މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އަށް މަސްވިއްކާ އޮޑިފަހަރަށް ކްރެޑިޓަށް އައިސް ދޫކުރަން އެކުންފުނިން ހުޅުވާލި ފުރުސަތުގައި މިހާތަނަށްް ފަސް ދޯންޏަކުން އައިސް ނަގައިފި އެވެ.
މިފްކޯއަށް މަސް ކިރާ އޮޑި ފަހަރަށް 10 ކިލޯއާ ހަމަޔަށް އެކި ފަހަރުމަތިން އައިސް ކްރެޑިޓަށް ދޫކުރުމަށް އެކުފުންފުނިން ނިންމީ މިދިޔަ ބުރާސްފަތި ދުވަހު އެވެ.
މިފްކޯގެ ފެސިލިޓީތަކުން މިއަދު ހެނދުނު އައިސް ދޫކުރަން ތައްޔާރުވެފައިވާއިރު، މިއަދުގެ މިހާތަނަށް 5 ދޯންޏަކުން 21 ޓަނުގެ އައިސް ނަގާފައިވާކަމަށް މިފްކޯއިން ދެންމެ ބުންޏެވެ. މި ދޯނިތަކުން އައިސް ނަގާފައިވަނީ ޅ. ފެލިވަރުންނެވެ. މިވަގުތުވެސް އިތުރު އެއް ދޯނި އައިސް ނަގަމުންދާކަމަށް މިފްކޯއިން ބުންޏެވެ.
އައްޑޫ ފިޝަރީޒް ކޮމްޕްލެކްސް އިން އަދި މިހާތަނަށް އައިސް ނަގާފައި ނުވެއެވެ. މިފްކޯއިން ބުނީ، އެއީ އެ ސަރަހައްދުގެ ގިނަ ދޯނިތަކުގައި އާރްއެސްޑަބްލިއު ޕްލާންޓް ހުންނާތީކަމަށެވެ. ކޫއްޑޫއިންވެސް އަދި އެއްވެސް ދޯންނަކުން އައިސް ނަގާފައެއް ނުވެއެވެ.އެއީ ކޮންސަބަބަކާހުރެކަމެއް އަދިސާފެއްނުވެއެވެ.
މިފްކޯއިން މަސްވެރިންނަށް ކްރެޑިޓަށް އައިސް ދޫކުރަން މި ފެށީ މަސްވެރިން މަހަށް ފުރުވުމަށް ހޮތްވަރު ދިނުމުގެ ގޮތުންނެވެ. މިމަހުގެ 22 ވަނަ ދުވަހު ހިލޭވެސް މިފްކޯއިން އޮޑިއަކަށް ތިން ޓަނުގެ މަގުން ހިލޭ އައިސް ދޫކޮށްފައި ވެއެވެ. މިފްކޯއިން މަސްވެރިންނަށް އަމާޒުކޮށް މިފަދަ ކަންކަން ކުރަމުން މިދަނީ މިފްކޯއަށް ބޭނުންވާ ވަރަށް މި ދުވަސްވަރު މަސް ނުލިބޭތީއެވެ. މަސްވެރިން ބުނަނީ މިފްކޯގެ އަގު ދަށްކަމުން ޕްރައިވެޓް ކުންފުނިތަކަށް މިހާރު މަސްކިރަން ބޭނުންވާކަމަށެވެ. އެއީ، އެކުންފުނިތަކުން މިފްކޯއަށްވުރެ ރަނގަޅު އަގު ލިބޭތީއެވެ.