އިންޑިއާ ކަނޑުގެ އައްސޭރިފަށުގެ ގައުމުތައް ގުޅިގެން އެކުލަވާލާފައިވާ ”ޖީ 16 – ގްރޫޕް އޮފް ލައިކް މައިންޑަޑް ކޯސްޓަލް ސްޓޭޓްސް“ ގެ 36 ވަނަ ބައްދަލުވުން ރާއްޖޭގައި ފަށައިފި އެވެ.
މި ބައްދަލުވުމަކީ، އިންޑިއާ ކަނޑުން އެކި ޤައުމުތަކަށް ކަނޑުމަސް ބޭނޭނެ މަތީ މިންވަރު ކަނޑައެޅުމާއި ބެހޭ ގޮތުން އިންޑިއަން އޯޝަން ޓޫނާ ކޮމިޝަން (އައި.އޯ.ޓީ.ސީ) އަށް ހުށަހަޅާފައިވާ ގަރާރާމެދު މެންބަރު ގައުމުތަކުގެ މެދުގައި މަޝްވަރާކޮށް، އެއްބަސްވުމަކަށް އައުމުގެ މަގުސަދުގައި ބާއްވާ ބައްދަލުވުމެކެވެ. މި ބައްދަލުވުމުގައި މި ގަރާރާމެދު އެއްބަސްވުމަކަށް އާދެވިއްޖެނަމަ، އަންނަ އަހަރުގެ އައި.އޯ.ޓީ.ސީގެ އަހަރީ ބައްދަލުވުމުގައި މި ގަރާރު ފާސްކުރުމަށް ހުށަހަޅާނެއެވެ.
މި ބައްދަލުވުން އިފްތިތާހުކޮށްދެއްވީ ފިޝަރީޒް މިނިސްޓަރު އަހްމަދު ޝިޔާމެވެ. އެމަނިކުފާނުގެ އިފްތިތާހީ ބަޔާނުގައި، އިންޑިއާ ކަނޑުގެ ކަނޑުމަހުގެ މަސްވެރިކަމަށް އެންމެ ބޮޑަށް ބަރޯސާވެފައިވާ އެއް ޤައުމަކަށް ދިވެހިރާއްޖެ ވާއިރު، ކޮންމެ ޤައުމަކަށް ބޭނޭނެ އެންމެ މަތީ މިންވަރު ކަނޑައެޅުމުގައި ދިވެހިރާއްޖޭގެ އިޤުތިޞާދަށާއި، މަސްވެރިކަމުން ވަޒީފާގެ ފުރުޞަތުތައް ހުރި މިންވަރަށާއި، މަސްވެރި އާއިލާތަކަށް ކުރާ އަސަރު ވީހާވެސް ކުޑަވާނެ ގޮތަކަށް މިކަމުގެ މަޝްވަރާތައް ކުރިއަށް ގެންދިއުމުގެ މުހިންމުކަން ފާހަގަކުރެއްވި އެވެ.
ދެދުވަހުގެ މި ބައްދަލުވުމުގައި ދިވެހިރާއްޖޭގެ އިތުރުން އޮސްޓްރޭލިއާ، ބަންގްލަދޭޝް، ކޮމޮރޮސް، އީރާން، ކެންޔާ، މެލޭޝިއާ، މޮޒަމްބީކް، ސްރީ ލަންކާ، ސައުތް އެފްރިކާ، ޓެންޒޭނިއާ އަދި ތައިލެންޑް ގެ މަސްވެރިކަމާބެހޭ ވުޒާރާގެ ފަރާތުން ބައިވެރިވެއެވެ. އަދި އޮބްޒާވަރުންގެ ގޮތުގައި ވަރލްޑް ވައިޑް ފަންޑް ފޮރ ނޭޗަރ (ޑަބްލިއު.ޑަބްލިއު.އެފް)، ސަސްޓެއިނަބްލް ފިޝަރީޒް އެންޑް ކޮމިއުނިޓީސް ޓްރަސްޓް (އެސްފެކްޓް) އަދި ސައުތް ވެސްޓް އިންޑިއަން އޯޝަން ޓޫނާގެ މަންދޫބުން ބައިވެރިވަޑައިގަންނަވަ އެވެ.
ޖީ-16 އަކީ އައި.އޯ.ޓީ.ސީގެ މެންބަރު ގައުމުތަކުގެ ތެރެއިން ހިޔާލު އެއްގޮތް އައްސޭރިފަށުގެ ގައުމުތައް ގުޅިގެން، މަސައްކަތްކުރުމަށް އެކުލަވާލައިފާ ގްރޫޕެކެވެ. މި ގްރޫޕްގެ މައިގަނޑު މަޤްސަދަކީ އިންޑިއާ ކަނޑުގައި ކުރެވޭ ކަނޑުމަހުގެ މަސްވެރިކަން މެނޭޖްކުރުމަށްޓަކައި އައި.އޯ.ޓީ.ސީ މެދުވެރިކޮށް ކުރާ މަސައްކަތްތައް ރާވައި، ހިންގުމުގައި އައްސޭރިފަށުގެ ގައުމުތަކުގެ މެދުގައި ވިލަރެސްކޮށް، ވީހާވެސް ގިނަ ގައުމުތަކުގެ ބައިވެރިވުމާއެކު ކަންކަން ނިންމުމެވެ.
އިންޑިއާ ކަނޑުގެ ކަނޑުމަހާއި ކަނޑުމަހުގެ ބާވަތްތައް ދެމެހެއްޓެނެވި ގޮތެއްގައި ބެލެހެއްޓުމަށް އައި.އޯ.ޓީ.ސީގެ މެންބަރު ޤައުމުތަކުގެ މެދުގައި އިންޑިއާ ކަނޑުގެ ކަނޑުމަހުގެ މަސްވެރިކަމުގައި މަސް ބޭނޭނެ މިންވަރުތަކެއް ކަނޑައުޅުމަށް އަލޮކޭޝަން ރެޖީމެއް ކަނޑައެޅުމަށް މަޝްވަރާކުރާތާ މިހާރު ވަނީ 14 އަހަރުވަނީ ވެފައެވެ.