ދިވެހިރާއްޖޭގައި ލޭނު މަސްވެރިކަންކުރުމާމެދު އެއްވެސް އިރެއްގައި ދެކޮޅު ނަހައްދަވާ ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ފިޝަރީޒް މިނިސްޓްރީން އިންތިޒާމުކޮށްގެން މިއަދު ދިވެހިރާއްޖޭގެ އަޑުގެ ސެނެކޯ މާލަމުގައި ބޭއްވި ނޫސްވެރިންގެ ބައްދަލުވުމެއްގައި، މިނިސްޓަރު އިދިކޮޅުގައި ހުންނެވިއިރު، ލޭނު މަސްވެރިކަމާއި ދެކޮޅުކަމަށާއި، އެހެންނަމަވެސް ވަޒީރުކަމަށް ވަޑައިގެންނެވުމާއެކު، ފިކުރު ބަދަލުކުރައްވައި ލޭނު މަސްވެރިކަމަށް ތާއީދުކުރައްވަނީ ކީއްވެގެންތޯ ކެޔޮޅާއިން ދެންނެވި ސުވާލަކަށް ޖަވާބު ދެއްވަމުންނެވެ.
”އަޅުގަނޑު އިދިކޮޅުގަ ހުރިއިރުވެސް އަޅުގަނޑު ލޭނު މަސްވެރިކަމަކާ އިދިކޮޅެއް ނޫން. ލޭނު މަސްވެރިކަމުގައި އޭރުގައި ހިނގަމުންދިޔަ ކަންތައްތަކުގެ ވާހަކަ އަޅުގަނޑު އޭރުވެސް ދައްކާފައި ހުންނާނީ. ލޭނު މަސްވެރިކަމަކީ ދިވެހިރާއްޖެއަށް އާމްދަނީ އިތުރުވާ މަސްވެރިކަމެއްކަަމަށް އޭރުވެސް އަޅުގަނޑު ގަބޫލުކުރަނީ.“ މިނިސްޓަރު ވިދާޅުވި އެވެ.
ރާއްޖޭގައި ލޭނުގެ މަސްވެރިކަމަށް އަލުން ހުޅުވާލުމަށްޓަކައި، ފިޝަރީޒް މިނިސްޓްރީން އެކުލަވާލާފައިވާ ގަވާއިދަށް މަސްވެރިންނާއި އެންޖީއޯތަކުން ހުށަހަޅާފައިވާ ޝަކުވާތައް ބަލައިގަންތޯ ދެންނެވި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ގަވައިދުގެ ޑްރާފްޓަށް ޚިޔާލު ހުށަހެޅުމުގެ ފުރުސަތު އާންމުކޮށް ހުޅުވާލީވެސް އެކަން ރަނގަޅަށް ގެންދަން ބޭނުންވާތީވެ، ކަންނެލި މަސްވެރިންނާއި އެންޖީއޯތަކުގެ މަޝްވަރާ އެކަމުގައި ޝާމިލުކުރުމަށް ކަމަށެވެ. އަދި، ގަވައިދަށް ކޮމެންޓްކުރަން ހުޅުވާލުމުގެ ކުރިންވެސް އެކަމުގެ މަސްލަހަތުވެރިންނާއި، ބޮޑު ކަންނެލިކަމުގެ މަސްވެރިންނާއި، ބޮޑު ކަންނެލި މަސްވެރިން ތަމްސީލުކުރާ ބީކޭއެމްޔޫއާވެސް ބައްދަލުކުރައްވައި މަޝްވަރާ ހޯއްދެވިކަމަށެވެ.
”އަޅުގަނޑުގެ ވާހަކައަކީ އަޅުގަނޑުމެންނަކީ %99 އިން ސައްތަ މޫދު ކަނޑު އޮތް ގައުމެއް. އާމްދަނީއެއް އެކަމަކުން ނަފާ ހޯދާ ވަހަކަ ދެއްކީމަ މީގަައި ޕޮލިޓިކަލް ކޮމްޕޯނެންޓްވެސް އެބައުޅޭ. އަޅުގަނޑު ނުދަންނަވަން މީއި ހަމައެކަނި ތިމާވެއްޓާ ނޫނީއްޔާމު ޑައިވިންގ އެސޯސިއޭޝަންތަކާ އެކަންޏޭ. އެ ބޭފުޅުންގެވެސް ޖެނުއިން ކޮންސާންތަކެއް އެބަހުރި. ހަމައެއާއެކީގައި ޕޮލިޓިކަލް ބޭފުޅުންގެ ޕޮލިޓިކަލް އޮޕޯޒްވެސް މީގައި އެބަައޮތް. އެއީ އާމްދަނީ އިތުރުވާ ކަމަކަށްވާތީއާއެކީގައި ކުރާ ކަންތައްތަކެއްވެސް ހުންނާނެ. އެހެންނަމަވެސް ހުރިހައި ބޭފުޅުންގެ ކޮންސާން ތަކަކީ ޕޮލިޓިކަލީ މޯޓިވޭޓެޑް ކޮންސާންތަކެއްގެ ގޮތުގައެއް ނުދަންނަވަން އެއްވެސް ހާލެއްގަ. އެބޭފުޅުންގެ ޖެނުއިން ކޮންސާން އެބަހުރި. އެބޭފުޅުންގެ ޖެނުއިން ކޮންސާންތަކަށް އަޅުގަނޑުމެންނަށް އެޑްރެސްކުރެވޭނެ އެންމެ ރަނގަޅަކަށް މިދަނީ އެޑްރެސް ކުރަމުން.“ މިނިސްޓަރު ވިދާޅުވި އެވެ.
ބޭރުގެ ޖަމްއިއްޔާ ޖަމާއަތްތަކުން ރާއްޖޭގައި ލޭނު މަސްވެރިކަން ކުރުމާގޫޅޭގޮތުން ކަންބޮޑުވުން ފާޅުކުރަމުންދާ ދިއުމަށް އިޝާރާތްކުރައްވާ މިނިސްޓަރު ވިދާޅުވީ، ބޭރުގެ ފަރާތްތަކުންވެސް މިފަދަ މަސްވެރިކަމުން އާމްދަނީ ހޯދަމުންދާ ކަމަށާއި، ރާއްޖެއިން އެކަން ނުކުރަންވީ ސަބަބެއް ނެތްކަމަށެވެ.
”ބޭރުގެ ފަރާތްތައް ދައްކާ ހުރިހައި ވާހަކައެއް އަޅުގަނޑުމެން ޖެހޭތޯ އަޑު އަހަން؟ އަޅުގަނޑުމެން އާމްދަނީ ނުހޯދާ ބޭރުގެ މީހުން އާމްދަނީ އެބަހޯދާ. ފަހަރުގަ އަޅުގަނޑުމެންގެ މީސްކޮޅު މަދުވީމައި އަޅުގަނޑުމެންގެ ވޮއިސް ފަހަރުގަ ނޫނީ ”ވޮއިސް ރެއިޒް“ ކުރަން ތިބި މީހުން ”ސިގްނިފިކެންޓް“ ނުވެދާނެ. އަދަދު ގިނަނުަުވެދާނެ. އަޅުގަނޑުމެންނަކީ ވަރަށް ކުޑަކުޑަ ގައުމެއް.“ މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ރާއްޖޭގައި ލޭނު މަސްވެރިކަމަށް ހުޅުވިގެންދާނީ ދުނިޔޭގެ އެންމެ ރަނގަޅަށް މިކަން މެނޭޖްކުރެވޭނެ މެކޭނިޒަމްއާއެކީގައި ކަމަށެވެ.
ސަރުކާރުން ލޭނު މަސްވެރިކަމަށް އަލުން ހުޅުވާލަން ނިންމީ މިއަހަރުގެ ޖޫން މަހުގެ 24 ވަނަ ދުވަހު އެވެ. އެއާއެކު މަސްވެރިކަމާ ބެހޭ ވުޒާރާއިން ”ލޭނު މަސްވެެރިކަމާ ބެހޭ ގަވައިދު“ އެކުލަވާލާ 5 އޯގަސްޓުން 18 އޯގަސްޓުގެ ނިޔަލަށް އާންމުކޮށް ކޮމެންޓަށް ހުޅުވާލި އެވެ. އެ ފުރުސަތުގައި މަސްވެރިންނާއި، މަސްވެރިކަމާއި ތިމާވެށީގެ ހައްގުގައި ވަކާލާތުކުރާ އެންޖީއޯތައް ގުޅިގެން ޝަކުވާތައް ހުށަހެޅިއެވެ. މިނިސްޓްރީން މިހާރު ދަނީ، ލޭނު މަސްވެރިކަމަށް ހުޅުވާލަން ފުރިހަމަކުރަންޖެހޭ އިޖުރާއަތްތައް ފުރިހަމަކުރަމުންނެވެ.
ސަރުކާރުން ލޭނު މަސްވެރިކަމަށް ހުޅުވާލަން ނިންމުމުން، މަސްވެރިންނާއި ކަނޑުގެ ދިރުންތކާއި ތިމާވެށި ހިމާޔަތްކުރާ ފަރާތްތައް ގުޅިގެން ”ލޭނު މަސްވެރިކަމާ ދެކޮޅު“ ގެ ނަމުގައި ކެމްޕޭނެއް ފެށިއެވެ. އަދި، ލޭނު މަސްވެރިކަމާ ދެކޮޅަށް ހުޅުވާލި ޕެޓިޝަންގައި މިހާތަނަށް 25،183 މީހުން ވަނީ ބައިވެރިވެފަ އެވެ. އަދި މިހާރު އެ މީހުންދަނީ ”މަސްވެރިންގެ ބޮޑު މުޒާހަރާގެ“ ގެ ނަމުގައި ރާއްޖޭގެ ހުރިހައި ސަރަަހައްދެއްގެ މަސްވެރިންނާއި، މި ދާއިރާގެ މަސައްކަތްތެރިންނާއި، ޖަމްއިއްޔާތައް ގުޅިގެން މުޒާހަރާއެއް ބާއްވަން ތައްޔާރުވަމުންނެވެ.