ސަރުކާރުން އަލަށް ފެށުމަށް ތައްޔާރުވަމުން އަންނަ ބަންކަރިންގެ ޚިދުމަތުގައި ބޭނުންކުރުމަށް ސްޓޭޓް ޓޭރޭޑިންގ އޯގަނައިޒޭޝަން(އެސްޓީއޯ) އިން ގެނައި އުޅަނދު ރާއްޖެ އައިސްފި އެވެ.
4،000 މެޓްރިކް ޓަނުގެ ތެޔޮ އުފުލޭވޭ ވަރުގެ މި ބިޔަ އުޅަނދު މިއަދު ވަނީ ކުޅުދުއްފުށީގައި ބަނދަރުކޮށްފަ އެވެ. އެސްޓީއޯއިން ބުނީ، މި
މަހުގެ 15 ވަނަ ދުވަހު ރާއްޖެ މީގެ އިތުރު އުޅަނދެއް ގެނައުމުގެ މަސައްކަތް މިހާރު ކުރަމުން އަންނަކަމަށެވެ.
އެސްޓީއޯ އާއި އެމްޕީއެލް ގުޅިގެން ފޯރުކޮށްދިނުމަށް ހަމަޖެހިފައިވާ މި އޮފްޝޯ ޚިދުމަތުގެ ތެރެއިން، ބަނދަރެއް ނެތް ހާލަތެއްގައި ކަނޑު މަތިންވެސް ބޯޓު ތަކަށް ބޭނުންވާ ތެެޔޮ ފޯރުކޮށްދޭނެއެވެ. މި ޚިދުމަތް ފަށަނީ ހޯރަފުށީ ފަރު ކައިރިންނެވެ.
އިކޮނޮމިކް މިނިސްޓަރު މުހައްމަދު ސައީދު މީގެކުރިން ވިދާޅުވެފައިވަނީ، މިމަހުގެ 12 ވަނަ ދުވަހު ބަންކަރިންގެ ޚިދުމަތް ފެށުމަށް ތައްޔާރުވަމުން އަންނަކަމަށެވެ. ރާއްޖޭގެ އެންމެ އުތުރުގައި ބަންކަރިންގެ ޚިދުމަތް ފެށުމަށް ތައްޔާރުވަމުން އަންނައިރު، އެ ސަރަހައްދަކީ ގިނަ އަދަދެއްގެ އާގު ބޯޓާއި އެހެނިގެން އުޅަނދުތައް ދަތުރުކުރަމުންދާ ސަރަަހައްދެކެވެ. އެހެންކަމުން ބަންކަރިންގް ޚިދުމަތާއެކު، އިގުތިސާދަށް ބޮޑު ކުރިއެރުމެއް އަންނާނެކަމަށް އަންދާޒާކުރެވެއެވެ.
ބަންކަރިންގެ ހިދުމަތް ކުރިޔަށްގެންދިއުމަށް އެސްޓީއޯއިން ވަނީ ހަކަތައިގެ ވިޔަފާރީގައި ފުންނާބު އިސް ބައިނަލްއަގުވާމީ ކުންފުންޏެއްކަމަށްވާ ވިޓޯލް ގްރޫޕްއާ އެކު، މާޗް މަހުގެ 13 ވަނަ ދުވަހު އެއްބަސްވުމެއްގައި ސޮއިކޮށްފަ އެވެ.