އުތުރާއި މެދުރާއްޖެތެރޭގެ އެކި ހިސާބަށް މިރޭ ވިއްސާރަކުރާނެ ކަމަށް މޫސުމާއި ބެހޭ ގައުމީ އިދާރާއިން ބުނެފި އެވެ.
މެޓުން އާންމުކޮށްފައިވާ މޫސުމީ މައުލޫމާތުތައް ދައްކާގޮތުންނަމަ މިރޭ ދެކުނަށް މޫސުން ރަނގަޅެވެ. އެހެންނަމަވެސް އުތުރާއި މެދު ރާއްޖެތެރޭގެ އެކި ރަށްރަށަށް ބޯކޮށް ވާރޭވެހި ގުގުރާނެކަމަށް ލަފާކޮށްފައި ވެއެވެ.
އުތުރާއި މެދުރާއްޖެތެރޭގެ އަތޮޅުތަކަށް ހުޅަނގު ދެކުނާއި ހުޅނަގުން ގަޑިއަކު 8 މޭލާއި 18 މޭލާއި ދެމެދުގެ ބާރުމިނުގައި ވައިޖެހޭނެކަމަށާއި، ވިލާގަނޑުގައި ގަޑިއަކު 35 މޭލަށް ވައިގަދަވުން އެކަށީގެންވާކަމަށް މެޓް އޮފީހުން ލަފާކޮށްފައި ވެއެވެ. އަދި، އާދައިގެ ވަރަކަށް އެސަރަހައްދަށް ކަނޑުގަދަވާނެކަމަށްވެސް ލަފާކޮށްފައި ވެއެވެ. ރާޅު ނަގާނެކަމަށް ލަފާކޮށްފައިވަނީ 3-6 ފޫޓް އުސްމިނިގަ އެވެ.
މެޓް އޮފީހުން ލަފާކޮށްފައިވާ ގޮތުގައި، މިރޭ ދެކުނުގެ ބައެއް ރަށްތަކަށް ކެރީގެ އަސަރު ފޯރިނަމަވެސް މޫސުން އާންމުގޮތެއްގައި ރަނގަޅުވާނެ އެވެ. ދެކުނުގެ އަތޮޅުތަކަށް ވައިޖެހޭނެކަމަށް ލަފާކޮށްފައިވަނީ، އިރުދެކުނާއި ދެކުނުން ގަޑިއަކު 3 މޭލާއި 10 މޭލާ ދެމެދުގެ ބާރުމިނުގައެވެ. އަދި، ކަނޑުމަޑުވެފައި ރާޅު ނަގާނީ 1-3 ފޫޓް އުސްމިނުގައި ކަމަށްވެސް ވަނީ ލަފާކޮށްފަ އެވެ.