ޅ. ނައިފަރު މަސްވެރިން، މަސްވެރިކަމާއި ބެހޭ ވަޒީރު އަހްމަދު ޝިޔާމް އަރިހުން، މަސްވެރިންނަށް ލިބޭ ތެލުގެ އަގު މިހާރަށްވުރެ ކުޑަ އަގެއްގައި ލިބޭނެ އިންތިޒާމު ހަމަޖައްސަވައި ދިނުމަށް އެދިއްޖެއެވެ.
ނައިފަރު މަސްވެރިން ވަޒީރުގެ ކިބައިން މިފަދައިން އެދުނީ، ވަޒީރު މިހާރު ނައިފަރަށް ކުރައްވަމުން ގެންދަވާ ދަތުރުފުޅުގައި މިއަދު ހެނދުނު އެރަށު މަސްވެރިންނާއެކު ވަޒީރު ބޭއްވެވި ބައްދަލުވުމެއްގަ އެވެ.
ނައިފަރު ކައުންސިލް އިދާރާގައި ބޭއްވެވި އެ ބައްދަލުވުމުގައި ވަޒީރުު ވަނީ، މަސްދޯނިފަހަރުގައި އާރްއެސްޑަބްލިއު އެޅުމަށް އެސްޑީއެފްސީ މެދުވެރިކޮށް ދޫކުރާ ލޯނާއި، މަސްވެރިންގެ ގައުމީ ދަފްތަރާއި، މަސްވެރި ވުޒާރާއިން ކުރިއަށްގެންދާ އެހެނިހެން މަޝްރޫއުތަކާ ގުޅޭ މައުލޫމާތު މަސްވެރިންނާ ހިއްސާ ކުރައްވާފަ އެވެ.
މިނިސްޓަރުގެ ވާހަކަފުޅުގައި، މަސްވެރިންގެ ދަފްތަރުގެ ފައިދާތަކުގެ މަޢުލޫމާތުވެސް ހިއްސާކުރެއްވި އެވެ. އަދި، މި ދަފްތަރަކީ ރައީސް ޑރ. މުޙައްމަދު މުޢިއްޒު އިޢުލާނުކުރައްވާފައިވާ، މަސްވެރިންނަކީ ދައުލަތް ބަލައިގަންނަ ބަޔަކަށް ހެދުމުގެ ވަޢުދެއްކަން ވަޒީރު ފާހަގަކުރެއްވި އެވެ.
ބައްދަލުވުމުގައި މަސްވެރިން އެދުނީ މަސްވެރިންނަށް ލިބޭ ތެލުގެ އަގު މިހާރަށްވުރެ ކުޑަކޮށްދިނުމަށް މަސައްކަތްކޮށްދެއްވުމަށެވެ. މީގެ އިތުރުންވެސް މަސްވެރިކަމުގައި ދިމާވާ އެހެނިހެން ދަތިތައް މަސްވެރިން ވަޒީރާ ހިއްސާކުރި އެވެ.