އެމްއެންޔޫގެ ކޮލެޖް އޮފް ފިޝަރީޒް އެންޑް އޯޝަން ސައިންސަސްއާއި ފިޝަރީޒް މިނިސްޓްރީއާ ދެެމެދު މަސްވެރި ސިނާއަތަށް ބޭނުންވާ މީހުން ބިނާކުރުމާއި ތަމްރީނު ދިނުމާ ގުޅޭ މުހިންމު މަޝްވަރާތަކެއް ކޮށްފި އެވެ.
މި މަޝްވަރާތައް ކުރިއަށް ގެންދިޔައީ ކޮލެޖް ފޯ ފިޝަރީޒް އެންޑް އޯޝަން ސައިންސްގައި އިއްޔެ، ފިޝަރީޒް މިނިސްޓްރީގެ ސްޓޭޓް މިނިސްޓަރ ޑރ. ޢަމްޒަތު އަޙްމަދާއި ކޮލެޖް ފޯ ފިޝަރީޒް އެންޑް އޯޝަން ސައިންސްގެ ޑީން، ޑރ. އަހުމަދު ރިޔާޒް ޖައުހަރީއާ ދެބޭފުޅުން ބޭއްވެވި ބައްދަލުވުމެއްގަ އެވެ.
މި ބައްދަލުވުމުގައި މައިގަނޑުގޮތެއްގައި މަޝްވަރާކޮށްފައިވަނީ މަސްވެރިން ތަމްރީނު ކުރުމާއި، މަސްވެރިކަމުގެ ސިނާއަތަށް ބޭނުންވާ މީހުން ބިނާކުރާނެ ދާއިރާތައް ދެނެގަތުމާއި ގުޅޭގޮތުންނެވެ. އަދި، ތަމްރީނު ދިނުމާއި ހުނަރު އިތުރުކުރުމުގެ މުހިންމުކަމާ މެދުވެސް ދެ ބޭފުޅުން މަޝްވަރާ ކުރެއްވި އެވެ.
މީގެ އިތުރުން ފިޝަރީޒް ކޮލެޖުގައި، ޑިގްރީ ފެންވަރަށް ކިޔަވައި ދިނުމުގެ މުހިންމުކަމާއި، މަސްވެރިކަމާއި ކަނޑުތަކުގެ ދިރާސާކުރުމާ ގުޅޭގޮތުން ދެބޭފުޅުން ޚިޔާލު ބަދަލުކުރެއްވި އެވެ.
މި ބައްދަލުވުމަކީ ރާއްޖޭގެ މަސްވެރި ސިނާއަތު ކުރިއެރުވުމަށާއި، މި ދާއިރާއަށް ބޭނުންވާ ފަންނީ މީހުން އުފެއްދުމަށް އެޅޭ މުހިންމު ފިޔަވަޅެކެވެ. މިފަދަ މަޝްވަރާތަކުން މަސްވެރިކަމުގެ ދާއިރާގައި ތަޢުލީމީ ގޮތުންނާއި ތަމްރީނުގެ ގޮތުން ކުރިއެރުންތަކެއް ލިބިގެންދާނެ ކަމަށް އުންމީދު ކުރެވެއެވެ.
ރާއްޖޭގައި ފުރަތަމަ ފަހަރަށް ފިޝަރީޒް ކޮލެޖެއް ޤާއިމުކުރެއްވުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނު ކުރެއްވީ މިދިޔަ އަހަރު ފާހަގަކުރި، ދިވެހިރާއްޖޭގެ 43 ވަނަ މަސްވެރިންގެ ދުވަހުގެ މުނާސަބަތުގައި ބޭއްވި ޖަލްސާގައި ދެއްކެވި ވާހަކަފުޅުގަ އެވެ. އަދި ފިޝަރީޒް ކޮލެޖް ގާއިމުކުރުމުގެ އެއްބަސްވުމަކަށް އެމްއެންޔޫއާއި ފިޝަރީޒް މިނިސްޓްރީއާ މެދު ފަހުމުނާމާއެއްގައި ސޮއިކޮށްފައިވަނީ މިދިޔަ އަހަރުގެ ޑިސެންބަރުމަހުގެ 27 ވަނަ ދުވަހު އެވެ.
ފިޝަރީޒް ކޮލެޖުން މިއަހަރު ގައުމީ ސަނަދުގެ 4 ކޯހެއް ހިންގުމަށް ހަމަޖެހިފައި ވެއެވެ. އެ ކޯސްތަކުގެތެރޭގައި، ނޭޝަނަލް ސެޓްފިކެޓް 3 އިން ސްޕޯޓްސް ފިޝިންގ ގައިޑިންގ ކޯހާއި، ފިޝް ޕްރޮސެސިންގ އެންޑް ކޮލިޓީ ކޮންޓްރޯލްގެ ނޭޝަނަލް ލެވެލްގެ 3 ކޯހެއް ހިމެނެއެވެ. މިވަގުތު ސެޓިފިކެޓް ކޯސްތަކެއް ފެށިނަމަވެސް ކުރިޔަށް އޮތް ތާނގައި އެކޮލެޖުން މަސްވެރިކަމާ ގުޅުން ހުރި މަތީ ޕޯސްޓް ގްރެޖުއޭޓް ކޯސްތައް ހިންގަންވެސް ވަނީ ނިންމާފަ އެވެ.
ކޮލެޖް އޮފް ފިޝަރީޒް އެންޑް އޯޝަން ސައިންސަސްގެ ޑީންއަކަށް ޑރ. އަހްމަދު ރިޔާޒު ޖައުހަރީ އައްޔަން ކުރައްވާފައިވަނީ ސެޕްޓެމްބަރުމަހުގެ 1 ވަނަ ދުވަހު އެވެ. ޑރ. ޖައުހަރީ އަކީ، މެރިން އިކޮލޮޖީގެ ދާއިރާއިން މަތީ ތައުލީމް ހާސިލުކުރައްވާފައިވާ ބޭފުޅެކެވެ..