ލޭނު މަސްވެރިކަމަށް ހުއްދަ ނުދޭން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވީ އެކަމުން ސަރުކާރުން ލިބެން އޮތް ނަފާއަށްވުރެ، މަސްވެރިކަމުގެ ސިނާއަތުގައި ހަރަކާތްތެރިވާ ބައެއް ފަރާތްތަކަށް ހުރި ދަތިތަކާއި ކަންބޮޑުވުންތައް އިސްކުރައްވައިގެން ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ރާއްޖޭގައި ލޭނު އަޅައިގެން މަސްވެރިކަން ކުރުމަށް ހުޅުވައިލަން، ވަޒީރުންގެ މަޖިލީހުން ނިންމެވީ، މިއަހަރުގެ ޖޫންމަހުގެ 13 ވަނަ ދުވަހު އެވެ. އެކަން ތަންފީޒުކުުރުމަށް ފިޝަރީޒް މިނިސްޓްރީން އެކަމަށް ގަވައިދެއް އެކުލަވާލައި އޭގެ ދެލިކޮޕީ އާންމުކުރި އެވެ. އަދި، މިއަދާ ހަމަޔަށްވެސް މިނިސްޓްރީން ދިޔައީ އެކަމަށް ތައްޔާރުވަމުންނެވެ. މަސްވެރިކަމުގެ ސިނާއަތުގެ ގިނަ ބަޔަކު އެކަމާއި ކަންބޮޑުވުން ފާޅުކުރަމުންދިޔައިރުވެސް، މިނިސްޓަރު ޝިޔާމް ގެންދެވީ، އެއީ މަސްވެރިކަމުގެ ސިނާއަތް ސިންދަފާތުކޮށް، ކަނޑު ރޯދިން ލިބޭ ނަފާ އިތުރު ކުރުމަށް ސަރުކާރުން އެޅި މުހިންމު ފިޔަވަޅެއް ކަމަށް ވިދާޅުވަމުންނެވެ. އަދި، އަންނަ ފެބްރުއަރީ މަހު ލޭނު މަސްވެރިކަމަށް ހުޅުވާލުމަށް ތައްޔާރުވަމުންދާކަންވެސް ގެންދެވީ ހާމަކުރައްވަމުންނެވެ.
ލޭނު މަސްވެރިކަމާ ދެކޮޅު ކެމްޕޭނެއް ފަށައި، މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއި، ކަނޑުގެ ދިރުންތައް ހިމާޔަތްކުރާ ފަރާތްތަކުން މެދު ނުކެނޑި އަޑު އުފުލަމުންދިޔައިރު، ސަރުކާރުގެ ބޭފުޅުންނާއި، ވެރިކަންކުރާ ޕާޓީގެ ބޭފުޅުން ގެންދެވީ ލޭނު މަސްވެރިކަން ޕްރޮމޯޓްކުރަމުންނެވެ. އަދި ސޯޝަލް މީޑިއާގައި އެކަމާ ދެކޮޅަށް ވަކާލާތުކުރެއްވި ބޭފުޅުންނަށް ވެރިކަން ކުރާ ކޯލިޝަންގެ އެކްޓިވިސްޓުން ގެންދިޔައީ ގޮންޖަހައި މައްލަވަކުރަމުންނެވެ.
ލޭނު މަސްވެރިކަމާއި ދެކޮޅަށް މަސައްކަތް ކުރާ ފަރާތްތަކުން މުޒާހަރާއަށް ނިކުންނަން ތައްޔާރުވަމުންދަނިކޮށް މިއަދު ރައީސުލްޖުމްހޫރިއްޔާގެ އޮފީހުން ބުނީ، ރާއްޖޭގައި ލޭނު އަޅައިގެން މަސްވެރިކަން ކުރުމަށް ހުޅުވައިލަން، ވަޒީރުންގެ މަޖިލީހުން ފާސްކުރެއްވުމާއި ގުޅިގެން ކަންބޮޑުވުން ފާޅުކޮށް، ’ބޮޑު ކަންނެލި މަސްވެރީންގެ ޔޫނިއަން’ގެ ފަރާތުން ރައީސުލްޖުމްހޫރިއްޔާގެ އަރިހަށް ހުށަހެޅުއްވި ކަންތައްތަކަށް ރިޢާރަތްކުރައްވައި، ވަޒީރުން މަޖިލީހުގެ މި ނިންމެވުމަށް ޢަމަލު ނުކުރައްވާގޮތަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހަމަޖައްސަވާފައިވާކަމަށެވެ.
ރައީސްގެ މި ނިންމެވުމަށް އިޝާރާތްކުރައްވައި، ސޯޝަލް މީޑިއާގައި ހިއްސާކުރެއްވި މެސެޖެއްގައި ފިޝަރީޒް މިނިސްޓަރު ވިދާޅުވީ، މިއަދު ރައީސް އެ އިސްކުރެއްވީ ލޭނު މަސްވެރިކަމުން ސަރުކާރަށް ލިބެން އޮތް ނަފާއަށްވުރެ ބޮޑަށް، މަސްވެރިކަމުގެ ސިނާޢަތުގައި ޙަރަކާތްތެރިވާ ބައެއް ފަރާތްތަކަށް ހުރި ދަތިތަކާއި ކަންބޮޑުވުންތައްކަމަށެވެ. އަދި، ސަރުކާރުން މަސްވެރިންގެ އަޑުއަހާ މަސްވެރިންނަށް ފައިދާހުރި ގޮތަކަށް މި ސިނާޢަތް ބައްޓަންކުރުމަށް އަބަދުވެސް މަސައްކަތް ކުރާނެކަމަށް ވިދާޅުވެފައި ވެއެވެ.
”މިސިނާޢަތް އިތުރު ހަރުފަތަކަށް ގެންގޮސް ރައްޔިތުންނަށާ ޚާއްޞަކޮށް މަސްވެރި ޢާއިލާތަކަށް ކުރިމަތިވެފައިވާ ދަތިކަމުން އަރައިގަނެވޭނެ.“ މިނިސްޓަރު ޝިޔާމް ވިދާޅުވި އެވެ.
މަސްވެރިން މިއޮތްހާ ދުވަހު އާދޭސް ކުރި އިރު، މިނިސްޓަރު ޝިޔާމް ލޭނުމަސްވެރިކަމަށް ފާޅުގައި ތާއީދުކުރައްވާތަން ފެނުމުން މަސްވެރިން ތިބީ ވަރަށް މާޔޫސްވެފަ އެވެ. އެހެންނަމަވެސް މިއަދު ރައީސްގެ ނިންމެވުމާއި ގުޅިގެން މަސްވެރިން ތިބީ އުފަލުން ފޮޅިފަ އެވެ.