ރާއްޖޭގެ ބޮޑު ބަޔަކަށް މޫސުމާ ބެހޭ ގައުމީ އިދާރާއިން ހުދު ސަމާލު ނެރެފި އެވެ.
މެޓް އޮފީހުން އެންމެ ފުރަތަމަ ހުދު ސަމާލު ނެރުނީ، އުތުރާއި،މެދު ރާއްޖެތެރޭގެ އަތޮޅުތަކަށެވެ. ބޯކޮށް ވާރޭވެހުމާއެކެ ގުގުރާނެކަމަށް ލަފާކޮށް ހުދު ސަމާލު ނެރުނީ، ހއ އަތޮޅުން ފެށިގެން ލ އަތޮޅާ ހަމަޔަށް ރޭ 12:30 ގައެވެ. އެ ސަމާލުގެ ވަގުތު ހެނދުނު 06:30އަށް ހަމަވުމާއެކު އެންމެ އުތުރުގެ 4 އަތޮޅަށް ސަމާލު އުވާލައި، ދެން ހުރި އަތޮޅުތަކަށް މެންދުރު 12:30 އާ ހަމަޔަށް ސަމާލު ދަންމާލި އެވެ.
މިހާރު މެޓް އޮފީހުން ވަނީ ގއ އަދި ގދ އަތޮޅަށް ހުދު ސަމާލު ނެރެފަ އެވެ. އެ ދެއަތޮޅަށްވެސް 06:30 އިން ފެށިގެން މެންދުރު 12:30 އާ ހަމަޔަށް ހުދު ސަމާލު ނެރެފައިވަނީ ބޯކޮށް ވާރޭވެހި ގުގުރާނެކަމަށް ލަފާކޮށްނެވެ.
މެޓް އޮފީހުން ބުނީ ވިއްސާރަވިނަމަވެސް ކަނޑުތައް އާދައިގެ ވަރަކަށް މަޑުވާނެކަމަށާއި ވިލާގަނޑުގައި އާދައިގެ ވަރަކަށް ގަދަވާނެކަމަށެވެ. ވައިޖެހޭނެކަމަށް ލަފާކޮށްފައިވަނީ، ހުޅަނގުދެކުނާއި ހުޅަގުން ގަޑިއަކު 05 މޭލާއި 15 މޭލާ ދެމެދުގެ ބާރުމިނުގައެވެ. އަދި، ވިލާގަނޑުގައި ގަޑިއަކު ގާތްގަޑަކަށް 30 މޭލަށް ވައިގަދަވުން އެކަށީގެންވާކަމަށް މެޓް އޮފީހުން ބުނެފައި ވެއެވެ.