ކޮލަމްބޯ ސެކިއުރީޓީ ކޮންކްލޭވް (ސީ.އެސް.ސީ)ގެ މެންބަރު ޤައުމުތަކުން ސީއެސްސީ ޗާޓަރު ފައިނަލްކޮށް، އެ ގްރޫޕްގެ ދާއިމީ ސެކްރެޓޭރިއެޓް ޤާއިމުކުރުމުގެ ފަހުމުނާމާގައި އިއްޔެ ސޮއިކޮށްފި އެވެ.
ސޮއިކުރުމުގެ ރަސްމިއްޔާތު އިންތިޒާމުކޮށްފައި ވަނީ ސްރީލަންކާގެ ސަރުކާރުގެ ފަރާތުން އެޤައުމުގެ ކޮލަމްބޯ ސިޓީގައެވެ.
މެންބަރު ޤައުމުތަކުގެ ފަރާތުން މި ފަހުމުނާމާގައި ސޮއިކުރެއްވީ ރާއްޖޭގެ ނޭޝަނަލް ސެކިއުރިޓީ އެޑްވައިޒަރ އިބްރާހީމް ލަޠީފާއި، އިންޑިއާގެ ބޮޑުވަޒީރުގެ ނެޝަނަލް ސެކިއުރިޓީ އެޑްވައިޒަރ އަޖިތު ދޯވަލް ކޭ.ސީއާއި، މޮރިޝަސް އިން ސްރީލަންކާއަށް ކަނޑައަޅުއްވާފައި ހުންނަވާ ހައިކޮމިޝަނަރު ހޭމަންޑޯޔަލް ދިލުމް އަދި ސްރީލަންކާގެ ރައީސްގެ ނޭޝަނަލް ސެކިއުރީޓީ އެޑްވައިޒަރު ސަގަލަ ރަޓްނަޔަކަ އެވެ. ބަންގްލަދޭޝްއިން ފަހުމުނާމާގައި ސޮއިކޮށްފައެއް ނުވެއެވެ. މުރާސިލުން ބުނާގޮތުގައި، އެގައުމަށް ސޮއި ނުކުރެވުނީ މިހާރު އެގައުމުގެ ސިޔާސީ މަސްރަހް އޮތް ގޮތުންނެވެ.
ކޮލަމްބޯ ސެކިއުރިޓީ ކޮންކްލޭވްގެ ފައުންޑިން ޑޮކިއުމެންޓުގައި ސޮއިކުރުމުގެ ހަރަކާތް ނިންމާލާފައި ވަނީ ކޮންކްލޭވްގެ ކުރިއަށް ހުރި މަސައްކަތްތަކާއި، ކުރިއަށް އޮތްތަނުގައި ކުރެވިދާނެ ކަންކަމާ ބެހޭގޮތުން ވަފުދުގެ އިސްވެރިންގެ މެދުގައި މަޝްވަރާކުރެއްވުމަށް ފަހުގަ އެވެ.
އިންޑިއާ ކަނޑުގެ ތިން ގައުމުގެ މެދުގައި ކަނޑުގެ ކަންކަމާއި ސަލާމަތީ ކަންކަމުގައި ގާތުން އެއްބާރުލުން ދިނުމަށް އިންޑިއާ، ރާއްޖެ އަދި މޯލްޑިވްސްގެ ޓްރައިލެޓަރަލް ގްރޫޕެއްގެ ގޮތުގައި ސީއެސްސީ ފެށީ 2020 ވަނަ އަހަރު އެވެ. ފަހުން އެ ގްރޫޕް ފުޅާކުރީ މޮރިޝަސް އާއި ބަންގްލަދޭޝް މެމްބަރުންގެ ގޮތުގައި ހަމަޖައްސައި، އޮބްޒާވަރެއްގެ ދަރަޖަ ސީޝެލްސް އަށް ދީގެންނެވެ.
ސީއެސްސީގެ އަސާސީ މަޤްޞަދަކީ ބައިނަލްއަޤްވާމީ ގޮތެއްގައި މެންބަރު ޤައުމުތަކަށް ކުރިމަތިވާ ނުރައްކާތަކާއި ގޮންޖެހުންތަކަށް ހައްލު ހޯދައިދީ ސަރަޙައްދީ ސަލާމަތާއި ރައްކާތެރިކަން އިތުރުކުރުމެވެ.
ސީއެސްސީގެ ދަށުން މެންބަރު ޤައުމުތަކުން އެއްބާރުލުންދޭ މައިގަނޑު 5 ކަމެއް އޮވެއެވެ. އެ ފަސް ކަމަކީ ކަނޑުމަތީގެ ސަލާމަތާއި ރައްކާތެރިކަން ކަށަވަރުކުރުން، ޓެރަރިޒަމާއި ހަރުކަށި ފިކުރާ ދެކޮޅަށް މަސައްކަތް ކުރުން، ޓްރެފިކިން އަދި ޤައުމުތަކުގެ ބޯޑަރުތައް ހުރަސްކޮށް ރާވައިގެން ހިންގާ ކުށްތައް ހުއްޓުވުން، ސައިބަރ ސެކިއުރިޓީއާއި އުމްރާނީ ވަސީލަތްތަކުގެ ރައްކާތެރިކަން ކަށަވަރުކުރުމަށް މަސައްކަތް ކުރުން އަދި އިންސާނީ އެހީތެރިކަމާއި ކާރިސާތަކާ ގުޅިގެން އެހީތެރިވެދިނުމެވެ.