ރާއްޖޭގެ އުތުރުގެ ސަރަހައްދުތަކުން އައިސް ނުލިބޭކަމަށް ބުނެ ބޮޑު ކަންނެލި މަސްވެރިންގެ ޔޫނިއަން(ބީކޭއެމްޔޫ) އިން ކަންބޮޑުވުން ފާޅުކޮށްފި އެވެ.
އެ ޖަމްއިންޔާއިން، އައިސް ނުލިބޭ މައްސަލައިގައި އެކްސްގައި ހިއްސާކުރި މެސެޖެއްގައި ބުނެފައިވަނީ ރާއްޖޭގެ އުތުރުގެ ސަރަހައްދުތަކުގައި ގިނަ އަދަަދެއްގެސް ކަންނެލި ދޯނިތަކެއް މަސްވެރިކަމުގައި ހަރަކާތްތެރިވަމުން އަންނަ ކަމަށެވެ. އެހެންނަމަވެސް އެދޯނިތަކަށް އައިސް ލިބޭނެ ގޮތެއް ނެތްކަމަށް ބުނެފައި ވެއެވެ.
އެ ޖަމްއިއްޔާއިން ބުނެފައިވަނީ ހއ. ހޯރަފުށީގައި ގާއިމުކޮށްފައިވާ އައިސް ޕްލާންޓުންވެސް އައިސް ނުލިބޭތާ އެތައް ދުވަހެއް ވެއްޖެކަމަށެވެ. އަދި ހއ އިހަވަންދޫގައި ގާއިމުކޮށްފައިވާ އައިސް ޕްލާންޓުންވެސް އައިސް ލިބޭނެކަމުގެ އެއްވެސް އުންމީދެއް ނެތް ކަމަށެވެ. ހޯރަފުށީ އައިސްޕްލާންޓުން އައިސް ނުލިބޭތާ، ދެމަސްވެފައިވާއިރު، އިހަވަންދޫ އައިސްޕްލާންޓުން އައިސް ދޫކުރަމުން ދަނީ ލިމިޓްކޮށްގެންނެވެ. އެެންކަމުން ދޯނިތަކަށް އައިސް ލިބުމުގައި ދަތިތަކެއް ހުރި ކަމަށް، ބޮޑު ކަންނެލި މަސްވެރިންގެ ޔޫނިއަނުން ބުނެފައި ވެއެވެ.
ހއ އިން އައިސް ނުލިބޭތީ މަސްވެރިން މިހާރު ތެޔޮ އަންދާފައި ދާންޖެހެނީ ށ. ކީކިމިނިންއަށް ނުވަތަ ނ. ޅޮހީއަށްކަމަށާއި، މިއީ މަސްވެރިންނަށް ވަރަށް ޚަރަދު ބޮޑު، އަދި ބޮޑުތަނުން ގެއްލުންވާކަމެއް ކަމަށްވެސް ބޮޑު ކަންނެލި މަސްވެރިންގެ ޔޫނިއަންއިން ބުނެފައި ވެއެވެ.
ބޮޑު ކަންނެލި މަސްވެރިންގެ ޔޫނިއަންވަނީ މިފްކޯއަށް ބޮޑުކަންނެލި ގަންނަން ފަށާނެކަމަށް ބުނެ އެކަން އެގޮތަށް ކުރިޔަށް ނުގެންދާތީ އެކަމާއިވެސް ކަންބޮޑުވުން ފާޅުކޮށްފަ އެވެ. އެ ޔޫނިއަނުން ބުނެފައިވަނީ ބޮޮޑު ކަންނެލީގެ އަގަކީ 80 ރުފިޔާ ކަމަށާއި، އޭ-ގްރޭޑް ނަމަ 100 ރުފިޔާ ހަމަޖެއްސަދެއްވާނެ ކަމަށް ސަރުކާރުން މީގެ ކުރިން ވައުދުވެފައިވާކަމަށެވެ. އަދި، ބޮޑުކަންނެލި މަސްވެރިންނަށް ވީވައުދުތައް ފުއްދުމަށް ކުރެވުނީ ކޮންކަމެއްތޯ ސުވާލު އުފައްދާފައި ވެއެވެ.