ފިޝަރީޒް މިނިސްޓަރު އަހްމަދު ޝިޔާމާއި ސީދާ ވަގުތުން ވަގުތަށް ސުވާލު ކޮށްލަން ބޭނުންވާނަމަ، ހުރިހާ މަސްވެރިންނަށް މިރޭ އެފުރުސަތު އެބައޮތެވެ.
ސަރުކާރުން ސީދާ ވަޒީރުންނާއި ސުވާލު ކުރެވޭގޮތަށް ބާއްވާ ”އަހާ“ ފޯރަމްގެ ދެވަނަ ބައްދަލުވުން އޮންނާނީ މިރޭ 08:30 ގަ އެވެ. ފޯރަމް ކުރިޔަށްދާ ވަގުތު އެތަނަށްގޮސްވެސް ސީދާ ސުވާލުކޮށްލެވޭނެއެވެ. އަދި ނުދެވޭނަމަ، އެސްއެމްއެސް މެދުވެރިކޮށް މިނިސްޓަރާއި ބޭނުންވާ ސުވާލެއްވެސް ކުރެވިދާނެއެވެ.
ސުވާލު ފޮނުވުމުގެ ފުރުސަތު މީގެ ތިން ދުވަސް ކުރިން އޮތީ ހުޅުވާލާފަ އެވެ. ސުވާލުތައް ފޮނުވަން AH ޖަހާފައި ބޭނުންވާ ސުވާލު ލިޔެފައި 300 އަށް އެސްއެމްސްކޮށްލާށެވެ.
މިރޭގެ ފޯރަމްގައި ފަސް މިނިސްޓަރަކު ބައިވެރިވެވަޑައިގަންނަވާނެ އެވެ. އެއީ،ފިޝަރީޒް މިނިސްޓަރު އަހުމަދު ޝިޔާމްގެ އިތުރުން، ޓްރާންސްޕޯޓް މިނިސްޓަރު މުޙައްމަދު އަމީނާއި، ހޯމްލޭންޑް މިނިސްޓަރު އަލީ އިހުސާނާއި، ހަޔާ އެޑިއުކޭޝަން މިނިސްޓަރު ޑރ. މަރްޔަމް މާރިޔާ އާއި ޔޫތު މިނިސްޓަރު އިބްރާހީމް ވަހީދެވެ.
ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިޔާ (ޕީއެސްއެމް) ގުޅިގެން ބާއްވާ ފޯރަމަކީ، ސަރުކާރުން ކުރިއަށް ގެންދާ މަސައްކަތްތަކާ ބެހޭ މަޢުލޫމާތު ވަޒީރުންގެ ފަރާތުން ރައްޔިތުންނަށް ދެއްވުމަށާއި، ރައްޔިތުންގެ ސުވާލުތަކަށް ސީދާ ވަޒީރުން ޖަވާބު ދެއްވުމަށް ފުރުޞަތު ދިނުމުގެ ގޮތުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިއުލާނު ކުރައްވައިގެން ކުރިޔަށް ގެންދަވާ ފޯރަމެކެވެ. މިކަމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެއްގެ އިތުރުން، އެމަނިކުފާނުގެ ސަރުކާރުން ވީހާވެސް ރައްޔިތުންނާ ގާތުން މަސައްކަތް ކުރެއްވުމަށާއި، ވީހާވެސް ހާމަކަން ބޮޑު ގޮތެއްގައި ސަރުކާރުގެ މަސައްކަތްތައް ކުރިއަށް ގެންދިއުމަށް ބާރު އެޅުއްވުމުގެ ގޮތުން ކުރައްވާ މަސައްކަތްޕުޅެކެވެ.