ރާއްޖޭގެ މަސްވެރިކަމާއި މަހުގެ އުފެއްދުންތައް މާކެޓްކޮށް، ޕްރޮމޯޓްކުރަން ހާއްސަ ބްރޭންޑެއް އުފައްދައި ދޭނެ ބަޔަކު ހޯދަން މޯލްޑިވްސް ފިޝަރީޒް އެންޑް އޯޝަން ރިސޯސެސް މާކެޓިން އެންޑް ޕްރޮމޯޝަން ކޯޕަރޭޝަން ލިމިޓެޑް (އެމްއެފްއޯއާރްއެމްސީ) އިން ހުޅުވާލައިފި އެވެ.
އެމްއެފްއޯއާރްއެމްސީއާ ގުޅިގެން މަސްވެރިކަމަށް ޚާއްސަ ބްރޭންޑެއް އުފައްދައި، ރާއްޖެއާއި ރާއްޖެއިން ބޭރުގައި މަހުގެ އުފެއްދުންތައް އިޝްތިހާރުކުރުމުގެ މަސައްކަތްކުރުމަށް، ޝައުގުވެރިވާ ތަޖުރިބާ ހުރި ކުންފުނިތަކަށް އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމުގެ ފުރުސަތު މި މަހުގެ 22 އާ ހަމައަށް ވަނީ ހުޅުވާލާފަ އެވެ. އަދި، މިކަމާ ގުޅޭ މައުލޫމާތު ސެޝަނެއް މިމަހުގެ 12 ވަނަ ދުވަހު ބާއްވާނެކަމަށް އެމްއެފްއޯއާރްއެމްސީން ބުނެފައި ވެއެވެ.
އެމްއެފްއޯއާރްއެމްސީއަކީ، ރާއްޖޭގެ މަސްވެރިކަމުގެ ދާއިރާގެ އުފެއްދުންތަކަށް ޚާއްޞަ ބްރޭންޑެއް ތައާރަފުކޮށް އެ އުފެއްދުންތައް އިޝްތިހާރުކޮށް، މާކެޓުކުރުމަށް ހާއްސަކޮށްގެން މި އަހަރުގެ ފެބްރުއަރީ މަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފެއްދެވި ސަރުކާރުގެ 100 ޕަސަންޓް ސަރުކާރު ހިއްސާވާ ކުންފުންޏެކެވެ.
މި ކުންފުންޏަކީ އެކުއަކަލްޗާ، މެރިކަލްޗާ ފަދަ ކަނޑުގެ ހުރިހާ ރިސޯސްތައް ހިމެނޭ ގޮތަށް ދިވެހިރާއްޖޭގެ މަސްވެރިކަމުގެ އުފެއްދުންތައް އިޝްތިހާރުކޮށް އޭގެ ވިޔަފާރިން ލިބޭ މަންފާ އިތުރުކުރުމަށްޓަކައި އުފެއްދެވި ކުންފުންޏެކެވެ. މި ކުންފުނިން ރާއްޖޭގެ އުފެއްދުންތަކަށް ހާއްސަ ބްރޭންޑެއް ތައާރުފުކޮށް އެ ތަކެތި ޕްރިމިއަމް އުފެއްދުންތަކެއްގެ ގޮތުގައި ގައުމީ އަދި ބައިނަލްއަގުވާމީ މާކެޓްތަކަށް ނެރުމާއި އުފެއްދުންތަކަށް އާ މާކެޓްތައް ހޯދުމުގެ މަސައްކަތް ކުރާނެ އެވެ.
މި ކުންފުނި އުފެއްދުމާއެކު މީގެ ކުރިން އޮތް މޯލްޑިވްސް ފިޝަރީޒް ޕްރޮމޯޝަން ބޯޑް ވަނީ އުވާލާފަ އެވެ.