މޯލްޑިވްސް ނެޝަނަލް ޑިފެންސް ފޯރސް(އެމްއެންޑީއެފް) އިން ގެއްލިގެން ހޯދަމުންދަނީ، އިއްޔެ ހެނދުނު 06:00 ހާއިރު ކ.ތިލަފުށިން ފުރައިގެން މ. އަތޮޅަށް ދަތުރުކުރި ދޯންޏެކެވެ.
“AAA-37” ނަމަކަށް ކިޔާ މުދާ އުފުލާ މި ދޯނީގެ ޚަބަރެއް ނުވެގެން، އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް އިއްޔެ 17:20 ހާއިރު ރިޕޯޓް ކުރި ކަމަށް މިއަދު އެމްއެންޑީއެފްއިން ބުންޏެވެ. އެ ދޯނި ހޯދުމުގެ މަސައްކަތުގައި އެމްއެންޑީއެފް ކޯސްޓްގާޑް ޝިޕް ޝަހީދު ޢަލީ ހަރަކާތްތެރި ވަމުން ދާކަމަށް އެމްއެންޑީއެފްއިން މިއަދު ހެނދުނު މައުލޫމާތު ދިނެވެ.
އެ ދޯނި ހޯދުމަށް މިއަދު މެންދުރު މޯލްޑިވިއަން ފުލައިޓެއްގެ އެހީގައި ވައިގެމަގުން ވެސް ބެލިކަމަށް އެމްއެންޑީއެފްއިން ބުނެފައި ވެއެވެ. އެހެންނަމަވެސް މިހާތަނަށް ބެލިބެލުމުން އަދި އެ ދޯނި ފެނިފައެއް ނުވެއެވެ.
މި ދޯންޏާ ބެހޭ އެއްވެސް މަޢުލޫމާތެއް ލިބިއްޖެނަމަ އެމްއެންޑީއެފް ކޯސްޓްގާޑުގެ ހިލޭ ގުޅޭ ނަމްބަރު 191 ގުޅައި މަޢުލޫމާތު ހިއްސާކުރުމަށް އެމްއެންޑީއެފްއިން އެދިފައި ވެއެވެ.