ގދ. ފަރެސްމާތޮޑާ ޑޭޒީ ވިއު ދޯނިން ބްލެކް ސްކަބާޑް ފިޝް އެއް ބާނައިފި އެވެ.
ދިވެހި ބަހުން މި މަހަށް ރަސްމީކޮށް ކިޔާ ނަމެއް އަދި ފާސްކޮށްފައި ނުވި ނަމަވެސް މި މަސް، ކަށި މަހާ ވައްތަރުކަމުން ކެޔޮޅުން ކިޔައި އުޅެނީ ”ކަޅުކަށި މަސް“ އެވެ.
ޑޭޒީ ވިއު ދޯނީގެ ކެޔޮޅު ހަސަން ޒާހިރު ބުނީ، މިއަދު ހެނދުނު އެ ދޯންޏަށް ކަޅު ކަށިމަހެއް ބޭނިފައިވާ ކަމަށާއި، އޭގައި 2-4 ކިލޯ ހުންނާނެކަމަށް ލަފާކުރެވޭކަމަށެވެ. އަދި، އެމަސް ބޭނީ ގދ .ތިނަދޫ ހުޅަނގުފަޅީ ކަނޑުގެ 400 މީޓަރު އަޑިންކަމަށްވެސް ކެޔޮޅު ބުންޏެވެ.
މިއީ ފުން ކަނޑުގައި އުޅޭ މަހެއްކަމުން، ރާއްޖޭގައި އާންމުކޮށް ބާނައި އުޅޭ މަހެއް ނޫނެވެ. އެހެންނަމަވެސް ދޭތެރެ ދޭތެރެއިން އެކި އަތޮޅުތަކުގައި މިދިޔަ 7 އަހަރު މި މަސް ކޮންމެވެސް ވަރަށް ބޭނިފައިވާކަަމުގެ ރެކޯޑް އެބައޮތް ކަމަށް މޯލްޑީވްސް ބަޔޯޑައިވާސިޓީ އޯގަނައިޒޭޝަން އިން ބުންޏެވެ. އެޖަމާއަތުންވެސް ބުނީ މިމަހަށް ދިވެހިން ކިޔާނަމެއް ކަށަވަރު ނުވާކަމަށެވެ.
ބްލެކް ސްކަބާޑްފިޝް ނުވަތަ ކަޅުކަށި މަހަކީ، އުތުރު އެޓްލާންޓިކް ކަނޑުން ފެންނަ ފުން ކަނޑުގައި ޝިކާރަކުރާ މަހެކެވެ. މިއީ ދިގު، ފަލަ ހަށިގަނޑަކާއި، ކަޅު، މެޓަލިކް ކަޅު ކުލައެއްގެ ސަބަބުން މަޝްހޫރުވެފައިވާ މަހެކެވެ. ކަނޑުގެ 200 މީޓަރާއި 1،700 މީޓަރާއި ދެމެދުގެ އަޑީގައި ދިރިއުޅޭ މި މަހަކީ އާންމު ގޮތެއްގައި މަޑޭރާ، އަޒޯރސް އަދި ކެނެރީ އައިލެންޑްސްގެ ވަށައިގެން އުޅޭ މަހެކެވެ.
ގިނަ ފަހަރަށް ފުން ކަނޑުގައި އުޅޭ މި މަސް ބާނައި އުޅެނީ މަސްވަރިކަމުގެ ތަފާތު އެކި އުޅުޅުތައް ބޭނުންކޮށްގެންނެވެ. މި މަސް މައްޗަށް އަރާނީ ރޭގަނޑު ކާނާ ހޯދުމަށެވެ. ތޫނު ދަތްތަކެއް ހުންނަ މިމަސް އެކި ބާވަތުގެ މަސްތަކާއި ތުތިބޯވަދިލަމަސްވެސް ކައި އުޅެއެވެ. ބްލެކް ސްކަބާޑްފިޝް އަކީ ބައެއް ސަރަހައްދުތަކުގައި ވަރަށް އަގުހުރި މަހެކެވެ. ވިޔަފާރި ނަފާ ބޮޑު މަހެކެވެ. ޚާއްސަކޮށް މަޑޭރާގައި މިއީ އަގުހުރި މީރު ކާނާއެއްގެ ގޮތުގައި ބޭނުންކުރާ މަހެއް ކަމުން، އެގައުމުގައި މި މަސް ބާނާ ބާޒާރުތަކުގައި ވިއްކާ އުޅެއެވެ.