ޕްރައިވެޓައިޒޭޝަން އެންޑް ކޯޕޮރޮޓައިޒޭޝަން ބޯޑް(ޕީސީބީ)އިން މިފްކޯގެ ސީއީއޯ އަހްމަދު ޝަމާހް ރަޝީދުގެ ސަސްޕެންޝަން އުވާލައިފި އެވެ.
35 ދުވަހު މަގާމުން އެކަހެރި ކުރުމަށްފަހު އިއްޔެ ވަނީ ސަސްޕެންޝަން އުވާލިކަން ލިޔުމުން ޝަމާހުއަށް އަންގާފަ އެވެ. އަދި ކުންފުނީގެ ހުރިހައި ކަމެއްވެސް މިފްކޯގެ ބޯޑުގެ މެދުވެރިކޮށް ކުރިޔަށްގެންދިއުމަށް ޕީސީބީން ޝާމާހުއަށް އިރުޝާދު ދީފައި ވެއެވެ.
ޕީސީބީން ވަނީ ޝާމާހުގެ ސަސްޕެންޝަންގެ މުއްދަތުގައި އެކުންފުނީގެ އޮޕަރޭޝަންތައް ހިންގަން އުފެއްދި ވަގުތީ ކޮމިޓީވެސް އުވާލާފަ އެވެ.
މުސާރައާއި އިނާޔަތް ނުހިނގާގޮތަށް ޝަމާހް ވަގުތީ ގޮތުން މަގާމުގެ މަސްއޫލިއްޔަތުތަކުން ސާދަ ދުވަހުގެ މުއްދަތަށް އެކަހެރިކޮށްފައިވަނީ މާޗް މަހުގެ 18 ވަނަ ދުވަހުއެވެ. އެމުއްދަތު ހަމަވީ އެމަހުގެ 31 ވަނަ ދުވަހަށެވެ. އެހެންކަމުން ޕީސީބީ ބޯޑުން އެދުވަހު ނިންމީ މުސާރައާއި އިނާޔަތް ހިނގާގޮތަށް ސަސްޕެންޝަން މުއްދަތު މިމަހުގެ 1 ވަނަ ދުވަހުން ފެށިގެން 21 ވަނަ ދުވަހާ ހަމަޔަށް އިތުރު ކުރުމަށެވެ. ޕީސީބީ އިން ބުނީ، ސަސްޕެންޝަންގެ ފުރަތަމަ ސާދަ ދުވަހުގެ މުސާރައާއި އިނާޔަތްތައް، ޝަމާހް މައްޗަށް އިންކުއަރީ ހިންގަމުންދާ ކަންތައްތައް ސާބިތު ނުވެއްޖެނަމަ އިޔާދާވާނެކަަމަށެވެ.
ޕީސީބީއިން ޝަމާހް ސަސްޕެންޑްކޮށްފައިވަނީ އޭނާއާ ގުޅޭގޮތުން ޕީސީބީގެ ވިޒްލްބްލޯވަރ ޕޯޓަލްއިންނާއި، އެ ބޯޑަށް ހުށަހެޅިފައިވާ މައްސަލަތަކާއި ގުޅިގެން އިންކުއަރީއެއް ހިންގުމަށްޓަކައި، ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ސުލޫކީ މިންގަޑާއި ޝަކުވާ ހުށަހެޅުމާއި، އަދި ފިޔަވަޅު އެޅުމާއި ބެހޭ އުސޫލުގެ 25 ވަނަ މާއްދާގެ (ށ) ގެ އެއްވަނަ ނަންބަރުގައިވާ ހާލަތައް ރިއާޔަތްކޮށްކަމަށް ޕީސީބީން ބުނެފައި ވެއެވެ.
ޕީސީބީން ޝަމާހުގެ މައްޗަށް ތުހުމަތުކުރި ކަންތައްތަކުގެ ތެރޭގައި، ކުންފުނީގެ މުދަލާއި ވަސީލަތްތައް އަމިއްލަ ބޭނުމުގައާއި ސިޔާސީ ބޭނުންތަކަށް ފާޅުކަންބޮޑު ގޮތެއްގައި ބޭނުންކުރުމާއި، ކުންފުނީގެ ދާއިމީ މުވައްޒަފުން ނުހައްގުން ވަޒިފާގެ މަސްއޫލިއްޔަތުން ދުރުކުރުމާއި, ވަޒީފާގެ ބިރުދެއްކުމާއި, ދާއިމީ މަގާމްތަކުގައި ތިއްބެވި މުވައްޒަފުންނަށް ވަޒީފާއާބެހޭ ގާނޫނާއި ޚިލާފުވާ ސަބަބެއްނެތި މަގާމާއި މުސާރަ ދަށްކުރުމާއި, ސަބަބެއް ނެތި އެހެން ޑިޕާޓްމަންޓްތަކަށާއި, ކުންފުނީގެ ސައިޓުތައް ހުންނަ ރަށްރަަށަށް ބަދަލުކުރުން ހިމެނެއެވެ.
މީގެ އިތުރުން، ކުންފުނީގެ މުވައްޒަފުން ނެގުމާއި ގުޅޭގޮތުން ހަދާފާއިވާ ޕޮލިސީތަކާއި މުސާރައިގެ އޮނިގަޑާއި ޚިލާފަށް ސީއީއޯގެ އާއިލީ ގުޅުންހުރި ފަރާތްތަކަށާއި, ރައްޓެހިންނަށް ބަޖެޓް ހަމަޖެހިފައި ނުވަނީސް ވަޒީފާ ދިނުމާއި، ބެސްޓު ޕްރެކްޓިސްއާއި ގަވަރނަންސް އުސޫލުތަކާއި ޚިލާފަށް ހެޑް ހަންޓް ކުރުމުގެ ނަމުގައި މުވައްޒަފުންގެ ގަވާއިދާއި ޚިލާފަށް, އެއްވެސް ޝަރުތަކަށް ބެލުމެއްނެތި, އާންމުކޮށް އިއުލާން ކުރުމަކާނުލާ, އިޖުރާތުތައް ފުރިހަމަނުކޮށް މުވައްޒަފުން ވެއްދުމާއި، ޕީސީބީގެ ހުއްދަ ހޯދުމަކާނުލާ, ކުންފުނީގެ މަގާމްތައް އުފައްދާ, އެމަގާމްތަކަށް މީހުން ވެއްދުމާއި، އުސޫލުތަކާއި ޚިލާފަށް, އެކަށީގެންވާ ތައުލީމާއި ތަޖުރިބާ ނެތް ފަރާތްތައް ޑިޕާޓްމަންޓްތަކުގެ ވެރިންނަށް ލުންވެސް ފާހަނގަކޮށްފައި ވެއެވެ.
ޝާމާހުވަނީ މިހުރިހައި ކަމަކަށް އިންކާރުކޮށްފައެވެ. ޕީސީބީން ވަނީ ޝާމާހުގެ މައްސަލަތައް ބެލުމަށް އިންކުއަރީއެއް ހިންގާފައެވެ. އެހެންނަމަވެސް އެކަމާއި ގުޅޭ ތަފުސީލެއް ހާމަކޮށްފައެއް ނުވެއެވެ.