ހދ. ވައިކަރަދޫ ފަޅުތެރެއަށް ވަންނަ މުށިމަސް މަރުވެ، ކުނިވާ މައްސަލައަށް ދާއިމީ ހައްލެއް ހޯދުމަށް މަސައްކަތް ކުރައްވަމުން ގެންދަވާ ކަމަށް ލޯކަލް ކައުންސިލްތަކާއި ބެހޭ މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
މިކަމާއި ގުޅޭގޮތުން މިނިސްޓަރު ވިދާޅުވެފައިވަނީ ވައިކަރަދޫ ފަޅުތެރެއަށް ވަންނަ މުށިމަސް އެތާ ތާށިވެ މަރުވަމުންދާ މައްސަލައާއި ގުޅިގެން ކައުންސިލްގެ ރައީސް ޒާމިރް އާ ވާހަކަ ދައްކައި ދާއިމީ ހައްލެއް ހޯދުމަށް ސަރުކާރާއި ގުޅިގެން ކުރައްވަމުން ގެންދަވާ ކަންކަމާއި ގުޅޭގޮތުން މައުމޫމާތު އެއްކުރެއްވި ކަމަށެވެ. އަދި އެކަމާއިގުޅޭ ވުޒާރާތަކާ އިތުރަށް މަޝްވަރާ ކުރައްވާނެކަމަށް ވިދާޅުވެފައި ވެއެވެ.
މިދިޔަ ބުރާސްފަތި ދުވަހުގެރޭ ވައިކަރަދޫ ފަޅަށް ގިނަ އަދަދެއްގެ މަސްތައް ވަނެވެެ. އަދި، ފަޅުތެރެ އަށް ވަތް އެތައްހާސް މަހެއް ފަޅުގައި ތާށިވެ، ކުނިވެގެން ކައުންސިލާއި ރައްޔިތުން ގުޅިގެން ސާފުކުރި އެވެ.
މިކަން މިހެން ދިމާވަނީ އެރަށު ބަނދަރު ހަނދާފައި އޮތްގޮތުން އޮއެނުދެމޭތީ އާއި ފަޅުތެރެއަށް ވަންނަ މަހަށް ބޭނުންވާ މިންވަރަށް ފަޅުގައި އޮކްސިޖެން ނުހުންނާތީ ކަމަށް ވައިކަރަދޫ ކައުންސިލުން ބުނެފައި ވެއެވެ. އެހެންކަމުން މިކަމަށް އޮތް ދާއިމީ ހައްލަކީ އެތެރެ ތޮށްޓާއި ބޭރު ތޮށި މާރާމާތު ކުރުމެވެ. މިކަން ކުރުމަށް މިއަހަރުގެ ދައުލަތުގެ ބަޖެޓުގައި ވަނީ ހިމަނާފަ އެވެ.
ވައިކަރަދޫ ބަނދަރަކީ މައުމޫން ސަރުކާރުގައި ތަރައްގީ ކޮށްފައިވާ ބަނދަރެކެވެ. އެތަން ބަދަލުކޮށްފައި ނުވަނީ އެރަށު ރައްޔިތުން ބޭނުންވެގެންނެވެ. އެހެންނަމަވެސް ފަޅު މިހާރު އޮތްގޮތުން ކުރިމަތިވަމުން އަންނަ މައްސަލަތަކާއި ގުޅިގެން ރަށު ރައްޔިތުން މިހާރު ބޭނުންވަނީ ދިމާވާ މައްސަލަ ހައްލުކުރުމަށް ބަނދަރަށް ބަދަލު ގެނައުމަށެވެ.