މާލެ ސަރަހައްދުގައި، ދޮށީ މަސްވެރިކަމަށް ޚާއްސަކޮށް އަޅާފައި އޮންނަ ކަނދުފަތި(ރަތް ބޮއި)ކައިރިއަށް އެހެން ބާވަތުގެ އޮޑިފަހަރު ގާތްކުރާ މައްސަލަ ވަރަށް ބޮޑު ވެއްޖެ އެވެ.
’ކެޔޮޅާ‘ އާ ވާހަކަ ދެއްކި މާލެ ސަރަހައްދުގެ ކެޔޮޅުންނާއިި އޮޑިވެރިން ބުނީ، މާލެއިން 15 މޭލު ބޭރުގައި ދޮށީ މަސްވެރިކަމަށް ޚާއްސަކޮށްފައި އޮންނަ ކަނދުފަތި ނުވަތަ އެމީހުން އާންމުކޮށް ކިޔައި އުޅޭ ނަމުންނަމަ ”ޝައިނީ ބޮއި“ އަށް އެހެން އޮޑިތައް ގާތްކޮށް ދޮށީ މަސްވެރިންނަށް އުނަދަގޫވާގޮތަށް ހަރަކާތްތެރިވަމުންދާތީ އެކަމާއި ކަންބޮޑުވާކަމަށެވެ.
”ދޮށީ މަސްވެރިން އެން ހިފައިގެން އެތައް ތެލެއް އަންދާފައި ބޮޔާ ހަމަޔަށް ދުއްވާފައި މި އަންނަނީ. އަންނައިރު އެހެން އޮޑި ފަހަރުތައް މިއޮންނަނީ ބޮއި ކައިރީ ފުރާލާފައި. ސަފާރީއާއި، ރިސޯޓް ދޯނި ފަހަރާއި، ފަރުމަސްވެރިކަން ކުރާ ދޯންޏާއި، ސްޕޯޓްސް ފިޝިންގް ދޯނިވެސް. ބައެއް ފަހަރު ގޮތް ނޭނގޭ ދޯނިތައްވެސް އެބަތިބޭ. މިއީ އަހަރުން ކަންބޮޑުވާކަމެއް.“ ކެޔޮޅަކު ބުންޏެވެ.
ކެޔޮޅުން ބުނީ، އެ ދޯނި ފަހަރުތައް އައިސް ބޮއެ ކައިރިން މަސްބާނާތީ މައްސަލަ ޖައްސަނީ ނޫންކަމަށާއި، ދޮށީ މަސްވެރި އުޅަނދުތައް ކައިރި ކުރާ ވަގުތާ ދިމާކޮށް އެތަން ފުރާލާތީ ކަންބޮޑުވަނީ ކަމަށެވެ.
”އެ މީހުންވެސް ބާނަންވީ. އެންމެންގެ ވެސް ރިޒްގު މިއީ. އެކަމު ކަމެއް ވީމައި ދޯ އަހަރުމެންނަށް ޚާއްސަކޮށްފަ ބޮއެއް މިއޮންނަނީ. އަހަރުމެން މަސް މިބާނަނީ ވަކިގޮތަކަށް. ވަކި ޑިސިޕްލިންއެއްގަ. އެމީހުން އެކުރަނީ ޖިގިންގ ނޫނީ ނަނުއެއްލައިގެން ވަދުގައި. ބައެއް ފަހަރު ފަތިހު އަޅާފައި މިތިބޭ ލޯންޗުތަކުގެ އަޑީގައި ހުންނަ ލައިޓްތައް ވެސް ހުންނަނީ ދިއްލާފައި. މިކަހަލަ އެތައް އުދަނގުލެއް އެބަވޭ. މީގެ ސަބަބަުން އަހަރުމެންނަށް ވަރަށް ދަތި.“ ކެޔޮޅަކު ބުންޏެވެ.
ކެޔޮޅުން ބުނީ، ކަމާއި ބެހޭ އިދާރާތަކުން މިކަން ހުއްޓުވައި ދިނުމަށް އެދޭ ކަމަށާއި، އެ އުނދަގޫ ކުރާ ފަރާތްތަކުންވެސް އެކަން އެގޮތަށް ނުކުރުމަށް އިލްތިމާސް ކުރާ ކަމަށެވެ.(ތަފުސީލު ވީޑިއޯއިން ބައްލަވާލައްވާ)
ކެޔޮޅު ބުނީ، މި މެސެޖް ސީދާ ފިޝަރީޒް މިނިސްޓަރު އަހްމަދު ޝިޔާމާވެސް ހިއްސާކޮށްފައިވާކަމަށެވެ. އެހެންނަމަވެސް، މިއާ ގުޅިގެން އެއްވެސް އެއްޗެއް މިހާތަނަށް މިނިސްޓަރު ވިދާޅުވެފައި ނުވާކަމަށެވެ. އަދި މިނިސްޓަރު މަސްވެރިންނާއި އެއްވެސް ވަރަކަށް ގާތްކަން ބާއްވަމުން ނާންނަކަން ކެޔޮޅުން ފާހަގަކުރި އެވެ.
”މިކަމުގައި ވެސް އަދި އެހެންކަންކަމުގައި ވެސް މިނިސްޓަރަށް ގުޅަން، މެސެޖުކުރަން، ޖަވާބެއް ނުދޭ. މަސްވެރިންނާއި ވަރަށް ގާތްކަމަށް ތަންތަނަށް އަރާފައި ވިދާޅުވާނެ. އެއީ ހަމަ ހުސްދޮގު. އަހަރުމެންނާ ނުބާއްވާ ކުރީގެ މިނިސްޓަރުން އެ ބޭއްވި ގުޅުމެއް. ޝައިނީމެން، ޒަހާމެން ހުސެންމެން ކަމެއްގެ ހައްލު އެވަގުތުގައި ހޯދައި ނުެދެވުނަމަވެސް، މަސްވެރިންނާ ގުޅުން ބާއްވާ، އަަޑު އަހާ. އެކަންކުރަމުންދާކަން ވަރަށް ގާތުން މަސްވެރިންނާ ހިއްސާކުރައްވާ.ހުރިހައި ކެޔޮޅުން އެކަމަށް ހެކިވާނެ. މިހާރު އެއާ ގާތްކުރާވަރުވެސް ނުވޭ. މިނިސްޓްރީގެ ކަންތައްވެސް އޮތީ ހަމަ އެހެން.“ ކެޔޮޅަކު ބުންޏެވެ.
މީގެ ކުރިން، މާލޭ ބޮއި ކަރިގައި ކަންވާރު އަޅައިގެން ވަދު ހަލާކުުވާ މައްސަލަވެސް ކުރިން މިނިސްޓްރީއަށް ފާހަގަކުރެވިފައިވާނެކަމަށާއި،މިއީ ދޮށީ މަސްވެރިކަމަށް ގެއްލުންވާކަމެއް ކަމުގައި ކެޔޮޅުން ބުންޏެވެ. އެހެންކަމުން މިއީ، މިނިސްޓްރީއާއި މިކަމާއި ގުޅޭ އެހެން އިދާރާތަކުން ސަމާލުކަމެއް ދީގެން ބަލައި ހުއްޓުވަން ޖެހޭ ކަމެއްގެ ގޮތުގައި ކެޔޮޅުން ފާހަގަކުރެއެވެ.
”މެރިން ޕޮލިސް ކިޔާ ބައެއްވެސް އެބައޮވޭ. ކޯސްޓްގާޑް އެބައޮވޭ. ގައިމު ފެންނާނެތާ. އާރަށް ކައިރިއަށް ދޯންޏެއް ކައިރިކޮށްފިއްޔާ ފުލުހުން ގޮސް އެބަހުރަސް އަޅާ. މިބޮއްޔަށް(މާލެ ސަރަަހައްދު ބޮއި) އަށް ގާތްކުރާ އެހެން އޮޑިތައް ވެސް، ބަލާ ހަމަ ފިޔަވަޅު އަޅަންވީނު. މިއީ، ވަރަށް އުދަގޫވެއްޖެކަމެއް އަހަރުމެންނަށް މިހާރު. ވަރަށް ކަންބޮޑުވޭ. މަސްވެރިންކަށް ހަލާކުވަނީ ވިއްޔާ އެމީހުންނާ ހެދި.“ ކެޔޮޅަކު ބުންޏެވެ.
ކެޔޮޅުން ބުނީ، މާލެ ސަރަހައްދު ބޮއިގެ އިތުރުން ކ. އަތޮޅުގައި ދޮށީ މަސްވެރިކަމަށް ޚާއްސަކޮށް އަޅާފައި އޮންނަ އަނެއް ތިން ބޮއެއަށްވެސް އެހެން އޮޑިތައް ދޭތެރެ ދޭތެރެއިން ގާތްކޮށް މަސް ބާނަމުންދާކަމަށެވެ. އެހެންނަމަވެސް އެންމެ ބޮޑަށް އުދަނގޫވާވަރަށް ގާތްކުރަނީ މާލެ ބޮޔަށް ކަމަށެވެ.