ފ. ބިލެތްދޫގައި ފާނަ މަސްވެރިކަން ކުރާ މަސްވެރިންނަށް މަސްވެރިންގެ ދަފުތަރާ ގުޅޭ މައުލޫމާތު ދީފި އެވެ.
ފ. ބިލެތްދޫ ކައުންސިލާއި މަސްވެރި ވުޒާރާ ގުޅިގެން އިއްޔެ ބިލެތްދޫގައި ބޭއްވި ސެޝަންގައި މައުލޫމާތު ހިއްސާކުރައްވާފައިވަނީ، ފިޝަރީޒް މިނިސްޓްރީގެ ޑެޕިއުޓީ މިނިސްޓަރ އަޙްމަދު ޝާފިޢު އެވެ.
މި ބައްދަލުވުމުގައި މަސްވެރިންގެ ދަފުތަރުގައި ކެޔޮޅުންނާއި ފަޅުވެރިން ރަޖިސްޓްރީ ކުރާނެ ގޮތާއި، ކެޔޮޅު އެޕްލިކޭޝަން ބޭނުން ކުރާނެ ގޮތުގެ މައުލޫމާތު މަސްވެރިންނާއި ހިއްސާކޮށްފައި ވެއެވެ. އަދި ފަޅުވެރިންގެ ލިސްޓް ބަލަހައްޓާނެ ގޮތާއި މަސް ދަތުރުގެ މައުލޫމާތު ފުރަން ކެޔޮޅު އެޕްލިކޭޝަން ބޭނުން ކުރާނެ ގޮތާއި އޭގެ މުހިންމުކަންވެސް ހިއްސާކޮށްފައި ވެއެވެ.
މި ސެޝަންގައި، މަސްވެރިންނަކީ ދައުލަތް ބަލައިގަންނަ ބަޔަކަށް ހެެދުމަށް ރައީސް ޑރ. މުހައްމަދު މުޢިއްޒު ކަނޑައަޅުއްވާފައިވާ ސިޔާސަތު ތަންފީޒުކުރުމަށް މިނިސްޓްރީން ކުރަމުންދާ މަސައްކަތް ހިއްސާކޮށް، ދަފުތަރުގެ ސަބަބުން މަސްވެރިންނަށް ލިބޭނެ ފައިދާތަކާއި، އެކި އިދާރާތަކާއި ގުޅިގެން މަސްވެރިންނަށް ޚާއްސަ ފެސިލިޓީތަކާއި ސްކީމްތަކުގައި ބައިވެރިވުމުގެ ފުރުސަތު ހޯދުމަށް ވުޒާރާއިން ކުރަމުންދާ މަސައްކަތްތަކުގެ މައުލޫމާތު ވެސް ހިއްސާކޮށްފައިވާ ކަމަށް މިނިސްޓްރީން ބުނެފައި ވެއެވެ.
މި ބައްދަލުވުމުގައި ބައިވެރިވި މަސްވެރިންވަނީ މަސްވެރި ސިނާއަތުގައި މަސްވެރިންނަށް ދިމާވާ ގޮންޖެހުންތައް ހިއްސާކޮށް ވުޒާރާގެ އެހީތެރިކަމާއެކު އެ ގޮންޖެހުންތައް ހައްލު ކޮށްދިނުމަށް މަސައްކަތް ކޮށްދިނުމަށް އެދިފައެވެ. އޭގެ ތެރޭގައި ފާނަ މަސްވެރިންނަށް ފަހި ހަކަތަ މެދުވެރިކޮށް ޑިއުޓީ މާފުކޮށްފައިވާ ޑީސަލް ހެޔޮއަގުގައި ލިބޭނެ އިންތިޒާމް ހަމަަޖައްސައިދިނުން ހިމެނެއެވެ،
މި ބައްދަލުވުމުގައި ބިލެތްދޫގެ އޮޑިވެރިންނާއި، ކެޔޮޅުންނާއި، ފަޅުވެރިންގެ އިތުރުން ކައުންސިލް އިދާރާގެ ބައެއް މުވައްޒަފުން ބައިވެރިވި އެވެ.