މަސްވެރިންގެ ގައުމީ ދަފްތަރު އިފްތިތާހުކޮށް ދަފްތަރުގައި ރަޖިސްޓްރީވުމުގެ ފުރުސަތު ހުޅުވާލާފައިވަނީ މިއަހަރުގެ ބްރުއަރީ މަހުގެ 16 ވަނަ ދުވަހުއެވެ. ސަރުކާރުގެ ހަފުތާ-14 މަގުޗާޓުގައި ހިމަނައިގެން ކުރިޔަށްގެންދާ މި މަސައްކަތުގެ މައިގަނޑު އަމާޒަކީ، މިއަދާ ހިސާބަށް އާއިރު މަސްވެރިންނަކީ ދައުލަތް ދަންނަ ބަޔަކަށް ނުވާތީ މަސްވެރިންނަކީ ދައުލަތް ދަންނަ ބަޔަކަށް ހެދުމަށެވެ. ދަފްތަރާ ގުޅޭގޮތުން މީގެ ކުރިން ފިޝަރީޒް މިނިސްޓަރު އަހްމަދު ޝިޔާމް ވިދާޅުވެފައިވަނީ، ދަފްތަރެއް ނެތުމުން މަސްވެރިންނަށް ބޭންކްތަކުން ދޫކުރާ ފެސިލިޓިސްތަކަށް އެކްސެސެނުވުމާއި ސަރުކާރުގެ މުވައްސަސާތަކާއި ކުންފުނިތަކުން ދޭ ޚިދުމަތްތައް މަސްވެރިންނަށް މިހާރު ނުލިބޭކަމަށެވެ. އަދި، ދަފްތަރު ފުރިހަމަ ވެގެން ދިއުމާއެކު އެކަންކަމަށް ހައްލުލިބި މަސްވެރިންނަކީ ދައުލަތް ދަންނަ ވަޒިފާ އަދާކުރާ ބަޔަކަށް ވެގެންދާނެކަމަށް މިނިސްޓަރު ވިދާޅުވެފައި ވެއެވެ.
މަސްވެރިންގެ ފުރިހަމަ ގައުމީ ދަފްތަރެއް އެކުލަވާލުމުގެ މަސައްކަތް ފިޝަރީޒް މިނިސްޓްރީން ދަނީ ކުރަމުންނެވެ. އެކަމަށް ޚާއްސަ ޓީމެއް އުފައްދާފައިވާއިރު، މިޓީމު މަސައްކަތް ކުރަމުން ދަނީ ރާއްޖެ 6 ޒޯނަކަށް ބަހައިލައިގެންނެވެ. އަދި ކޮންމެ ޒޯނަކަށް ކޯޑިނޭޓަރެއް ކަނޑައަޅައި، އެ ޒޯނަކަށް ނިސްބަތްވާ ސިޔާސީ ބޭފުޅުން ހިމެނޭ ޓީމެއް ނަގައި މިހާރު ވަނީ މަސައްކަތް ފަށާފަ އެވެ.
މަސްވެރިން ދަފުތަރުގެ މަސައްކަތް ކުރިއަށް ގެންދަނީ މަސްވެރިކަމާބެހޭ ވަޒީރު އަޙްމަދު ޝިޔާމްގެ ބެއްލެވުމުގެ ދަށުންނެވެ. މި މަސައްކަތުގައި ވުޒާރާގެ ޓެކްނިކަލް ޓީމު ވެސް ބައިވެރިވެއެވެ. ޒޯން ޓީމުތަކުން ދޯނިތަކަށް ގުޅައި މަޢުލޫމާތު ފޯރުކޮށްދެމުން އަންނައިރު، އޮޑިވެރިންނާއި ކެޔޮޅުންނަށް ގުޅުމާއި ބައްދަލުކޮށް ދަފުތަރުގެ މަޢުލޫމާތު ދިނުމަށް ކައުންސިލް ފޯކަލް ޕޮއިންޓްތަކުންވެސް ވެސް ދަނީ އެހީތެރިވަމުންނެވެ. މި މަސައްކަތްތަކުގައި އޮޑިވެރިންނާއި ކައުންސިލުތަކުން ވަރަށް ބޮޑު އެއްބާރުލުމެއް ދެމުން އަންނަކަން މިނިސްޓްރީން ފާހަގަކޮށްފައި ވެއެވެ.
ސަރުކާރުގެ ސިޔާސަތަކީ، މަސްވެރިންނަކީ ދައުލަތުގެ މުއައްސަސާއެއްގައި ދަފުތަރުވެފައި ތިބި ބަޔަކަށް ހެދުންކަމަށްވާއިރު، ދަފުތަރުގެ މަސައްކަތް ނިމޭއިރު، ރާއްޖޭގައި މަހަށް ދުއްވާ ހުރިހާ ދޯންޏަކާއި، ކެޔޮޅުންނާއި އަދި ފަޅުވެރިންގެ ރަސްމީ މަޢުލޫމާތު ވުޒާރާގެ ޑޭޓާބޭސްގައި ރައްކާކުރެވި ބެލެހެއްޓިގެން ދާނެކަމަށް ފިޝަރީޒް މިނިސްޓްރީން ބުނެފައި ވެއެވެ. އަދި، މަސްވެރިންގެ ދަފްތަރު އެކުލަވާލާއިރު، އޭގައި ހިމަނާނީ ހަމައެކަނި ކަޅުބިލަމަހާއި ކަންނެލި މަސްވެރިން ނޫންކަމަށާއި، މަސްވެރިކަމުގެ ސިނާއަތުގައި އެހެން ބާވަތްތަކުގެ މަސްވެރިކަން ކުރާ ފަރާތްތައްވެސް މި ދަފްތަރުގައި ހިމަނާނެކަމަށް މިނިސްޓްރީން ބުނެފައި ވެއެވެ.
މަސްވެރިންގެ ގައުމީ ދަފްތަރު ފުރިހަމަވެގެން ދިއުމާއެކު، މަސްވެރިންނަށް ވަރަށް ބޮޑު ލުއިތަކެއް ލިބިގެންދާނެއެވެ. ވަކިން ޚާއްސަކޮށް މަސްވެރިންނަށް ދައުލަތުން ފޯރުކޮށްދޭންޖެެހޭ ޚިދުމަތްތައް ދިނުމުގައި ލުއި ފަސޭހަތަކެއް ލިބި، މަސްވެރިންނަށް އެޚިދުމަތްތައް ހޯދުމަށް މަގުކޮށިގެން ދާނެއެވެ.