އުތުރާއި މެދު ޜާއްޖޭގެ އަތޮޅުތަކަށް ކަނޑު ގަދަވާނެކަމަށް ލަފާކޮށް މޫސުމާބެހޭ ގައުމީ އިދާރާއިން ހުދުސަމާލު ނެރެފިއެވެ.
ހެނދުނު 07:00 ޖެހިއިރު ހުދު ސަމާލު ނެރެފައިވަނީ ހއ އަތޮޅުން ފެށިގެން ލ އަތޮޅާއި ހަމަޔަށެވެ. މި 15 އަތޮޅަށް މޫސުމީ ސަމާލު ނެރެފައިވަނީ މެންދުރު 01:00 ޖެހުމާއި ހަމަޔަށެވެ.
މޫސުމާއި ބެހޭ ގައުމީ އިދާރާއިން ބުނީ، ސަމާލު ނެރެފައިވާ ވަގުތުތަކުގައި ގަޑިއަކު 19 މޭލާއި 24 މޭލުގެ ބާރުމިނުގައި ވައި ގަދަވާނެކަމަށެވެ. އަދި ވިލާގަނޑުގައި ގަޑީއަކު45 މޭލަށް ވައިގަދަވެ ކަނޑުތައްވެސް ގަދަވާނެކަމަށް ލަފާކުރެވޭކަމަށް އެ އިދާރާއިން ބުނެފައި ވެއެވެ.
މިދުވަސްވަރު ރާއްޖޭގެ ބޮޑު ސަރަހައްދަކަށް މޫސުން ގޯސްވެފައިވާތީ، ކަމާއި ގުޅޭ އިދާރާތަކުން ވަނީ ކަނޑު ދަތުރުފަތުރުކުރާ ފަރާތްތަކަށް މޫސުމަށް ސަމާލުވެ ރައްކާތެރިވުމަށް އިލްތިމާސްކޮށްފަ އެވެ. އެގޮތުން ދަތުރަށް ފުރުމުގެ ގޮތުން މޫސުމަށް ބެލުމަށާއި، ދަތުރުގެކުރިން އުޅަނދުގެ ސަލާމަތީ އާލާތްތަކާއި، މުއާސަލާތީ ކަންތައްތައްހުރީ ރަނގަޅަށް ތޯ ބެލައި، ފަޅުވެރިންނާއި ފަސިންޖަރުންގެ ސަލާމަތާއި ރައްކާތެރިކަން ކަށަވަރުކުރުމަށް ފިޔަވަޅު އެޅުމަށް އިލްތިމާސްކޮށްފައި ވެއެވެ.