ރާއްޖޭގެ ތިން ސަރަދެއްގައި އަލަށް ގާއިމުކުރުމަށް ސަރުކާރުން މަސައްކަތް ކުރަމުންދާ މަސް ބަންދުކުރާ ފެކްޓަރީތަކުގެ މަސައްކަތްތައް ކުރިޔަށްގެންދާނޭ ގޮތްތަކާމެދު މަޝްވަރާކުރުމަށް ފިޝަރީޒް މިނިސްޓްރީން ބައްދަލުވުމެއް ބާއްވައިފި އެވެ.
ފިޝަރީޒް މިނިސްޓްރީން ބުނީ، މިއަދު ބޭއްވެވި މި ބައްދަލުވުމުގައި ފިޝަރީޒް މިނިސްޓަރ އަހްމަދު ޝިޔާމާއި، މިނިސްޓްރީގެ އިސްވެރިންނާއި، ޗައިނާގެ ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަންގެ ޗެއަރމަން ލީޖިއަންހުއާ އާއި އެކުންފުނީގެ އިސްވެރިންގެ ވަފްދެއް ބައިވެރިވަޑައިގެންނެވި ކަމަށެވެ.
މި ބައްދަލުވުމުގެ މައިގަނޑު ބޭނުމަކީ، ދިވެހިރާއްޖޭގައި މަސް ލޭންޑިންގ، ޕްރޮސެސިންގ އެންޑް ސްޓޯރޭޖް ފެސިލިޓީސް ތަރައްޤީކޮށް ފައިނޭންސް ކުރުމަށް ޗައިނާގެ ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަނާއެކު މިމަހުގެ 14 ވަނަ ދުވަހު ފިޝަރީޒް މިނިސްޓްރީން ސޮއިކުރި އެއްބަސްވުމުގައިވާ މަސައްކަތްތައް ރާވާ ކުރިޔަށް ގެންދިއުމާ ގުޅޭގޮތުން މަޝްވަރާކުރުމެވެ.
މި ބައްދަލުވުމުގައި މިނިސްޓަރު ވަނީ އިޖާދީގޮަތަކަށް، އިޔާދަކުރަނިވި ހަކަތައިގެ އެހީގައި އޮޕަރޭޓްކުރާ ގޮތަށް ޕްރޮޖެކްޓް ބައްޓަންކުރުމުގެ ބޭނުންތެރިކަމަށް އަލިއަޅުވާލައްވާފަ އެވެ. މިއީ، ރާއްޖޭގެ މަސްވެރިކަމުގެ ސިނާއަތު ދުނިޔޭގެ އެންމެ ތިމާވެއްޓާއި ރަށްޓެހި ސިނާއަތައް ހެދުމަށް އެހީތެރިވެދޭނެ ކަމެއްގެގޮތުގައި މިނިސްޓަރު ފާހަނގަކުރެއްވި އެވެ.
މި ބައްދަލުވުމުގައި، ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަންގެ ޗެއަރމަން ވަނީ ވަރަށް އަހައްމިއްޔަތުކަންދީގެން މަޝްރޫއުގެ މަސައްކަތްްތައް ކުރިޔަށް ގެންދަވާނެކަމަުގެ ޔަގީންކަން މިނިސްޓަރަށް އަރުވާފައެވެ. އަދި އަމާާޒަކީ 2025 ވަނަ އަހަރު ނިމެންވާއިރަށް މަޝްރޫއުގެ މަސައްކަތް އެއްކޮށް ނިންމާލުންކަމަށް ވިދާޅުވި އެވެ.
ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަންއާއެކު ވެވުނު އެއްބަސްވުމުގެ ދަށުން، ދ. މާދެލި، ގދ، ފިޔޯއަރީ އަދި ޅ. ފެލިވަރުގައި މަސްވެރިކަމާ ގުޅުންހުރި މުހިންމު މަޝްރޫއުތަކެއް ކުރިޔަށް ގެންދިއުމަށް ވަނީ ހަމަޖެހިފައި ވެއެވެ. އެގޮތުން، ފެލިވަރުގައި 38 އަހަރު ވެފައިވާ ކޭނަރީގެ ބަދަލުގައި ދުވާލަކު 100 ޓަނުގެ މަސް ބަންދުކުރެވޭނެ ކާރުޚާނާއެއް ތަރައްގީ ކުރުމަށް ވަނީ ނިންމާފައެވެ.
މީގެ އިތުރުން ދ. މާދެލީގައި ދެ ފިޔަވައްސަކަށް ބަހާލައިގެން މަޝްރޫއުތައް ކުރިޔަށްގެންދިއުމަށް ހަމަޖެހިފައިވާކަމަށް ފިޝަރީޒް މިނިސްޓްރީން ބުނެފައިވެއެވެ. އެގޮތުން، ފުރަތަމަ މަރުހަލާގައި މަސްކިރުމަށާއި، ކެރިއާ ބޯޓުތަކަށް ލޭންޑިންގެ ފެސިލިޓީއަކާއެކު ޚާއްސަ ބަނދަރެއް ތަރައްގީކުރުމާއި، އެކޮމޮޑޭޝަން ގާއިމުކުރުމާއި، މަގުތައް ތަރައްގީ ކުރުން ހިމެނެއެވެ. އަދި، މަސްގަނެ ފިނިކުރެވޭނެ ފެސިލިޓީއެއް ގާއިމުކުރުމާއެކު، 1،500 ޓަނުގެ މަސް ރައްކާކުރެވޭނެ ކޯލްޑް ސްޓޯރޭޖެއް ގާއިމުކުރުން ހިމެނެއެވެ. ދެވަނަ ފިޔަވަހީގެ މަސައްކަތުގެތެރެއިން ދުވާލަކު 50 ޓަނުގެ މަސް ބަންދު ކުރެވޭ ފެންވަރުގެ ފެކްޓަރީއެއް ތަރައްގީ ކުރުމަށް ވަނީ ނިންމާފަ އެވެ.
މި އެއްބަސްވުމުގެ ދަށުން، ގދ. ފިޔޯރީގައި، 3،000 ޓަނުގެ ކޯލްޑް ސްޓޯރޭޖްއެއް ގާއިމުކޮށް، ބްރައިން، އަދި ބްލާސްޓް ފްރީޒިން ފެސިލިޓީއެއް ގާއިމުކުރުން ހިމެނެއެވެ. އަދި، ދުވާލަކު 100 ޓަނުގެ މަހާއި، މަހުގެ ކާނާ އުފައްދާ ކާރުޚާނާއެއްގެ ގާއިމުކުރުމުގެ އިތުރުން ރިހާކުރު އުފައްދާ ފެސިލިޓީއެއް ތަރައްގީކުރާނެ ކަމަށް ފިޝަރީޒް މިނިސްޓްރީން ބުނެފައި ވެއެވެ.