ހދ. މަކުނުދޫަ އައިސްޕްލާންޓް އޮޕަރޭޝަނަށް ގެނައުމާއި ގުޅޭގޮތުން މަޝްވަރާކޮށްފި އެވެ.
މިކަމާއި ގުޅޭ މަޝްވަރާކޮށްފައިވަނީ، ހދ. މަކުނުދޫ ކައުންސިލަރުންނާއެކު، ފިޝަރީޒް މިނިސްޓްރީގެ ސްޓޭޓް މިނިސްޓަރ މުޙައްމަދު މުއްތަލިބު މިއަދު ބޭއްވެވި ބައްދަލުވުމެއްގަ އެވެ.
ފިޝަރީޒް މިނިސްޓްރީ ބުނީ، މި ބައްދަލުކުރެއްވުމުގައި މަކުނުދޫ އައިސްޕްލާންޓް އޮޕަރޭޝަނަށް ގެނައުމާއި މަކުނުދޫ ކައިރީގައި ވަދު ކަނދުފައްޗެއް ގާއިމު ކުރުމާ ގުޅޭ ގޮތުން މަޝްވަރާ ކުރެއްވި ކަމަށެވެ.
ހދ. މަކުނުދޫ އައިސް ޕްލާންޓާ ސަރުކާރުން ހަވާލުވީ ނިމިދިޔަ މާޗްމަހުގެ ކުރީ ކޮޅެވެ. އޭރު ފިޝަރީޒް މިނިސްޓްރީން ބުނީ އައިސް ޕްލާންޓާ ސަރުކާރުން ހަވާލުވެ، މިހާރު އެ އޮޕަރޭޝަނަށް ގެނައުމުގެ މަސައްކަތް ފަށާފައިވާ ކަމަށެެވެ. އެހެންނަމަވެސް އެކަމުގެ ތަފުސީލެއް ނުދެއްވަ އެވެ.
މިއީ، އުތުރުގެ މަސްވެރިންނަށް ދިމާވެފައިވާ އައިސް ލިބުމުގެ ދަތިކަން ހައްލުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން މިނިސްޓްރީން ފެށި ކަމެކެވެ.
ހދ. މަކުނުދޫގައި އައިސް ޕްލާންޓް ގާއިމުކޮށް އޮޑިފަހަރުތަކަށް އައިސް ދޫކުރަން ފެށީ 2018 ވަނަ އަހަރުގެ ފެބްރުއަރީ މަހުގެ ތެރޭގައެވެ. ފުޅާ ދާއިރާއެއްގައި މަސްވެރިކަން ކުރުމަކުންދާ މަކުނުދޫގައި އައިސް ޕްލާންޓް ގާއިމްކުރީ ސީ ޓްރެޒަރސް މޯލްޑިވްސް ނަމަކަށްކިޔާ ކުންފުންޏަކާއި ހަވާލުކޮށްގެންނެވެ. އޭރު، އައިސް ޕްލާންޓް ހިންގުމާއި ހަވާލުކޮށްފައިވަނީ ވެސް އެކުންފުންޏާއެވެ.
މި އައިސް ޕްލާންޓް ގާއިމުކޮށްފައިވަނީ މަކުނުދޫގެ އުތުރު ފަރާތުގެ ހުރަސް ޖެޓީގަ އެެވެ.