ސަރުކާރުން ދެއްވާ ހިތްވަރު ދިނުމުގެ ގައުމީ އިނާމްގެތެރެއިން، ބޯޓް ބިލްޑިންގގެ ދާއިރާއިން، ގައުމީ އިނާމު ޢަބްދުއްރަޙްމާނު ޔޫސުފު، (ރީފް، ރ.އަލިފުށި) އަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.
ޢަބްދުއްރަޙްމާނު ލިބުނީ، ބޯޓް ބިލްޑިންގގެ ދާއިރާއިން، އޮޑިދޯނިފަހަރު ބަނުމާއި، ޔޮޓްފަހަރު ބަނުމުގެ ރޮނގުން، ހިތްވަރު ދިނުމުގެ ގައުމީ އިނާމެވެ. މި އިނާމު ޢަބްދުއްރަޙްމާނާއި ހަވާލުކޮށްދެއްވީ، މި އަހަރުގެ ޤައުމީ ދުވަހުގެ މުނާސަބަތުގައި ދަރުބާރުގޭގައި މިއަދު ބޭއްވެވި ގައުމީ ދުވަހުގެ ރަސްމީ ޖަލްސާގަ އެވެ. ހިތްވަރު ދިނުމުގެ ޤައުމީ އިނާމުގެ ގޮތުގައި ރައީސުލްޖުމްހޫރިއްޔާ ދެއްވީ، ހަނދާނީ ފިލައެކެވެ.
އަބްދުއްރަހްމާން ކިއްސަރު ވަޑާމުގެ މަސައްކަތުގެ ތެރެއަށް ވަނީ އަލިފުށްޓަކީ އޮޑިދޯނި ބަންނަ ރަށަކަށްވެފައި އެކަމުގައި ހުރި ޝައުގެއްގެ ބޮޑުކަމުންނެވެ. އެންމެ ފުރަތަމަ މި ދާއިރާއަށް ވަދެ އޮޑީ ދޯނި ބަންނަން ފެށީ، 2000 ވަނަ އަހަރުއެވެ. އެގޮތުން މާވަޑިއެއްގެ ގޮތުން ފުރަތަމަކުރި މަސައްކަތަކީ ޔުނިވަރސަލް އެންޓަޕްރައިޒެސްގް ޕްރޮޖެކްޓެއްގެ ދަށުން، އެކުންފުނީގެ ސަފާރީ، 10 ބައްތެލި ބަނުމެވެ.
މި ވޭތުވެދިޔަ23 އަހަރުގެތެރޭގައި އަބްދުއްރަހްމާން ވަނީ، އެކިސައިޒްގެ ، އެކިވައްތަރުގެ40 އުޅަނދު ބަނދެ، މަރާމާތުކޮށްފަ އެވެ. އޭގެތެރޭގައި،މުދާއުފުލާ ދޯނި ފަހަރާއި މަސްދޯނިފަހަރާއި، ސަފާރީ އުޅަނދުފަހަރު ހިމެނޭ.
ޤައުމީ އިނާމަށް ބޭފުޅުން ހޮއްވެވީ، އެކަމަށްޓަކައި ރައީސުލްޖުމްހޫރިއްޔާ އުފައްދަވާފައިވާ ޤައުމީ އިނާމާބެހޭ ކޮމިޓީއިންނެވެ. ގައުމީ އިނާމާބެހޭ ކޮމިޓީގެ ބޭފުޅުން އަބްދުއްރަހްމާންގެ މަސައްކަތްތައް ވަޒަންކުރެއްވުމަށް އަލިފުށްޓަށް ކުރެއްވި ޒިޔާރަތުގައި، އަބްދުއްރަހްމާން މަސައްކަތްކުރާ ތަންތަނަށް ޒިޔާރަތްކުރައްވައި މަސައްކަތް ބެއްލެވި އެވެ. އަބްދުއްރަހްމާންގެ ކިއްސަރުވަޑާމުގެ ރޮނގުން ގިނަ ގުނަ ކުރިއެރުންތަކެއް ހާސިލުކޮށްފައިވާ މޮޅު މާވަޑިއެއްކަން ކޮމިޓީގެ މެންބަރުން ފާހަގަކުރައްވާފައި ވެއެވެ.
އަބްދުއްރަހްމާންގެ އިތުރުން 8 ބޭފުޅަކަށާއި ކުންފުންޏަކަށް އެކި ދާއިރާތަކުން މިއަދުގެ ޖަލްސާގައި ހިތްވަރު ދިނުމުގެ ގައުމީ އިނާމް ދީފައި ވެއެވެ.
ޤައުމީ އިނާމަކީ، ދިވެހި ޤައުމާއި ދިވެހި މުޖުތަމަޢުގެ ލާބައާއި މަންފާއަށްޓަކައި ވަކިވަކި ފަރުދުންނާއި، މަދަނީ މުއައްސަސާތަކުންނާއި، މަދަނީ ޖަމުޢިއްޔާތަކާއި ޖަމާޢަތްތަކުންނާއި، ވިޔަފާރި އިދާރާތަކުން ދެމެހެއްޓެނިވި ގޮތެއްގައި ދިވެހި ޤައުމުގެ ތަރައްޤީގައި ކުރަމުންގެންދާ މަސައްކަތްތަކުގައި، އެ ފަރާތްތަކުން ހޯދާ ކުރިއެރުންތައް ބަލައިގަނެ، އެ ކަންކަމުގެ އަގު ވަޒަންކޮށް، އެ ފަރާތްތަކަށް ހިތްވަރުދިނުމުގެގޮތުން ސަރުކާރުން ދެމުން އަންނަ އިނާމެކެވެ.