ލ. އަތޮޅު ހިތަދޫގައި ދޮށީ މަސްވެރިކަމަށް ޚާއްސަކޮށް، އެރަށު ކަނޑުން 12 މޭލު ދުރުގައި އަޅާފައި އޮންނަ ބޮއި ކަނޑައިގެން ގޮއްސަ އޮންނަތާ ފަސް މަހަށްވުރެ ގިނަ ދުވަސް ވެއްޖެއެވެ.
ހިތަދޫ ކެޔޮޅުންނާއި މަސްވެރިން އާންމުކޮށް އެ ބޮޔަށް ކިޔައި އުޅެނީ ”ވޯޓް ބޮއެ“ އެވެ. އެ ބޮއި ކަނޑައިގެން ގޮސްފައި އޮތުމުން، އެކަމުގެ ދަތި އުދަނގޫތައް ތަހައްމަލު ކުރަންޖެހި އެކަން ފިޝަރީޒް މިނިސްޓްރީގެ ސަމާލުކަމަށްވެސް ގެނެސްފައި ވެއެވެ. ލ އަތޮޅުގައި މިފަދަ ކަންކަމުގައި ވަކާލާތު ކުރަމުން އަންނަ މުންޑޫ ކެޔޮޅަކު ބުނީ، އެރަށު ކައުންސިލަށްވެސް އަދި މިނިސްޓްރީއަށްވެސް އެކަން އިނގޭނެކަމަށާއި، އެކަން ހައްލުކޮށްދިނުމަށް އެއްވެސް ފަރާތަކުން މަސައްކަތް ނުކުރާތީ އެކަމާއި ކަންބޮޑުވާކަމަށެވެ.
”ބޮއި ކަނޑައިގެން ދިޔަ ދުވަހުވެސް، ޑެޕިއުޓީ މިނިސްޓަރު ޝާފިއުއަށް ގުޅާފައި ބުނިން. އޭނާ ބުނީ، ކައުންސިލުންނޭ ރަސްމީކޮށް އަންގަންވާނީ. ދެން މިހާރު ރަސްމީކޮށް އެނގިފައި އޮތްކަމަށް އަހަރުމެން ބަލާނީ. ފަސްމަހަށްވުރެ ގިނަ ދުވަސް ވެގެން މިދިޔައީ، އެކަން ހައްލުނުކޮށްދީ.މި ބޮއެ ހަލާކުވެފަ އޮއްވާ އަޅާނުލައި އުތުރު ރަށްރަށުގައި އެބަ ޖިގިން ބޮއެވެސް އެބައަޅާ. ”އެ ކެޔޮޅު ބުންޏެވެ.
ކެޔޮޅުން ބުނީ، ”ވޯޓް ބޮއި“ ހަލާކުވެ، މަރާމާތުނުކޮށް އޮތުމުން މިހާރު އެންދަމައިގެން މަސްވެރިކަމަށް ދަނީ ގަން، މާވަށު ފަރެސް ނުވަތަ މުންޑޫ ބޮޔަށްކަމަށެވެ. އަދި މިއީ ހުރިހައި ގޮތަކުން ބަލާއިރުވެސް، އަތުން ބޭކާރު ޚަރަދުތަކެއް ދާ ކަމެއްގެ ގޮތުގައި ކެޔޮޅުން ފާހަގަކުރި އެވެ.
ވޯޓް ބޮއެ މަރާމާތު ނުކޮށް ލަސްވެ ކެޔޮޅުން މިކަމާއި ޝަކުވާ ކުރަމުންދާތީ، އެކަން ފިޝަރީޒް މިނިސްޓްރީގެ ސްޓޭޓް މިނިސްޓަރު މުހައްމަދު މުއްޠަލިބް އާ ހިއްސާކޮށްލުމުން ވިދާޅުވީ، ކަނޑައިގެން ގޮއްސަ ހުރި ބޮއެތައް މަރާމާތު ކުރުމަށް ބޭނުންވާ ގާ އެޅުން ހުއްޓިފައިވާތީ، ބޮއިތައް މަރާމަތުކުރުމުގެ މަސައްކަތް ލަސްވަނީ ކަމަށެވެ.
މުއްޠަލިބް ވިދާޅުވީ، އެގާ އަޅައިދެނީ މިނިސްޓްރީ އޮފް ސިޓީސް، ލޯކަލް ގަވަންމަންޓް އެންޑް ޕަބްލިކް ވޯކްސްއިން ކަމަށާއި، އެބޭފުޅުން ގާ އަޅައިދޭ ސައިޓް އޮފީސް އިމާރާތަކަށް ނަގައިގެން މިވަގުތު ގާ އެޅުން ހުއްޓިފައިވާކަމަށެވެ. އަދި، މިހާރު ގާއަޅަން ޝެޑެއް ހެދުމުގެ މަސައްކަތް ކުރިޔަށްދާކަމަށާއި، އެނިމުމުން ގާ އެޅޭނެ ގޮތް ހަމަޖެހި، މަރާމާތު ކުރުމުގެ ދަތުރުތައް ވަރަށް އަވަހަށް ފަށާނެކަމަށެވެ.
”މިހާރު ތަންކޮޅެއްގަ ޝެޑް ހެދުމުގެ މަސައްކަތް ކުރިޔަށްދަނީ. ނިމުނީމައި މި މަސްތެރޭގައި ދަތުރެއް ކުރެވޭނެ ކަމަށް ބަލައިގެން މިތިބީ. އަދި ޔަގީނެއް ނުވޭ.“ މުއްޠަލިބް ވިދާޅުވި އެވެ.
މުއްޠަލިބް ވިދާޅުވީ، ބޮއެ މަރާމާތުކުރުމުގެ ފުރަތަމަ ދަތުރު ކުރާނީ ދެކުނަށް ކަމަށާއި، އެ ދަތުރުގައި ކަނޑައިގެން ގޮއްސަ ހުރި ބޮއެތައް އެންމެ ފުރަތަމަ މަރާމާތުކުރުމަށް އިސްކަންދޭނެކަމަށެވެ.
އެހެންކަމުން ”ވޯޓް ބޮއެ“ މަރާމާތު ކުރެވެން އޮތީ ދެކުނަށް ކުރާ ދަތުރުގެ ތެރެއިންނެވެ.
”ވޯޓް ބޮއެ“ އަކީ މެދު ރާއްޖެތެރެއާއި ދެކުނުގެ އަތޮޅުތަކުގެ މަސްވެރިންގެ މެދުގައި ވަރަށް މަގްބޫލު ބޮއެކެވެ. ދެކުނު މަސްވެރިންވެސް އެސަރަހައްދަށް މަސްވެރިކަން ރަނގަޅު ދުވަސްވަރު އެބޮޔަށް އަރާ މަސް ބާނައެވެ.