އިތުރުން، އައު ޖީލުގެ އުޅަނދުތައް ތަރައްޤީކުރުމުގެ މަޝްރޫޢުގައި އެމްޓީސީސީގެ އެހީތެރިކަން ވަރަށް ބޮޑަށް ބޭނުންވާކަން ވަޒީރު ފާހަގަކުރެއްވިއެވެ. އަދި ގދ. ތިނަދޫ ކޯލްޑް ސްޓޯރޭޖްގެ މަސައްކަތް ވީހާވެސް އަވަހަށް ނިންމާ މަސްވެރިންނަށް ޚިދުމަތް ފޯރުކޮށްދޭން ބޭނުންވާ ކަމަށް ވަޒީރު ވިދާޅުވި އެވެ.
މަހުގެ ކޮލިޓީ ދެމެހެއްޓުމަށް، ދޯނިތަކުގައި އާރްއެސްޑަބްލިއު އެޅުމަށް ޚާއްސަ ލޯން ސްކީމެއް ވަރަށް އަވަހަށް ތައާރަފްކުރާނެ ކަމަށް މިމަހުގެ ކުރީކޮޅު ފިޝަރީޒް މިނިސްޓްރީން ބުނެފައި ވެއެވެ. މި ލޯނު ސްކީމަކީ އެސްއެމްއީ ޑެވެލޮޕްމެންޓް ފައިނޭންސް ކޯޕަރޭޝަން(އެސްޑީއެފްސީ) މެދުވެރިކޮށް ހުޅުވާލާ ލޯނެއް ކަމަށާއި، ވަރަށް ލުއި ގޮތަކަށް މަސްވެރިންނަށް މި ލޯނު ދިނުމަށް ނިންމާފައިވާކަމަށް ބުނެފައި ވެއެވެ.