ކަނޑުތައް ހިމާޔަތްކުރުމަށާއި، ދެމެހެއްޓެނިވި ގޮތްތައް ކުރިއެރުވުމަށް މަސައްކަތް ކުރައްވާނެކަމަށް، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އަނބިކަނބަލުން މިހެން ވިދާޅުވެފައި ވަނީ ”އޭ.އެސް.އެފް އޭސިއަން ސާރފިން ޗެންޕިއަންޝިޕް 2024“ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
އެކަމަނާގެ ވާހަކަފުޅުގައި، އަންނަން އޮތް ޖީލުތަކުގެ ރާޅާ އެޅުންތެރިންނަށް ކަނޑުތަކުން އުފަލާ ހިތްހަމަޖެހުން ލިއްބައިދިނުމަށްޓަކައި ކަނޑުތައް ހިމާޔަތްކުރުމަށް މަސައްކަތްކުރުމުގެ މުހިންމުކަން ފާހަގަ ކުރެއްވި އެވެ. އަދި، މޫސުމަށް އަންނަ ބަދަލުތަކަކީ ދިރިއުޅުމަށް ކުރާ މަސައްކަތްތަކާއި ކަނޑުގެ ދިރުންތަކާއި އަދި ރާޅާއެޅުންފަދަ ކަންކަމަށް ވެސް އޮތް ނުރައްކަލެއްކަން ފާހަގަކުރައްވައި ކަނޑުތައް ހިމާޔަތްކުރުމަށާއި ޕްލާސްޓިކް ކުނި މަދުކުރުމަށާ އަދި ދެމެހެއްޓެނިވި ގޮތްތައް ކުރިއެރުވުމަށް މަސައްކަތް ކުރައްވާނެކަމުގައި ވިދާޅުވި އެވެ.
ވިހި ޤައުމަކުން ޖުމްލަ 113 އެތުލީޓުން ބައިވެރިވި މި އަހަރުގެ އޭސިއަން ސާފިންގ ޗެންޕިއަންޝިޕް ކުރިއަށް ގެންދިޔައީ ކ. ތުލުސްދޫގައެވެ. މިއީ ރާއްޖޭގައި އޭސިއަން ސާފިންގ ޗެންޕިއަންޝިޕް ބޭއްވި ދެވަނަ ފަހަރު ކަމުގައި ވީނަމަވެސް މިއީ މި މުބާރާތުގެ ކޮލިފިކޭޝަން ހަރަކާތެއް ރާއްޖޭގައި ބޭއްވި ފުރަތަމަ ފަހަރެވެ.