މިދިޔަ ހަފުތާތަކުގައި، މޫސުން ގޯސްވުމާއި، މަސްވެރިކަން ދައްކަމުން މަސް ލިބުމުގައި ދަތިތަކެއް ހުރި ނަމަވެސް، މިއަދު މަސް މޭރުކޭޓުގައި މަސްތިޔާގި އެވެ.
މާލެ ސަރަހައްދުންނާއި އެހެން އަތޮޅުތަކުގެ މަސްދޯނިވެސް މިއަދު މާލެ ބަނދަރަށް ލަފައި، މާލޭ މަސް މާރުކޭޓަށް މަސް ވިއްކާފައި ވެއެވެ. މަސް ދޯނިތަކުން މައުލޫމާތުދޭގޮތުގައި މިހާރު މަސްވެރިކަން ވަނީ ކޮންމެވެސް ވަރަކަށް ރަނގަޅުވެފަ އެވެ. އެހެންނަމަވެސް އަދިވެސް އެންވެރިކަން ދަށްކަަމަށް ކެޔޮޅުން ބުންޏެވެ.
މާލޭ މަސްމާރުކޭޓުން މިއަދު މަސް ވިއްކަންހުރި އަގުތަކަށްބަލާއިރު، އާދައިގެ ކަޅުބިލަމަސް ކިލޯއެއް ލިބެންހުރީ 35 ރުފިޔާއަށެވެ. އަދި 4-5ކިލޯއާ ދޭތެރޭ ބަރުދަނުގެ ކަންނެލި ވިއްކަމުންދަނީ ކިލޯއެއް 40 ރުފިޔާގެ މަގުންނެވެ. އަދި 6 ކިލޯއަށްވުރެ ބަރު ކަންނެލި ވިއްކަމުންދަނީ ކިލޯއެއް 45 ރުފިޔާގެ މަގުންނެވެ.
މާރުކޭޓް ގޮޅިތަކުގައި މަސް ވިއްކާ މީހުން ބުނީ، އަދިވެސް މިއަދު އޮޑިތައް ލަފާނެކަމަށް ބެލެވޭ ކަމަށާއި، މަސްލިބޭ މިންވަރު އިތުރުވާނަމަ، މިއަދު މަސް އަގު ދަށްވެގެންދާނެކަމަށެވެ.