މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)ގެ ޕްރޮޑަކްޝަން ފެސިލިޓީއެއްގެ ގޮތުގައި ހިންގަމުންދިޔަ ކ. ކަނޑުއޮތްގިރި ފިޝް ވިލެޖު މޯލްޑިވްސް ނެޝަނަލް ޑިފެންސް ފޯރސްއަށް (އެމްއެންޑީއެފް)އަށް ދިނުމަށް ކެބިނެޓުން ނިންމުމާ ގުޅިގެން، އެތަނުން ކުރަމުން އައި މަސައްކަތްތައް މިވަގުތަށް ޅ. ފެލިވަރަށް ބަދަލުކުރަން ނިންމާފައިވާ ކަމަށް މިފްކޯއިން ބުނެފި އެވެ.
މިފްކޯއިން ބުނީ، ކެބިނެޓްގެ ނިންމެވުމާއެކު މިފްކޯއިން އެމްއެންޑީއެފަށް ކަނޑުއޮތްގިރި ހަވާލުކޮށްފައިވާއިރު، އަންނަ ސެޕްޓެމްބަރު މަހުގެ 15 ގެ ކުރިން މުޅި ފެސިލިޓީ ބަދަލުކުރަންޖެހޭކަމަށެވެ. އަދި މިކަމާގުޅިގެން އެކުންފުނިން އެންމެ ބޮޑު އިސްކަމެއްދީގެން މިހާރު ކުރިއަށް ގެންދަނީ ފެލިވަރުގައި ލައިފްސްޓައިލް އަދި ކަންނެލި މަހުގެ އުފެއްދުންތައް ޕްރޮސެސްކުރެވޭނެ ގޮތް ހަމަޖެއްސުމުގެ މަސައްކަތްކަމަށެވެ އަދިި، ކަނޑުއޮތްގިރި ފެސިލިޓީގެ މަސައްކަތް މިވަގުތަށް މެދުކެނޑިފައިވީނަމަވެސް އެ މަސައްކަތް ފެލިވަރުގައި ކުރެވޭނެ އިންތިޒާމްތައް ހަމަޖައްސަމުން އަންނަ ކަމަށާއި އެކަމަށް ވަގުތުތަކެއް ނަގާނެކަމަށް މިފްކޯއިން ބުނެފައި ވެއެވެ.
”ކުއްލިއަކަށް ޕްރޮޑަކްޝަން ބަދަލުކުރުމަކީ އަޅުގަނޑުމެންނަށް އޮތް ވަރަށް ބޮޑު ޗެލެންޖެއް. އެހެން ނަމަވެސް ހުޅުމާލެއިން ރަނގަޅު ތަނެއް ހަމަޖެހެންދެން މިވަގުތަށް ފެލިވަރަށް ބަދަލުކުރަން އެބަޖެހޭ. އެކަމުގައިވެސް ހަރަދުތަކެއް ހިނގާނެ. ލައިފްސްޓައިލް އަދި ކަންނެލި މަހުގެ އުފެއްދުންތަކަށް އޮންނަ ޑިމާންޑު އެހާމެ ބޮޑުވެފަ މިއީވެސް އާންމުންގެ ޝަކުވާ އިންތިހާއަށް އޮންނާނެ ކަމެއް.“ މިފްކޯއިން ބުންޏެވެ.
މިފްކޯއިން ބުނީ، މިއީ ވަގުތީ ހައްލެއް ނަމަވެސް އެކުންފުނިން އަމާޒު ހިފާފައި ހުރީ، ލިބިފައި ހުރި އިންވެސްޓްމެންޓު ފުރުސަތުތަކުގެ ބޭނުން ހިފައި، ވީހާވެސް އަވަހަކަށް ހުޅުމާލެއިން އެމަސައްކަތް ކުރުމަށް އެކަށީގެންވާ ބިން ހޯދައިގެން ފުޅާދާއިރާއެއްގައި އެ ހިދުމަތްތައް އަލުން ދިނުމަށް ކަމަށެވެ.
ކަނޑުއޮތްގިރީގައި މިފްކޯއިން ކުރަމުންދިޔަ މަސައްކަތާއި އެކަށީގެންވާ ބިމެއް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ކަނޑައެޅުމުގެ މަސައްކަތް ކަމާބެހޭފަރާތްތަކާއި މަޝްވަރާކޮށްގެން ކުރިއަށް ގެންދިއުމަށް މިމަހުގެ 7 ވަނަ ދުވަހު ރައީސް އޮފީހުން ވަނީ މިފްކޯގެ އިތުރުން އެޗްޑީސީއަށްވެސް އަންގާފަ އެވެ. އަދި މިފްކޯއިން އެޗްޑީސީއާއި އެކު މަޝްވަރާތައް ފަށާފައިވާއިރު، އެކުންފުނީގެ މެނޭޖުމެންޓާއި އެމްއެންޑީއެފްގެ އިސް އޮފިޝަލުން ބުރާސްފަތި ދުވަހު ވަނީ ކަނޑުއޮތްގިރިއަށް ޒިޔާރަތްކޮށް ސައިޓްގެ އިންސްޕެކްޝަނެއް ހަދާފަ އެވެ.
ޖުމްލަ 4 ހެކްޓަރުގެ ކަނޑުއޮތްގިރިއަކީ މިވަގުތު މިފްކޯއިން އުފައްދާ ލައިފްސްޓައިލް ޕްރޮޑަކްޓްތަކުގެ މައި ހަބެވެ. އޭގެ ތެރޭގައި ރެޑީ މޭޑް ނުވަތަ ތާޒާކަމާއެކު ވަގުތުން ގަނެގެން ކެވޭ ގިނަ ބާވަތްތަކުގެ އުފެއްދުންތައް ހިިމެނެއެވެ. އަދި އެ ފެސިލިޓީން މަސްވެރިންނަށްވެސް އައީ ހިދުމަތް ދެމުންނެވެ. އޭގެ ތެރޭގައި ކަޅުބިލަމަހާއި ކަންނެލި މަސް ކިރުމާއި، މަސް ބަންދުކުރުމާއި، ލައިފްސްޓައިލް ޕްރޮޑަކްޓްތައް އުފެއްދުމުގެ އިތުރުން މަސްވެރިންނަށް އައީ އައިސް ދޫކުރަމުންނެވެ. ކަނޑުމަހާއި ކަންނެލި މަހުގެ ލޮއިންސް ބަންދުކުރުމުގެ މަސައްކަތްވެސް ކުރަމުން އައީ ކަނޑުއޮތްގިރީގަ އެވެ.
މިފްކޯއިން ވަނީ ސައުދީ ލޯނު ފަންޑުގެ ދަށުން 5 މިލިއަން ޑޮލަރު ހަރަދުކޮށްގެން ކަނޑުއޮތްގިރީގެ ބަނދަރުގެ މަސައްކަތް ކޮށްފައެވެ. އަދި ކަނޑުއޮތްގިރި ފެސިލިޓީއަށް ސައުދީ ފަންޑުގެ އިތުރުން އިސްލާމިކް ޑިވެލޮޕްމެންޓް ބޭންކު (އައިއެސްޑީބީ) ގެ ފަންޑުގެ ދަށުން 8 މިލިއަން ޑޮލަރުގެ އިންވެސްޓްމެންޓް ޕްލޭން ކުރެވިފައިވާއިރު، އެ އިންވެސްޓްމެންޓް ކުރިއަށް ގެންދަން ހުޅުމާލެއިން ބިމެއް އަވަސް ފުރުސަތެއްގެ ތެރޭގައި ހަމަޖެހިގެން ދިއުމަކީ ވަރަށް ހާއްސަ އަހައްމިއްޔަތުކަމެއް ދީގެން ކުރަންޖެހިފައިވާ މަސައްކަތެއްކަމަށް މިފްކޯއިން ބުނެއެވެ.