މި ދުވަސް ވަރު ކަނޑުމަހާ ކަންނެލި ވާވަރަށް ނުލިބޭކަމަށް އެންސިސް ފިޝަރީޒް އިން ބުނެފި އެވެ.
އެންސިންއިން ބުނީ، އެތަނުގެ ކެޕޭސިޓީއަކީ، ދުވާލަކު 50 ޓަނު ކަނޑުމަސް އަދި 30 ޓަނު ކަންނެލި މަސްކަމަށާއި، އެހެންނަމަވެސް، އެ ބޭނުންވާވަރަށް އެ ދެބާވަތުގެ މަސްވެސް ނުލިބޭކަމަށެވެ.
އެކުންފުނިން މި ވަގުތު ކަނޑު މަސް ގަންނަމުން ދަނީ، 1 ކިލޯއަށްވުރެ ބޮޑެތި މަސް، ކިލޯއެއް 16 ރުފިޔާގެ ރޭޓުންނެވެ. ކަންނެލީގެ އަގުތަކަށް ބަލާއިރު، 30 ކިލޯއަށް ވުރެ ބަރުދަން ލުއި ކަންނެލި ކިލޯއެއް އެވްރެޖްކޮށް 40 ރުފިޔާގެ ރޭޓުންނެވެ. އަދި، 30 ކިލޯއަށް ވުރެ ބަރު ކަންނެލި ކިލޯއެއް އެވްރެޖްކޮށް 70 ރުފިޔާގެ ރޭޓުންނެވެ.
އެންސިސްގެ ކޮމާޝަލް ޑައިރެކްޓަރު ހުސައިން އަފީފް ވިދާޅުވީ، ކަންނެލި ކިލޯއެއް މިވަގުތު އެވްރެޖްކޮށް 40 ރުފިޔާއަށް ގަތްނަމަވެސް އެއީ ދެކޮޅު ޖެހޭ އަގެއް ނޫންކަމަށެވެ.
”ބައެއް ކުންފުނިތަކަށް އެދުވަހަކަށް ބޭނުންވާވަރު 45 ރުފިޔާއަށްވެސް ގަންނަމުންދޭ. ގިނަ ކުުންފުނިތަކުން އެވްރެޖްކޮށް 40 އަށް އެގަންނަނީ.އެއީ، ފްރީޒްކުރަން ގަންނަން ބޮޑުއަގެއް. އެހެންނަމަވެސް، އެއަގުގައި ގަންނަނީ މަސްވެރިންނަށް ހިތްވަރު ދިނުމުގެ ގޮތުން.“ ހުސެން ވިދާޅުވި އެވެ.
ހުސެން ފާހަގަކުރާގޮތުގައި، މިދުވަސްރު ކަންނެލި މަސްވެރިކަން ވަރަށް ދަށެވެ. ކަންނެލި މަސްވެރިކަންކުރާ އޮޑިފަހަރު ގިނަ ނަމަވެސް، ކަންނެލި ނުލިބޭތީ މަސްވެރިން ބޭރަށް ނުގޮސް، ބޮއެ ކައިރީ އަޅައިގެން ބޭނެނީ ވަރަށް ކުދި ސައިޒުގެ މަސްކަމަށް ހުސެން ވިދާޅުވި އެވެ.
”ކަންނެލި މަސްވެރިކަން މިއޮތީ ވަރަށް ދަށްވެފަ. ގާތްގަނޑަކަށް ހުއްޓޭ ހިސާބުގައި. އެއްވެސް ގޮތަކަށް ކޯމަސް އައިނުގައި މިއުޅޭ ކަންނެލި މިހާރު ނުފެންނަވާހަކަ މަސްވެރިން ބުނަނީ. އެ ނުލިބޭތީ މަސްވެރިންވެސް ތެޔޮ އަންދާފަ މިހާރު ބޭރަކަށް ނުދޭ. ބޮއި ކައިރިން ކުދި ކުދި ކަންނެލި ތަކެއް ބާނައިގެން، އެމީހުންގެ ސަވައިވަލްއަށް އެ މަސައްކަތް ކުރަނީ. ބޮއެ ކައިރިން ބާނާ ކަންނެލީގެ ކޮލިޓީވެސް ވަރަށް ދަށް. ސައިޒުތައްވެެސް ވަރަށްކުޑަ. 18-20ކިލޯއާ ދޭތެރޭ މިއުޅެނީ.“ ހުސެން ވިދާޅުވި އެވެ.
ހުސެން ވިދާޅުވީ، އެކްސްޕޯޓްކުރަން ބަލާއިރު، މަސް ގަންނަ ބޭރުގެ ގިނަ ފެކްޓަރީތަކުން ބޭނުންވަނީ ބޮޑެތި ކަންނެލި ކަމަށެވެ. އެހެންކަމުން މިހާރު ގަންނަ ކުޑަ ކަންނެލީގެ ބޮޑުބައެއް އެކްސްޕޯޓް ކުރަނީ ޗަންކްސްގެ ގޮތުގައި ގަނޑުކޮށްގެން ކަމަށެވެ.
”ރާއްޖެއިން ބޭރުގެ މަސްގަންނަ ފަރާތްތަކުން އެބަ ބޭނުންވޭ ބޮޑެތި ކަންނެލި. އެންމެ ބޮޑު ގޮންޖެހުމަކީ މިހާރު އެސައިޒްގެ ކަންނެނި ނުލިބޭކަން. މިހާރު މިގެންނަ ހުރިހައި ކަންނެލި މަސް ދޯނިތަކުން މިގެންނަ ސައިޒަކީ ފްރެޝްކޮށް ނުވަތަ ޗިލްޑްކޮށް، އެކްސްޕޯޓް ކުރެވޭ ވަރުގެ ސައިޒަތަކަށް ނުވެފައި، ބޮޑުބައި އެކްސްޕޯޓް ކުރަން މިޖެހެނީ ފްރީޒްކޮށްގެން. އޭގެ މާނައަކީ ގަނޑުކޮށްފަ ފޮނުވާ ޕްރޮޑަކްޓްތަކަކަށް ވެގެން މިދަނީ.“ ހުސެން ވިދާޅުވި އެވެ.
މަސްވެރިން ކިރާ މަހަކީ ކޮލިޓީ އަދި ރަނގަޅު ޓެމްޕަރޭޗާގައި ރައްކާކުރެވި ފެކްޓަރީއާ ހަމަޔަށް ގެންދެވޭ މަހަކަށް ހެދުމަށް، އެންސިންއިން ދަނީ މަސްވެރިންނަށް ހިލޭ އައިސް ފޯރުކޮށްދެމުންނެވެ. އެގޮތުން، ކޮންމެ އޮޑިއަކަށް ކިރާ 1 ޓަނުގެ މަހަށް، ތިން ޓަނުގެ އައިސްގެ މަގުން އެވްރެޖްކޮށް ދަނީ އައިސް ދޫކުރަމުންނެވެ.