އިންޑިއާ ކަނޑުގެ ލޯބޮޑު ކަންނެލި އަދި ރީނދޫ އުރަހަ ކަންނެލީގެ ސްޓޮކް ދެމެހެއްޓެނިވި ގޮތެއްގައި ބެލެހެއްޓުމަށްޓަކައި، މި ސްޓޮކުން ކޮންމެ ޤައުމަކަށް ވެސް ބޭނޭ އެންމެ މަތީ މިންވަރު އިންޑިއަން އޯޝަން ޓޫނާ ކޮމިޝަން(އައިއޯޓީސީ)ގެ ޤަރާރަކުން ވަނީ ފާސްކޮށްފަ އެވެ. ރާއްޖެއަކީ އެ ކޮމިޝަނުގެ މެންބަރެއްކަމުން، އެ ކޮމިޝަނުން ނިންމާ ނިންމުންތައް ޤައުމީ ފެންވަރުގައި ތަންފީޒުކުރުމަށް ރާއްޖެއަށް ލާޒިމު ވެއެވެ.
އައިއޯޓީސީގެ ނިންމުމުގެ މަތިން، ލޯބޮޑު ކަންނެލި ބޭނޭނެ އެންމެ މަތީ މިންވަރު ނުވަތަ ކޯޓާއެއްގެ ގޮތުގައި ދިވެހިރާއްޖޭގެ އުޅަނދުފަހަރުތަކުން ބޭނުމަށް ލިބިފައިވަނީ 2000 ޓަނެވެ. އަދި ރީނދޫއުރަހަ ކަންނެލި ބޭނޭ މިންވަރު ނުވަތަ ކޯޓާއެއްގެ ގޮތުގައި ލިބިފައިވަނީ އަަހަރަކަށް 47،000 (ސާޅީސް ހަތްހާސް) ޓަނެވެ. އެހެން ނަަމަވެސް ވޭތުވެ ދިޔަ ދެއަހަރު ވެސް ދިވެހިރާއްޖޭގެ އުޅަނދުތަކުން ރީނދޫއުރަހަ ކަންނެލި ބާނާފައިވަނީ ގާތްގަނޑަކަށް 30،000 ޓަނެވެ.
މީގެ ނަތީޖާއެއްގެގޮތުން، މުސްތަގުބަލުގައި އައިއޯސީޓީގެ ކޯޓާ މުތާލިއާ ކުރާއިރު، ޤައުމުތަކުން މަސްބާނާ މިންވަރަށް ބަލައި، ދިވެހރާއްޖެއަށް މިހާރު ލިބިފައިވާ ކޯޓާ ކުޑަވުމަކީ އެކަށީގެންވާ ކަމަކަށް ވާތީ، ރާއްޖެއަށް ލބިފައިވާ ކޯޓާ އެންމެ ފުރިހަމައަށް ބޭނުންކުރުމަކީ މުހިއްމު ކަމެއް ކަމުގައިދެކޭކަމަށް ފިޝަރީޒް މިނިސްޓްރީން ބުނެފައި ވެއެވެ.
އެހެންކަމުން، ދިވެހިރާއްޖޭގެ ކަނޑުމަހުގެ މަސްވެރިކަން އިތުރަށް ތަރައްގީކުރުމުގެ މަގްސަދުގައި ލޭނު މަސްވެރިކަން ދިވެހިރާއްޒޭގައި އަލުން ހުޅުވާލުމަށް ވަޒީރުންގެ މަޖްލީހުން ވަނީ ނިންމާފަ އެވެ. މި ނިންމުމާއި ގުޅިގެން، ލޭނުމަސްވެރިކަން ކުރުމާބެހޭ ގަވާއިދެއް އެކުލަވާލާ، އެގޭ ދެލިކޮޕީ ފިޝަރީޒް މިނިސްޓްރީގެ ވެބްސައިޓުގައި 5 އޯގަސްޓް 2024ގައި ވަނީ ޝާއިއުކޮށްފަ އެވެ. އަދި މި ގަވާއިދަށް 18 އޮގަސްޓު 2024 ގެ ކުރިން ޚިޔާލު ފާޅުކޮށް، ކޮމެންޓުކުރުމުގެ ފުރުސަތުވެސް ވަނީ ހުޅުވާލާފަ އެވެ.
ލޭނު މަސްވެރިކަމަށް މިފަހަރު ހުޅުވާލާއިރު ފާއިތުވި ތަނުގައި ދިވެހިރާއްޖޭގައި ލޭނުގެ މަސްވެރިކަން ކުރިއިރު ލިބިފައިހުރި ތަޖުރިބާއަށް ބަލައި މި މަސްވެރިކަމަކީ ދިވެހިންނަށް ފައިދާހުރި އަދި ގާނޫނާއި ގަވާއިދާއި އެއްގޮތަށް ކުރެވޭ މަސްވެރިކަމެއްކަން ކަށަވަރުކުރުމުގެގޮތުން ޚާއްސަ މާއްދާާތަކެއް މި ގަވާއިދުގއި ހިމަނާފައި ވެއެވެ. އެގޮތުން އުޅަނދުގެ ފަޅުވެރިންގެ ސަލާމަތާއި ރައްކާތެރިކަން ދެމެހެއްޓުމަށް އުޅަނދުގައި ކޮންމެހެން ހުންނަންޖެހޭ ހަމަތަކެއް ކަނޑައަޅާ ގަވައިދުގައި ބަޔާންކޮށްފައި ވެއެވެ.
މީގެ އިތުރުން، އުޅަނދުގައި ކުރެވޭ މަސްވެރިކަމުގެ ހަރަކާތްތައް ރަނގަޅަށް މޮނިޓަރކޮށް ބެލެހެއްޓުމުގެ ގޮތުން އުޅަނދުގައި ވެސެލް ލޮކޭޓިން ޑިވައިސްއެއް އަދި އިލެކްޓްރޯނިކް މޮނިޓަރިންގ ސިސްޓަމްއެއް ހަރުކޮށް، ކޮންމެ މަސްދަތުރަކަށް ފުރުމުގެ ކުރިން ޑިޕާޗަރ ކްލިއަރެންސް ހުއްދައެއް ހޯދުމަށް ގަވާއިދުގައި ލާޒިމް ކޮށްފައި ވެއެވެ. އެ ގަވައިދުގައި، ލޭނު މަސްވެރިން ކުރުމަށް ހުއްދަ ސަރަހައްދެއް ކަމަށް ކަނޑައަޅާފައިވަނީ މިނިސްޓްރީއަށް ލިބުނު މައުލޫމާތާއި ތަފާސް ހިސާބުތަށް ރިއާޔަތްކޮށް، ކަންނެލީގެ އަތު ނަނުގެ މަސްވެރިން އާންމުކޮށް ހަރަކާތްތެރިވާ ސަރަހައްދުން ބޭރު ސަރަހައްދެކެވެ. އެއީ، ދިވެހިރާއްޖޭގެ އާކިޕެލަޖިކް ބޭސްލައިން އިން ފެށިގެން 100 މޭލުގެ ބޭރުގެ ސަރަހައްދުގެތެރެއިން 6 ޑިގްރީ އުތުރު ޠޫލްއިން ފެށިގެން ދެކުނަށް އޮންނަ ސަރަހައްދެވެ.
ދިވެހިރާއްޖޭގެ މަސްވެރިކަމާއި އިގުތިސާދީ މަސައްކަތްތައް ފުޅާކޮށް އެކަމުން ލިބޭ ނަފާ އިތުރުކުރުމަކީ މި ސަރުކާރުގެ އަމާޒެކެވެ. މިގޮތުން ލޭނު މަސްވެރިކަމުގައި ހިފޭ މިޔަރު އަދި މަސްވެރިކަމުގައި އަމާޒުނުކުރާ ބާވަތްތައް (ބައިޗެކް) ދުނިޔެ ގަބޫލުކުރާ ބެސްޓް ޕްރެކްޓިސްތަކާއި ހަމަތަކުގެމަތީން އެއްގަމަށް ގެނެސް، މިޔަރުގެ ބާވަތްތައް ޕްރޮސެސްކުރުމުގެ ހުއްދަ އޮތް ފެސިލިޓީތަކުން ޕްރޮސެސްކުރުމުގެ ފުރުސަތު މި ގަވައިދުގެ ދަށުން ފަހިވެގެން ދާނެއެވެ. އެހެންނަމަވެސް މިއީ ދިވެހިރާއްޖޭގައި މިޔަރު މަސްވެރިކަން ކުރުމަށް ހުޅުވާލުން ނޫންކަމަށާއި އަދި ހުޅުވާލުމުގެ ވިސްނުމުގައި ގައި އަޅާ ފިޔަވަޅެއްވެސް ނޫންކަން މިނިސްޓްރީން ބުނެފައި ވެއެވެ.
މިގޮތުން، ލޭނު މަސްވެރިކަން ކުރުމަށް ލައިސަންސް ކުރެވޭ އުޅަނދުފަހަރުތަކުގައި މިޔަރަށް އަމާޒުކޮށްގެން މަސްވެރިކަން ކުރުމަކީ މި ގަވާއިދުގެ ދަށުން މަނާކަމެކެވެ. އަދި މިގަވާއިދު ފަރުމާކުރުމުގައި ލޭނު މަސްވެރިކަމުގައި ހިފޭ މިޔަރު ފަދަ މަސްވެރިކަމުގައި ހިގޭ ބައިޗެކް މަދުކުރުމުގެ ގޮތުން ކޮންމެހެން އަޅަންޖެހެ ފިޔަވަޅުތައް ހިމަނާފައި ވެއެވެ. މިގޮތުން ބައިޗެކް ގޮތުގައި ހިފޭ މިޔަރު މަދުކުރުމުގެ ޤޮތުން އުޅަނދުގައި ބޭނުންކުރާ ލޭނުކޮޅު (ބްރާންޗް ލައިން) ގެ މިޔަވާލި (ލީޑަރ) ގެ ގޮތުގައި ވަޔަރު ނުވަތަ ނަރު (ވަޔަރ ޓްރޭސް) ބޭނުންކޮށްގެން ނުވާނެކަމަށް ގަވައިދުގައި ބަޔާންކޮށްފައި ވެއެވެ.