ގއ. ކޮލަމާފުށިން ފަސް މާވަހަރު ހޮވައިފި އެވެ.
އެ ރަށު ކައުންސިލުން ބުނެފައިވާ ގޮތުގައި، އެރަށުގެ ތިން މީހަކުވެގެން ފުށްޓަރު ފަރާތުން ހޮވާފައިވަނީ، ބަރުދަނުގައި ގާތްގަނޑަކަށް ދެ ކިލޯ ހުންނަވަރުގެ މާވަހަރަކާއި،.އެއް ކިލޯ ބައިގެ ދެމާވަހަރެވެ. ކުޑަ ދެ މާވަރުގެ ބަރުދަން އަދި ސާފުވާގޮތެއް ނުވެއެވެ. އެއީ ކުޑަ ތިން މާވަހަރުކަމަށް މީޑިއާތަކުން ރިޕޯޓްކޮށްފައި ވެއެވެ.
މާވަހަރު ހޮވި ތިން މީހުންގެ ބަހެއް އަދި ލިބޭ ގޮތެއް ނުވެއެވެ. އެހެންނަމަވެސް އެ ހޮވި މާވަހަރަކީ ސައްހަ އެއްޗެއްތޯ ބެލުމުގެ މަސައްކަތް ކުރަމުން އަންނަކަމަށް އެރަށު ކައުންސިލުން ބުނެފައި ވެއެވެ.
ކޮލަމާފުށިން ހޮވާފައިވަނީ މާވަހަރުގެ އެންމެ އަގު ބޮޑު ބާޥަތްތަކަމަށްވާ ހުދަންބަރުކަމަށް އެރަށުގެ ބައެއް ފަރާތްތަކުން ބުނެފައިވެއެވެ. އެހެންނަމަވެސް އެ ހޮވި ފަރާތުންވެސް އަދި ކައުންސިލުންވެސް އެކަން ކަށަވަރުކޮށްދީފައެއް ނުވެއެވެ.