މިފްކޯގެ ސީއީއޯ އަހްމަދު ޝަމާހް ރަޝީދުގެ ސަސްޕެންޝަން މުއްދަތު ހަމަވެއްޖެއެވެ.
ޕްރައިވެޓައިޒޭޝަން އެންޑް ކޯޕޮރޮޓައިޒޭޝަން ބޯޑް(ޕީސީބީ)އިން ޝަމާހް ސަސްޕެންޑްކޮށްފައިވަނީ އޭނާއާ ގުޅޭގޮތުން ޕީސީބީގެ ވިޒްލްބްލޯވަރ ޕޯޓަލްއިންނާއި، އެ ބޯޑަށް ހުށަހެޅިފައިވާ މައްސަލަތަކާއި ގުޅިގެން އިންކުއަރީއެއް ހިންގުމަށްޓަކައި، ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ސުލޫކީ މިންގަޑާއި ޝަކުވާ ހުށަހެޅުމާއި، އަދި ފިޔަވަޅު އެޅުމާއި ބެހޭ އުސޫލުގެ 25 ވަނަ މާއްދާގެ (ށ) ގެ އެއްވަނަ ނަންބަރުގައިވާ ހާލަތައް ރިއާޔަތްކޮށްކަމަށް ޕީސީބީން ބުނެފައި ވެއެވެ.
މުސާރައާއި އިނާޔަތް ނުހިނގާގޮތަށް ޝަމާހް ވަގުތީ ގޮތުން މަގާމުގެ މަސްއޫލިއްޔަތުތަކުން ސާދަ ދުވަހުގެ މުއްދަތަށް އެކަހެރިކޮށްފައިވަނީ މާޗް މަހުގެ 18 ވަނަ ދުވަހުއެވެ. އެމުއްދަތު ހަމަވީ އެމަހުގެ 31 ވަނަ ދުވަހަށެވެ. އެހެންކަމުން ޕީސީބީ ބޯޑުން އެދުވަހު ނިންމީ މުސާރައާއި އިނާޔަތް ހިނގާގޮތަށް ސަސްޕެންޝަން މުއްދަތު މިމަހުގެ 1 ވަނަ ދުވަހުން ފެށިގެން 21 ވަނަ ދުވަހާ ހަމަޔަށް އިތުރު ކުރުމަށެވެ. ޕީސީބީ އިން ބުނީ، ސަސްޕެންޝަންގެ ފުރަތަމަ ސާދަ ދުވަހުގެ މުސާރައާއި އިނާޔަތްތައް، ޝަމާހް މައްޗަށް އިންކުއަރީ ހިންގަމުންދާ ކަންތައްތައް ސާބިތު ނުވެއްޖެނަމަ އިޔާދާވާނެކަަމަށެވެ.
މިމަހުގެ 21 ވަނަ ދުވަހަށް ސަސްޕެންޝަންގެ މުއްދަތު ހަމަވިނަމަވެސް ޝަމާހް އަދި ވަޒީފާއަށް ނުނިކުމެއެވެ. ކެޔޮޅާއާ ވާހަކަދައްކަމުން ޝާމާހް ވިދާޅުވީ ޕީސީބީން ވަކިގޮތެއް އަދި އަންގާފައި ނުވާތީ މަޑުކޮށްލައިގެން ހުންނެވީކަމަށެވެ.
ޕީސީބީއިން ޝަމާހްގެ ސަސްޕެންޝަނާމެދު ނިންމިގޮތެއް އަދި ހާމަކޮށްފައެއް ނުވެއެވެ. މިކަމުގެ ތަފްސީލު ހޯދާލުމަށް ޕީސީބީގެ އިންފޮމޭޝަން އޮފިސަރަށް ގުޅާލީމެވެ. އެހެންނަމަވެސް ފޯނު ނުނަންގަވަ އެވެ.