މިފްކޯގެ ސީއީއޯ ކަމުންނާއި, ބޯޑް މެންބަރުކަމުން އިއްޔެ ވަކިކުރި އަހުމަދު ޝަމާހު ރަޝީދު ފިޝަރީޒް މިނިސްޓްރީގެ ސްޓޭޓް މިނިސްޓަރު ކަމަށް މިއަދު އައްޔަންކޮށްފި އެވެ. ޝަމާހު ސްޓޭޓް މިނިސްޓަރުކަމަށް އައްޔަނުކުރެއްވިކަން ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ވަނީ ކަށަވަރުކޮށްދެއްވާފަ އެވެ.
މިފްކޯގެ ސީއީއޯގެ މަގާމުން ސަމާހު ވަކިކުރިކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އިއްޔެ ވަނީ އިއުލާނުކޮށްފަ އެވެ. އެހެންނަމަވެސް ވަކިކުރީ ކޮން ސަބަބަކާހުރެ ކަމެއް ހާމަކޮށްފައެއް ނުވެއެވެ.
ޝަމާހު ސީއީއޯކަމުގައި ހުންނެވި އިރު މާޗްމަހުގެ 18 އިން އެޕްރީލް މަހުގެ 21 ވަނަ ދުވަހަށް އޭނާ މަގާމުން އެކަހެރިކޮށްފައި ބެހެއްޓުމަށްފަހު، މަގާމުގެ ޒިންމާތަކާއި އަލުން ހަވާލު ކުރީ އެޕްރީލް މަހުގެ 24 ވަނަ ދުވަހު އެވެ. އަދި އިއްޔެ މަގާމުން ވަކިކޮށްފައި މިވަނީ، ޒިންމާތަކާއި ހަވާލުވެވަޑައިގެންނެވިތާ އެއްމަސްވާން ގާތްވެފައި ވަނިކޮށްނެވެ.
ޕީސީބީގެ ވިޒްލްބްލޯވަރ ޕޯޓަލްއިންނާއި، އެ ބޯޑަށް ހުށަހެޅިފައިވާ މައްސަލަތަކާއި ގުޅިގެން ޝަމާހުގެ މައްޗަށް އިންކުއަރީ އެއް ހިންގިކަމަށް މީގެ ކުރިން ޕީސީބީން ބުނެފައިވީނަމަވެސް، އެ އިންކުއަރީގެ ތަފުސީލެއްވެސް އަދި ހާމަކޮށްފައެއް ނުވެއެވެ.
ޕީސީބީން ޝަމާހުގެ މައްޗަށް ތުހުމަތުކުރާ ކަންތައްތަކުގެ ތެރޭގައި، ކުންފުނީގެ މުދަލާއި ވަސީލަތްތައް އަމިއްލަ ބޭނުމުގައާއި ސިޔާސީ ބޭނުންތަކަށް ފާޅުކަންބޮޑު ގޮތެއްގައި ބޭނުންކުރުމާއި، ކުންފުނީގެ ދާއިމީ މުވައްޒަފުން ނުހައްގުން ވަޒިފާގެ މަސްއޫލިއްޔަތުން ދުރުކުރުމާއި, ވަޒީފާގެ ބިރުދެއްކުމާއި, ދާއިމީ މަގާމްތަކުގައި ތިއްބެވި މުވައްޒަފުންނަށް ވަޒީފާއާބެހޭ ގާނޫނާއި ޚިލާފުވާ ސަބަބެއްނެތި މަގާމާއި މުސާރަ ދަށްކުރުމާއި, ސަބަބެއް ނެތި އެހެން ޑިޕާޓްމަންޓްތަކަށާއި, ކުންފުނީގެ ސައިޓުތައް ހުންނަ ރަށްރަަށަށް ބަދަލުކުރުން ހިމެނެއެވެ.
މީގެ އިތުރުން، ކުންފުނީގެ މުވައްޒަފުން ނެގުމާއި ގުޅޭގޮތުން ހަދާފާއިވާ ޕޮލިސީތަކާއި މުސާރައިގެ އޮނިގަޑާއި ޚިލާފަށް ސީއީއޯގެ އާއިލީ ގުޅުންހުރި ފަރާތްތަކަށާއި, ރައްޓެހިންނަށް ބަޖެޓް ހަމަޖެހިފައި ނުވަނީސް ވަޒީފާ ދިނުމާއި، ބެސްޓު ޕްރެކްޓިސްއާއި ގަވަރނަންސް އުސޫލުތަކާއި ޚިލާފަށް ހެޑް ހަންޓް ކުރުމުގެ ނަމުގައި މުވައްޒަފުންގެ ގަވާއިދާއި ޚިލާފަށް, އެއްވެސް ޝަރުތަކަށް ބެލުމެއްނެތި, އާންމުކޮށް އިއުލާން ކުރުމަކާނުލާ, އިޖުރާތުތައް ފުރިހަމަނުކޮށް މުވައްޒަފުން ވެއްދުމާއި، ޕީސީބީގެ ހުއްދަ ހޯދުމަކާނުލާ, ކުންފުނީގެ މަގާމްތައް އުފައްދާ, އެމަގާމްތަކަށް މީހުން ވެއްދުމާއި، އުސޫލުތަކާއި ޚިލާފަށް, އެކަށީގެންވާ ތައުލީމާއި ތަޖުރިބާ ނެތް ފަރާތްތައް ޑިޕާޓްމަންޓްތަކުގެ ވެރިންނަށް ލުންވެސް ފާހަނގަކޮށްފައި ވެއެވެ.
މި މައްސަލައިގައި ސަމާހުއާއި މިފްކޯގެ އިސްވެރިންނާއި، އަދި ޕީސީބީގެ ބޯޑް، ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒެސް (އެސްއޯއީ) ކޮމިޓީ އަށްވެސް ހާޒިރުކޮށް މައުލޫމާތު އޮޅުންފިލުއްވި އެވެ. އެދުވަހުގެ ކޮމިޓީ ބައްދަލުވުމުގައި ސަމާހުވަނީ އޭނާގެ މައްޗަށް ޕީސީބީން ތުހުމަތު ކުރި ހުރިހައި ކަމަށްކަށް އިންކާރު ކުރައްވާފަ އެވެ.
ސަމާހު މިހާރު ހުންނެވީ ތައިލޭންޑްގެ ބެންކޮކްގަ އެވެ. އެއީ، ”އިންފޯފިޝް ވަރލްޑް ޓޫނާ ޓްރޭޑް ކޮންފަރެންސް އެންޑް އެކްޒިބިޝަން 2024“ ބައިވެރިވުމަށެވެ.