ދިވެހި މަސްވެރިންގެ ފުރިހަމަ ގައުމީ ދަފްތަރެއް އެކުލަވާލުމަށް ސަރުކާރުން ކުރަމުންދާ މަސައްކަތުގެ ދަށުން، ދެކުނުގެ އަތޮޅުތަކުގައި ކުރެވުނު މަސައްކަތުން ހަތަރު އަތޮޅަކުން %35 މަސްއޮޑިފަަހަރުގެ މަސްވެރިން ދަފްތަރުގައި ރަޖިސްޓްރީކޮށްފި އެވެ.
ދަފްތަރު އެކުލަވާލުމަށް ފިޝަރީޒް މިނިސްޓްރީގެ ޓީމްތަކުގެ މަސައްކަތް އަދާހަމަކޮށް ހާމަކޮށްފައިވާ ގޮތުގައި، ކައުންސިލްތަކާއި، އޮޑިވެރިންނާއި ކެޔޮޅުންގެ އެހީތެރިކަމާއެކު ފުވައްމުލައް ސިޓީ އަދި އައްޑޫ ސިޓީގެ އިތުރުން ގއ އާއި ގދ އަތޮޅަށް ނިސްބަތްވާ %35 އޮޑިފަހަރުގައި މިވަގުތު ހަރަކާތްތެރިވާ މަސްވެރިންވަނީ ދަފްތަރުގައި ރަޖިސްޓްރީކޮށް ނިމިފަ އެވެ.
ފިޝަރީޒް މިނިސްޓްރީން ބުނީ ގއ އަތޮޅުގެ ހުރިހައި މަސްވެރިން ދަފްތަރު ކުރުމަށް އެއަތޮޅު ކައުންސިލާއި، ފިޝަރީޒް މިނިސްޓްރީއާއި، މަސްވެރިން ގުޅިގެން ކުރި މަސައްކަތުން މިހާރު އެއަތޮޅުގެ %41 މަސް އޮޑިފަހަރުގެ މަސްވެރިން ދަފްތަރުކޮށް ނިމިފައިވާކަމަށެވެ.
ރާއްޖެ 6 ޒޯނަކަށް ބަހާލައިގެން މަސްވެރިން ދަފުތަރު ކުރުމުގެ މަސައްކަތް ކުރުމަށް ޚާއްސަ ޓީމުތަކަކުން ކުރަމުން ގެންދަނީ ފިޝަރީޒް މިނިސްޓަރު އަޙްމަދު ޝިޔާމްގެ ބެއްލެވުމުގެ ދަށުންނެވެ. މަސްވެރިން ދަފްތަރު ކުރަމުންދަނީ، ފިޝަރީޒް މިނިސްޓްރީގެ ”ކެޔޮޅު“ ސިސްޓަމަށް އިތުރުކުރި މޮޑިއުލްއަކަށެވެ. ކެޔޮޅު ސިސްޓަމަކީ މަސްވެރިކަމާ ގުޅުންހުރި މަޢުލޫމާތު ނަގައި، ރައްކާކޮށް ބަލަހައްޓާ ނިޒާމެކެވެ.
މަސްވެރިން އަމިއްލައަށްވެސް މި ސިސްޓަމްގައި ރަޖިސްޓްރީ ކުރެވިދާނެއެވެ. މަސްވެރިން ދަފުތަރުކުރުން ބެހިގެންވަނީ 3 މަރުހަލާއަކަށެވެ.
ދަފުތަރުކުރުމުގެ މަރުހަލާތައް:
- ފުރަތަމަ މަރުހަލާއަކީ އޮޑިވެރިޔާ ނުވަތަ އޮޕަރޭޓަރު ދަފުތަރުވުން
- ދެވަނަ މަރުހަލާއަކީ، އޮޑި ދަފުތަރުވުމުން އެ ދޯނިން މަހަށްދާ ކެޔޮޅު އައްޔަނުކުރުން
- ތިންވަނަ މަރުހަލާއަކީ، ކެޔޮޅު ދަފުތަރުވުމަށްފަހު ކެޔޮޅަށް ޚާއްޞަ ކޯޑެއް އެޕްލިކޭޝަން ތެރެއިން ޖެނެރޭޓްކުރުން
އެޕްލިކޭޝަނުން ކެޔޮޅަށް ފޮނުވާ އެ ކޯޑު ފަޅުވެރިންނަށް ފޮނުވުމުން، ކޯޑު ބޭނުންކޮށްގެން ފަޅުވެރިންނަށް ދަފުތަރުގައި ރަޖިސްޓަރީކުރެވެނޭއެވެ. ފަޅުވެރިން ކެޔޮޅު އެޕްލިކޭޝަން ފޯނަށް ޑައުންލޯޑުކުރުމަށްފަހު އީފާސް ބޭނުންކޮށްގެން ލޮގިންވުމުން ކޯޑު ޖަހަން އަންނާނެ އެވެ. ކެޔޮޅުދޭ ކޯޑު ޖެހުމުން ދަފުތަރުވާން ހުށަހަޅާ ފަޅުވެރިންގެ މައުލޫމާތު ނަގަނީ ޑީއެންއާރުންނެވެ.
ދަފުތަރުވެގެންދާނީ ކެޔޮޅު ދޭ ކޯޑު ބޭނުންކޮށް ދޯނީގެ ފަޅުވެރިއަކަށް ވުމަށް ހުށަހަޅާ ފަޅުވެރިންގެ ތެރެއިން ކެޔޮޅު ހުއްދަދޭ ފަޅުވެރިންނަށް އެކަންޏެވެ. ދަފުތަރުގެ ޞައްޙަކަން ކަށަވަރުކުރުމަށް ދޯނީގެ ފަޅުވެރިންގެ މަޢުލޫމާތު ހުރިހާ ފަޅުވެރިންނަށް ފެންނަން ހުންނާނެއެވެ.
ސަރުކާރުގެ ސިޔާސަތަކީ، މަސްވެރިންނަކީ ދައުލަތުގެ މުއައްސަސާއެއްގައި ދަފުތަރުވެފައި ތިބި ބަޔަކަށް ހެދުންކަމަށްވާއިރު، ދަފުތަރުގެ މަސައްކަތް ނިމޭއިރު، ރާއްޖޭގައި މަހަށް ދުއްވާ ހުރިހާ ދޯންޏަކާއި، ކެޔޮޅުންނާއި އަދި ފަޅުވެރިންގެ ރަސްމީ މަޢުލޫމާތު ވުޒާރާގެ ޑޭޓާބޭސްގައި ރައްކާކުރެވި ބެލެހެއްޓިގެން ދާނެކަމަށް ފިޝަރީޒް މިނިސްޓްރީން ބުނެފައި ވެއެވެ.