މަސްވެރިންނަށް ފައިސާ ނުދީ މި ސަރުކާރުގެ ވެރިން އުޅުއްވަނީ ހަނީ މޫންގައި ކަމަށް ކުރީގެ ރައީސް އިބްރާހިމް މުހައްމަދު ޞާލިހު(އިބޫ) ވިދާޅުވެއްޖެ އެވެ.
އިބޫ މިހެން ވިދާޅުވީ ތިމަރަފުށީ ދާއިރާގެ އެމްޑީޕީ ކެންޑިޑޭޓް ފަތުހުﷲ ޖަމީލުގެ ކެމްޕޭނުގެ މާލޭ ޖަގަހަ ހުޅުވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މި ސަރުކާރަށް ތިން މަސްވެފައިވާއިރު މިހާތަނަށް ދައުލަތުގެ ބަޖެޓުން މަސްވެރިންނަށް އެއްވެސް ފައިސާއެއް ދޫކޮށްފައި ނުވާ ކަމަށާއި، މަސްވެރިންނަށް ދޭންހުރި ފައިސާގެ ގޮތުގައި ދޫކޮށްފައިވަނީ އެމަނިކުފާނުގެ ވެރިކަމުގައި ފާސްކުރި، ސަޕްލިމެންޓަރީ ބަޖެޓުގައި ހިމެނޭ ސަތޭކަ މިލިއަން ރުފިޔާ ކަމަށް އިބޫ ވިދާޅުވި އެވެ.
މަސްވެރިންނަށް ފައިސާ ދިނުމުގެ ބަދަލުގައި މި ސަރުކާރުގެ އިސް ވެރިން އުޅުއްވަނީ ”ހަނީ މޫން“ ދަތުުރުތަކުގައި ބިޒީކޮށްކަން ފާހަނގަ ކުރައްވާ އިބޫ ވިދާޅުވީ މުޅި ދުނިޔެ ވަށައި ކުރެއްވި ހަނީމޫން ދަތުރުގައި 48 މީހުންނާއެކު ދުބާއީއަށް ރައީސް މުއިއްޒު ވަޑައިގެންނެވި ކަމަށާއި، އަދި ދައުަލަތުގެ ފައިސާ ޚަރަދުކޮށްގެން މިހާރުވެސް މަޖިލިސް ކެމްޕޭނަށް އަތޮޅުތަކަށް ރައީސް ދަތުރު ކުރައްވަމުން ގެންދަވާ ކަމަށެވެ. މި ދަތުރުތަކަށް ޚަަރަދުކުރުމުގެ ބަދަލުގައި އެ ފައިސާ މަސްވެރިންނަށް ދިނުުމުގެ މުހިންމުކަން އިބޫ ފާހަނގަ ކުރެއްވި އެވެ.
މި ސަރުކާރަށް އިތުރަށް ފާޑު ވިދާޅުވަމުން، އިބޫ ވިދާޅުވީ މި ސަރުކާރުގައި ތިއްބެވި ބޭފުޅުންނަށް ސަރުކާރު ހިންގަންވެސް އަދި ފައިސާ ގެންގުޅެންވެސް ނޭގޭ ކަމަށާއި، މަސްވެރިންނަށް ފައިސާ ދިނުމުގައިވެސް ގެންގުޅެނީ ދޯދިޔާ ސިޔާސަތެއްކަށެވެ. އަދި ވިދާޅުވީ ސަރުކާރުން މަސް ވިއްކައިގެން ލިބުނު ފައިސާ ވީތަނެއް އެނގެންޖެހޭ ކަމަށެވެ.
އިބޫ މިހެން ވިދާޅުވެފައިވާއިރު، މަސްވެރިިންވެސް ބުނަމުންދަނީ މިހެންނެވެ. މަސްވެރިންވެސް ބުނަނީ ރައީސް މުއްއިއްޒު އަތޮޅުތަކަށް ކުރަމުން ދަނީ ކެމްޕޭން ދަތުރުތައް ކަމަށާއި، އެކަމަށް ދައުލަތުގެ ފައިސާ ބޭނުންކުރަމުން އަންނަ ކަމަށެވެ. އަދި ދައުލަތުގެ ފައިސާއަކީ މަސްވެރިންގެވެސް ފައިސާ ކަމަށް ބުނެ މަސްވެރިން ވަނީ ކެމްޕޭން ދަތުރުތައް ހުއްޓާލަން ބުނެފަ އެވެ. މަސްވެރިންނަށް ދޭން ހުރި ފައިސާ ސަރުކާރުން ނުދީގެން އެކަމާއި ކަންބޮޑުވުން ފާޅުކޮށް ހަތަރު ދުވަސް ވަންދެން އިހުތިޖާޖުކޮށް ކޫއްޑޫ މަސްފެކްޓަރީ އާއި އައްޑޫ ފިޝަރީޒް ކޮމްޕްލެސްގެ އޮޕަރޭޝަން ހުއްޓުވުމަކަށް ގެނައުމުން އެކަމާއި ގަންނާކުރެއްވި ބިރުން މިފްކޯއިން ވަނީ އިއްޔެ މަސްވެރިންނަށް ދޭން ހުރި ފައިސާގެ ތެެރެއިން ހަތްދިހަ މިލިއަން ރުފިޔާ ދޫކޮށްފަ އެވެ.
ފައިސާ ނުދޭތާ ތިންމަސް ދުވަސް ފަހުން ހަތްދިހަ މިލިއަން ރޭ ދިނުމުން މަސްވެރިން ބުނީ، ވަކިވަކި ދޯނިތަކަށް ބަހާލުމުން މިއީ ވަރަށް ކުޑަ މިންވަރެއް ކަމަށެވެ. ރާއްޖޭގެ އެކިކަންކޮޅުތަކުގައި އަށާރަހާހަށް ވުރެ ގިނަ މަސްވެރިންތިބި ކަމަށް މަސްވެރިން އަންދާޒާކުރާއިރު، މި ދިން ފައިސާއިން ފާއިތުވީ ތަނަށް ވީ ދަރަނި ދައްކާފައި ބާކީ އޮންނާނީ ކުޑަ ލާރިކޮޅެއް ކަމަށް މަސްވެރިން ބުންޏެވެ. މަސްވެރިން ތިބީ މިކަމާ ވަރަށް މާޔޫސްވެފަ އެވެ. އެހެންނަމަވެސް ދެންވެސް ދިރިއުޅުމަށް އިތުުރު ފައިސާ ހޯދެން އޮތީ މަހަށް ގޮސްގެން ކަމަށްވުމާއެކު، މަޖުބޫރު ހާލަތުގައި މަސްވެރިން އިހުތިޖާޖު ރޭ ހުއްޓާލީ އެވެ.
މަސްވެރިންނަށް ފައިސާ ނުދެވިގެން އުޅެނީ ސަރުކާރުގައި ފައިސާ ނެތިގެންނެވެ. ސަވަރިން ގެރެންޓީއެއް ދީގެން ލޯނެއް ނަގައިގެން ވިޔަސް ނުވަތަ އެހެން ފެސިލިޓީ އެއް ހޯދައިގެން ނަމަވެސް މަސްވެރިންނަށް ދޭން ހުރި ފައިސާ މާޗް ފަހެއްގެ ކުރިން ދައްކާ ޚަލާސްކުރާނެ ކަމަށް ސަރުކާރުން ދަނީ ތަކުރާރުކޮށް ވައުދު ވަމުންނެވެ. މަސްވެރިން ރޭ ބުނީ މި ވަގުތަށް މަދު ފައިސާ ކޮޅެއް ދިނުމުން އިހުތިޖާޖު މެދު ކަނޑާލީކަމަށެވެ. ނަމަވެސް ސަރުކާރުން ވީ ވައުދު ނުފުއްދައިފިނަމަ ދެން އެއަށް ވުރެ ވަރުގަދައަށް ނިކުންނާނެކަމަށެވެ. މަސްވެރިންގެ ބޮޑު އާބާދީއަކުން މި ސަރުކާރު ތަރުޖަމާ ކުަަރަމުން ދަނީ ދޮގު ހަދާ އޮޅުވާލާ ސަރުކާރެއްގެ ގޮތުގަ އެވެ.