ދިވެހި ސަރުކާރުން ލޭނު މަސްވެރިކަން ކުރުމަށް ހުއްދަ ދިނުމަށް ނިންމި ނިންމުމަކީ ޒިންމާދާރުަކަންކުޑަ ނިންމުމެއްކަމަށާއި، އެއީ ރާއްޖެއަށް އެންމެ ރަނގަޅު ނިންމުމެއް ނޫންކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ލޭނު މަސްވެރިކަމާ ދެކޮޅުކަން ފާޅުކުރައްވައި އެކްސްގައި ހިއްސާ ކުރެއްވި މެސެޖެއްގައި ޝާހިދު ވިދާޅުވީ، ރާއްޖޭގެ މަސްވެރިކަމުގެ ސިނާއަތު ދެމެހެއްޓުމަށް މީގެކުރިން ނަގަހައްޓަމުންއައި މައި އެއްސިފަކަމަށްވާ ލޭނު މަސްވެރިކަން މަނާކޮށްފައި އޮތްއޮތުން ނިމުމަކަށް ގެނެސް އެކަން ކުރުމަށް ސަރުކާރުން ހުއްދަ ދޭން ނިންމި ޚަބަރު އިވުމުން ސިހުންވި ކަމަށެވެ. އަދި، ލޭނު އެޅުމަށް ހުއްދަދީ މިޔަރު މަސްވެރިކަން ކުރުމަށް ފުުރުސަތު ދިނުމަކީ މި ސަރުކާރުން ޒިންމާދާރުކަންކުޑަގޮތަކަށް ނިންމި ނިންމުމެއްކަމަށާއި، މީގެ ސަބަބުން އެމްޑީޕީ ސަރުކާރުން އެ ދާއިރާއިން ހޯދާފައިވާ ކުރިއެރުންތައް ފަހަތަށްޖެހ،ި ފަތުރުވެރިކަމަށް ނުރައްކާވެ، ބައިނަލްއަގުވާމީ މައިދާނުގައި ރާއްޖެއާމެދުދެކޭގޮތް ބަދަލުވެ، ރާއްޖޭގެ ލީޑަރޝިޕަށް އަސަރުކުރާނެ ނިންމުމެއް ކަމަށެވެ.
ޝާހިދު އިތުރަށް ވިދާޅުވެފައިވަނީ، ލޭނު މަސްވެރިކަމުގެތެރޭގައި، ނެތިދާނެކަމުގެ ބިރު ހީވެފައިވާ ކަނޑުގެ ދިރުންތައް ހިމެނޭ ގޮތަށް ގިނަ އަަދަދެއްގެ ބައިކެޗްހިފޭއިރު، މިއީ ކަނޑުގެ މާހައުލީ ނިޒާމަށް އޮތް ނުރައްކަލެއްކަމަށާއި، މީގެ ސަބަބަުން މަސްވެރިކަމުގެ ވިޔަފާރިއަށް ނޭދެވޭ އަސަރުކުރާނެކަމަށެވެ.
ޝާހިދުގެ މެސެޖު ނިންމަވާލައްވާފައިވަނީ، ރައްޔިތުންގެ ލާބަޔަށްޓަކައި ސަރުކާރުން ލޭނު މަސްވެރިކަން ކުރުމަށް ހުއްދަދޭން ނިންމާފައިވާ ނިންމުން ވަގުތުން ބަދަލުކޮށް ކުރިން އޮތްގޮތަށް އިޔާދަކުރަން ގޮވާލައްވަމުންނެވެ.
ރާއްޖޭގައި ލޭނު މަސްވެރިކަންކުރުމަށް ހުއްދަދިނުމަށް ވަޒީރުންގެ މަޖިލީހުން ނިންމާފައިވަނީ މިދިޔަ މާޗުމަހުގެ ތެރޭގަ އެވެ. މިއާއެކު ފިޝަރީޒް މިނިސްޓްރީން ވަނީ ދިވެހި ރާއްޖޭގައި ލޭނުގެ މަސްވެރިކަން ކުރުމުގެ ގަވައިދެއް އެކުަލަވާލާފަ އެވެ. އެ ގަވައިދުގެ ދެލިކޮޕީ އާންމުގެ މަޝްވަރާއަށް ހުޅުވާލާފައިވާއިރު، އެ ގަވާއިދުގައި ލޭނު މަސްވެރިކަމުގެ ތެރޭގައި މަރުވާ މިޔަރު ޕްރޮސެސްކޮށް އެކްސްޕޯޓްކުރުމަށް ވަކި އުސޫލެއްގެ ދަށުން ފުރުސަތު ދިނުމަށް ނިންމާފައި ވެއެވެ.
ސަރުކާރުގެ މި ނިންމުމާއި ގުޅިގެން މަސްވެރިކަމުގެ ދާއިރާގެ މައި ޖަމްއިއްޔާތަކާއި މަސްވެރިންނާއި، މަސްވެރިންގެ ހައްގުގައި ވަކާލާތުކުރާ މީހުން ދަނީ މިކަމަށް ދެކޮޅު ހަދައި ސިދާގޮތުންނާއި ނުސީދާގޮތުން ސަރުކާރަށް ފާޑުކިޔައި ސަރުކާރުގެ ނިންމުން ބަދަލުކުރުމަށް ގޮވާލަމުންނެވެ.