ދިވެހިރާއްޖޭގެ ޤައުމީ ޔުނިވަރސިޓީގެ ކޮލެޖް އޮފް ފިޝަރީޒް އެންޑް އޯޝަން ސައިންސަސްގެ ޑީންއަކަށް ޑރ. އަހްމަދު ރިޔާޒު ޖައުހަރީ އައްޔަން ކުރައްވައިފި އެވެ.
މެރިން އިކޮލޮޖީގެ ދާއިރާއިން މަތީ ތައުލީމް ހާސިލުކުރައްވާފައިވާ، ޑރ. ރިޔާޒު ފިޝަރީޒް ކޮލެޖްގެ ޑީންއަކަށް ހަމަޖެއްސެވީ އިއްޔެގެ އެމްއެންޔޫގައި ބޭއްވެވި ޚާއްސަ ރަސްމިއްޔާތެއްގަ އެވެ.
ޑީންކަމުގެ މަގާމާއި ހަވާލުވެވަޑައިގެންނެވުމަށް ފަހު ޑރ. ރިޔާޒު ދެއްކެވި ވާހަކަފުޅުގައި، ފިޝަރީޒް ކޮލެޖަކީ ހަމައެކަނި މަސްވެރިކަމާބެހޭ ތައުލީމު އުގަންނައިދޭ މުއަސަސާއެއް ނޫން ކަން ބަޔާން ކުަރައްވައ،ި އެތަން ވެގެންދާނީ މާހައުލީ ނިޒާމްތައް ދެނެގަނެ އެކަންކަން އަންނަން އޮތް ޖީލުތަކަށް ވާސިލު ކޮށްދޭނެ މުހިންމު ބިންގަލެއްގެ ގޮތުގައި ފާހަގަ ކުރެއްވި އެވެ. އަދި، އެ ކޮލެޖުން ފޯރުކޮށްދޭ ތަޢުލީމު ވެގެން ދާނީ މަސްވެރިކަމާއި ކަނޑުގެ ވަޞީލަތްތަކުގެ ނަފާ އެންމެ ފުރިހަމައަށް ހޯދުމަށް މަގުފަހިކޮށްދޭ ޢިލްމަށް ކަމަށާއި، އެ ކޮލެޖުގެ ދަރިވަރުން ވެގެންދާނީ ދިރާސާތަކުގެ އަލީގައި އުގެނި ރާއްޖޭގެ މެރިން ސައެންސްގެ ދާއިރާގެ އިސްސަފުގައި މަސައްކަތްކުރާނެ ބަޔަކަށް ކަމަށްވެސް ވިދާޅުވި އެވެ.
ރާއްޖޭގައި ފުރަތަމަ ފަހަރަށް ފިޝަރީޒް ކޮލެޖެއް ޤާއިމުކުރެއްވުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނު ކުރެއްވީ މިދިޔަ އަހަރު ފާހަގަކުރި، ދިވެހިރާއްޖޭގެ 43 ވަނަ މަސްވެރިންގެ ދުވަހުގެ މުނާސަބަތުގައި ބޭއްވި ޖަލްސާގައި ދެއްކެވި ވާހަކަފުޅުގަ އެވެ. އަދި ފިޝަރީޒް ކޮލެޖް ގާއިމުކުރުމުގެ އެއްބަސްވުމަކަށް އެމްއެންޔޫއާއި ފިޝަރީޒް މިނިސްޓްރީއާ މެދު ފަހުމުނާމާއެއްގައި ސޮއިކޮށްފައިވަނީ މިދިޔަ އަހަރުގެ ޑިސެންބަރުމަހުގެ 27 ވަނަ ދުވަހު އެވެ.
އެމްއެންޔޫއިން މިހާރު ވަނީ މިއަހަރު އެކޮލެޖު ހިންގުމަށް ހަމަޖެހިފައިވާ 4 ކޯހެއް އިއުލާނުކޮށްފަ އެވެ. މާދަމާގެ ނިޔަލަށް އެކޯސްތަކަށް ކުރިމަތިލުމުގެ ފުރުސަތު ހަމަވާނެއެވެ. އެ ކޯސްތަކުގެތެރޭގައި، ނޭޝަނަލް ސެޓްފިކެޓް 3 އިން ސްޕޯޓްސް ފިޝިންގ ގައިޑިންގ އަދި ފިޝް ޕްރޮސެސިންގ އެންޑް ކޮލިޓީ ކޮންޓްރޯލްގެ ނޭޝަނަލް ލެވެލްގެ 3 ކޯހެއް ހިމެނެއެވެ.
މިވަގުތު ސެޓިފިކެޓް ކޯސްތަކެއް ފެށިނަމަވެސް ކުރިޔަށް އޮތް ތާނގައި އެކޮލެޖުން މަސްވެރިކަމާ ގުޅުން ހުރި މަތީ ޕޯސްޓް ގްރެޖުއޭޓް ކޯސްތައް ހިންގަން ވަނީ ނިންމާފައެވެ.