ބައިނަލްއަޤްވާމީ މިންގަނޑަށް އެމްއެންޑީއެފުން ހިންގާ 12 ވަނަ ބޭސިކް ޑައިވިންގ ކޯސް ބޭރުގެ ފަސް ގައުމެއްގެ ސިފައިންނާއެކު ފަށައިފި އެވެ.
ގިރިފުށީ ޓްރެއިނިންގ ސެންޓަރުގައި އިއްޔެ މިކޯސް ފެށީ ޖުމްލަ 17 ސިފައިންނާއެކުގަ އެވެ. އޭގެ ތެރޭގައި ބަންގްލަދޭޝް، މެލޭޝިއާ، ނޭޕާލް، ސްރީލަންކާ އަދި ތުރުކިއޭގެ އަސްކަރިއްޔާއަށް ނިސްބަތްވާ ސިފައިން ހިމެނޭހެން، ބޭރުގެ އަސްކަރިއްޔާތަކުގެ 9 ސިފައިން ބައިވެރިވެފައި ވެއެވެ. އަދި އެމްއެންޑީއެފް ކޯސްޓްގާޑާއި، އެމްއެންޑީއެފް ޕްރެޒިޑެންޝަލް ގާޑްސްގެ ސިފައިންވެސް މީގެތެރޭގައި ހިމެނެއެވެ.
ތިންމަސް ދުވަހުގެ މުއްދަތަކަށް ކުރިޔަށްގެންދަން ހަމަޖެހިފައިވާ މި ކޯސް ހިންގަނީ އިނގިރޭސި މީޑިއަމަށެވެ. މި ކޯހުގައި ކިޔަވައިދިނުމަށް ހަމަޖެހިފައިވާ ބައިތަކުގެ ތެރޭގައި ޑައިވިންގެ ތާރީޚާއި، ފިޒިކްސް އެންޑް ފިޒިއޮލޮޖީ އޮފް ޑައިވިންއާއި، ޑައިވިންގ އޮޕަރޭޝަންގައި ބޭނުންކުރާނެ ޑައިވް އިކްއިޕްމަންޓްސްއާއި އެކްސެސަރީސް ބޭނުންކުރާނެ ގޮތާއި، ޑައިވިންގ ކޮމިއުނިކޭޝަނާއި ޑައިވް ޓޭބަލްސްގެ ބޭނުމާއި، ޑައިވިންގ ސޭފްޓީ އަދި ޑައިވިންގ ސަރޗް ޕެޓާންސްއާއި، ފިޒިކަލް ޓްރެއިނިންގ، ސްވިމިން އަދި ޑައިވިންގ ސްކިލްސް، ޑައިވިންގ ފަސްޓްއެއިޑް، މިޝަން ޕްލޭނިންގެ އިތުރުން ހާލުގައިޖެހޭ އުޅަނދުފަހަރު ސަލާމަތްކުރާނެ ގޮތުގެ ތަމްރީނާއި ތަޖުރިބާތައް ކޯހުގެ ބައިވެރިންނަށް ލައިދިނުމަށް ހަމަޖެހިފައިވާކަމަށް އެމްއެންޑީއެފުން ބުނެފައި ވެއެވެ.