މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)ގެ ޕްރޮޑަކްޝަން ފެސިލިޓީއެއްގެ ގޮތުގައި ހިންގަމުންދިޔަ ކ. ކަނޑުއޮތްގިރި ފިޝް ވިލެޖު، މޯލްޑިވްސް ނެޝަނަލް ޑިފެންސް ފޯރސްއަށް (އެމްއެންޑީއެފް)އަށް ދިނުމާއި ގުޅިގެން، އެތަނުން ކުރަމުން އައި މަސައްކަތްތައް މިވަގުތަށް ޅ. ފެލިވަރަށް ބަދަލުކުރުމުގެ މަސައްކަތް މިފްކޯއިން ދަނީ ކުރަމުންނެވެ.
ކަނޑުއޮތްގިރި މިމަހުގެ 15 ގެ ކުރިން ހުސްކުރަންޖެހެއެވެ. މިމަސައްކަތް ކުރިޔަށްދާގޮތް އޮޅުން ފިލުވާލުމަށް ”ކެޔޮޅާ“ އިން ފޮނުވި ސުވާލުތަކަށް ދިން ޖަވާބުގައި މިފްކޯއިން ބުނެފައިނީ، ހުޅުމާލެއިން ބިން ލިބެންދެން ކަނޑުއޮތްގިރީގައި މިފްކޯއިން ކުރި މަސައްކަތް ވަގުތީގޮތުން ފެލިވަރުގައި ފެށުމަށް ގިނަވަގެން ނަގާނީ ދެ ހަފްތާކަމަށާއި މިމަހުގެ ފަހުކޮޅު މަސައްކަތްތައް ފެށޭވަރުވާނެކަމަށެވެ.
”އެހެންވީމާ އަންނަ މަހުގެ ކުރިން މިމަހުގެ ފަހުކޮޅުގެ ތެރޭގައި ފަށާނަން.“ މިފްކޯގެ ޖަވާބުގައި ވެއެވެ.
މިފްކޯއިން ބުނީ، ރީލޮކޭޓް ކުރުމުގެ މަސައްކަތުގެ %90 މިހާރު ނިމިފައިވާ ކަމަށެވެ. އަދި، މިހާރު ކުރަމުންދަނީ ބާކީ ހުރި ޕްރޮޑަކްޝަނަށް ބޭނުންވާ ސާމާނު އެރަށުން ބޭލުމުގެ މަސައްކަތްކަމަށެވެ. އޭގެ ތެރޭގައި ހެވީ ޑިއުޓީ އިކުއިޕްމެންޓް ހިމެނޭތީ ލޭންޑިންގ ކްރާފްޓާއި ކްރޭން ބޭނުންކޮށްގެން ކުރިއަށް ގެންދަންޖެހޭ މަސައްކަތަކަށް ވުމުން ލަސްކަމެއް އައިސްދާނެކަމަށް މިފްކޯއިން ބުނެފައި ވެއެވެ.
”މިމަހުގެ 15 ގެ ކުރިން އެތަން ހުސްކުރަން ޖެހޭތީ އިތުރު ކުޑަ މުއްދަތެއް ހޯދުމަށް އެމްއެންޑީއެފާއި ދަނީ މަޝްވަރާ ކުރެވެމުން.“ މިފްކޯގެ ޖަވާބުގައި ވެއެވެ.
ކަނޑުއޮތްގިރިއަކީ ކުރިން ފިޝަރީޒް މިނިސްޓްރީގެ ބެލުމުގެ ދަށުގައި އޮތް ރަށެއްކަމުން، އެމްއެންޑީއެފް އަށް އެރަށް ދީފައިވަނީ ބަދަލުގައި، ހުޅުމާލެއިން މިނިސްޓްރީއަށް ބިމެއް ހަމަޖައްސައިދޭ ގޮތަށެވެ. ފިޝަރީޒް މިނިސްޓްރީން ބުނީ، ހުޅުމާލެ މަސް މާރުކޭޓް ހުންނަ ބިން މިހާރު އެކަމަށް ހަމަޖެހިފައިވާ ކަމަށާއި، އެ ބިން ހަވާލުކުރުމުގެ އިޖްރާއަތުތައް މިހާރު ފުރިހަމަ ކުރަމުން އަންނަކަމަށެވެ.
ޖުމްލަ 4 ހެކްޓަރުގެ ކަނޑުއޮތްގިރިއަކީ މިފްކޯއިން އުފައްދާ ލައިފްސްޓައިލް ޕްރޮޑަކްޓްތަކުގެ މައި ހަބެވެ. އޭގެ ތެރޭގައި ރެޑީ މޭޑް ނުވަތަ ތާޒާކަމާއެކު ވަގުތުން ގަނެގެން ކެވޭ ގިނަ ބާވަތްތަކުގެ އުފެއްދުންތައް ހިިމެނެއެވެ. އަދި އެ ފެސިލިޓީން މަސްވެރިންނަށްވެސް އައީ ހިދުމަތް ދެމުންނެވެ. އޭގެ ތެރޭގައި ކަޅުބިލަމަހާއި ކަންނެލި މަސް ކިރުމާއި، މަސް ބަންދުކުރުމާއި، ލައިފްސްޓައިލް ޕްރޮޑަކްޓްތައް އުފެއްދުމުގެ އިތުރުން މަސްވެރިންނަށް އައީ އައިސް ދޫކުރަމުންނެވެ. ކަނޑުމަހާއި ކަންނެލި މަހުގެ ލޮއިންސް ބަންދުކުރުމުގެ މަސައްކަތްވެސް ކުރަމުން އައީ ކަނޑުއޮތްގިރީގައެވެ.
މިފްކޯއިން ބުނީ، އެންމެ ބޮޑު އިސްކަމެއްދީގެން މިހާރު ކުރިއަށް ގެންދަނީ ފެލިވަރުގައި ލައިފްސްޓައިލް އަދި ކަންނެލި މަހުގެ އުފެއްދުންތައް ޕްރޮސެސްކުރެވޭނެ ގޮތް ހަމަޖެއްސުމުގެ މަސައްކަތްކަމަށެވެ. އަދި އެއީ، ވަގުތީ ހައްލެއް ނަމަވެސް އެ ކުންފުންޏަށް ލިބިފައިހުރި އިންވެސްޓްމެންޓު ފުރުސަތުތަކުގެ ބޭނުން ހިފައި، ވީހާވެސް އަވަހަކަށް ހުޅުމާލެއިން ހަމަޖެހޭ ބިމުގައި، ފުޅާދާއިރާއެއްގައި އެ ހިދުމަތްތައް އަލުން ދިނުމަށް މަސައްކަތްކުރާނެކަމަށް މިފްކޯއިން ބުނެފައި ވެއެވެ.
ކަނޑުއޮތްގިރި އެމްއެންޑީއެފާ ހަވާލުކުރަން ކެބިނެޓުން ނިންމީ، މިދިޔަ މަހުގެ 4 ވަނަ ދުވަހު އެވެ.