ސަރުކާރު މަސްކުންފުނި، މިފްކޯއިން އެކުންފުންޏަށް މަސްކިރަމުން އަންނަ އޮޑިފަހަރަށް 10 ކިލޯ އައިސް ކްރެޑިޓަށް ދޫކުރަން ނިންމައިފި އެވެ.
މިފްކޯއިން ބުނީ، ކްރެޑިޓަށް އައިސް ދޫކުރަން ނިންމީ މަހަށް ފުރަން މަސްވެރިންނަށް ހިތްވަރު ދިނުމުގެ ގޮތުންކަމަށެވެ. އެގޮތުން، އަންނަ ހޮނިހިރު ދުވަހުން ފެށިގެން، އައިސް ދޫކުރާނެކަމަށެވެ.
”މިފްކޯއަށް މަސްކިރާ ކޮންމެ ދޯންޏަކަށްވެސް އެކި ފަހަރު މަތިން 10 ޓަނާ ހަމައަށް ކްރެޑިޓަށް އައިސް ނޭގޭނެ.“ މިފްކޯއިން ބުންޏެވެ.
މަސްވެރިން މިފްކޯއަތުން ކްރެޑިޓަށް ނަގާ އައިސްއަށް ނަގުދު ފައިސާ ދައްކާކަށް ނުޖެހެއެވެ. އެއީ، ކްރެޑިޓަށް އައިސް ވިއްކާ އޮޑިފަހަރު މަސްކިރުމުން މިފްކޯއިން ބިލު ހަދާނީ، ކްރެޑިޓަށް އައިސް ގަތް ފައިސާ ބިލުން އުނިކުރުމަށްފަހުގައި ކަމަށްވާތީ އެވެ.
މިފްކޯއިން ވަނީ މިދިޔަ ބުރާސްފަތިދުވަހު މިފްކޯއަށް މަސްކިރާ އޮޑިފަހަރަށް ހިލޭ އައިސްވެސް ދޫކޮށްފަ އެވެ. އެ ދުވަހު 24 މަސް ދޯންޏަކަށް ޖުމްލަ 68 ޓަނު އައިސް ދޫކުރި އެވެ. މިއީވެސް މަސްވެރިން މަހަށްފުރަން ހިތްވަރުދިނުމުގެ ގޮތުން ކުރި ކަމެކެވެ.
މިފްކޯއިން މަސްވެރިންނަށް އަމާޒުކޮށް މިފަދަ ކަންކަން ކުރަމުން މިދަނީ މިހާރަކަށް އައިސް މަހަށް ފުރުމުގައި ބައެއް އޮޑިފަހަރުން ފަސް ޖެހޭތީއެވެ. ބައެއް އޮޑީފަހަރު މަހަށް ނުދަނީ ފަޅުވެރިން ފޭބުމާއި، އަދި މިިދިޔަ ދުވަސްތަކުގައި މަސް ނުބޭނޭތީ ދެކޮޅު ނުޖެހިގެންނެވެ. މިހާރު ވަނީ މޫސުން ރަނގަޅުވެ، މަސްވެރިކަން ރަނގަޅު އަތަށް ޖަހާފައެވެ.