ހޯރަފުށީގައި ހިންގި ނިޔަމި ކޯސް-2 40 ފަރަތާކުން ފުރިހަމަކޮށްފި އެވެ.
ހއ. ހޯރަފުށި ޕޮލިސް ސްޓޭޝަނާއި ކައުންސިލާއި ސެންޓަރ ފޯ މެރިޓައިމް ސްޓަޑީޒް އަދި ދިވެހިރާއްޖޭގެ ގައުމީ ޔުނިވަސިޓީ ގުޅިގެން ހޯރަފުށީގައި ނިޔަމި ކޯސް – 2 ކުރިއަށް ގެންދިޔައީ މިމަހުގެ 18 އިން 27 ގެ ނިޔަލަށެވެ.
މިކޯހުގައި ކިޔަވައިދެއްވީ، މެރިޓައިމް އިންސްޓިޓިއުޓްގެ މުދައްރިބުންނެވެ. މި ކޯހުގައި، ނެވިގޭޝަން، ކޮމިއުނިކޭޝަން، ކަނޑުމަތީގެ ސަލާމަތާއި ރައްކާތެރިކަން، ސިއްހީ ފުރަތަމައެހީ، ކަނޑު ދަތުރުފަތުރުކުރުމުގެ ގާނޫނާއި ގަވާއިދުތައް އަދި ޗާޓު ވޯކްސްގެ ބައިތައް އުނގަންނައިދީފައި ވެއެވެ.
މި ކޯހަކީ ކަނޑު އުޅަނދު ދުއްވާ މީހުންނަކީ ލައިސަންސް އޮވެގެން ގާނޫނާއި ގަވާއިދުތަކާ އެއްގޮތަށް ކަނޑު އުޅަނދު ފަހަރު އޮޕަރޭޓްކުރާ ބަޔަކަށް ހެދުމަށާއި ރަށުގައި ތިބެގެން މި ކޯސް ފުރިހަމަ ކުރުމުގެ ފުރުސަތު ފަހިކޮށްދިނުމުގެ ގޮތުން ހިންގި ކޯހެކެވެ.
ނިޔަމި ކަމުގެ ކޯހަކީ ކަނޑު އުޅަނދުގެ ލައިސަންސް ނެގުމުގެ ކުރިން ފުރިހަމަ ކުރަންޖެހޭ ކޯހެކެވެ. މި ކޯސް ފުރިހަމަ ކުރުމުން ލައިސަންސް ނެގުމުގެ މަގު ފަހިވެގެން ދާނެއެވެ.