ރޭއްސުރެ ގެއްލިގެން ހޯދަމުންދާ މަޑުއްވަރީ ފަރިހި-2 ދޯންޏާއި އޭގައި ތިބި މީހުން ހޯދުމަށް އެމްއެންޑީއެފް ކޯސްޓްގާޑުން ރޭ ފެށި އޮޕަރޭޝަން އަދިވެސް ހުއްޓާނުލާ ކުރިޔަށް އެބަގެންދެއެވެ.
ދޯނީގެ ވެރިފަރާތްކަމުގައިވާ އިބްރާހިމް ފައިސަލް ބުނީ އަދިވެސް އެމީހުން ނުފެންނަކަމަށް ކޯސްޓްގާޑުން ބުނިކަމަށާއި، ސީދާ ދޯނި ދިޔަ ސަރަހައްދު ނޭނގޭތީ އަދިވެސް ހޯދަމުން އަންނަ ކަމަށެވެ. އަދި އޮޕަރޭޝަން ހުއްޓާނުލާ ކުރިޔަށް ގެންދާނެކަމަށް ފުލުހުންނާއި ކޯސްޓްގާޑުން ބުނެފައިވާ ކަމަށް އިބްރާހިމް ބުންޏެވެ.
”ރަތްމަންދޫ ފަރުމައްޗާ އެއްކޮށް ވަރަށް ބޮޑު ސަރަހައްދެއް ބަލައިފިކަމަށް ބުނި. ބޮއި އޮތް ސަރަހައްދުވެސް ބަލައިފިކަމަށް ބުނީ. އެމީހުން ނުފެންނަކަމަށް. ޑްރޯންވެސް އެސަރަހައްދުގައި އެބައުޅޭ. ފުލުހުންނާއި ކޯސްޓްގާޑާށް އިތުބާރުކުރަން.“ އިބްރާހިމް ބުންޏެވެ.
ފަރިހި-2 ދޯނި ހޯދުމުގެ މަސައްކަތް ފުލުހުން ފެށީ، ދޯނީގެ ޚަބަރެއްނުވެ ވީނުވީއެއް ނޭނގި ގެއްލިފައިވާކަމުގެ މަޢުލޫމާތު ހުކުރު ދުވަހުގެ 22:06 އެހާކަންހާއިރު ދޯނީގެ ވެރިފަރާތުން ރިޕޯޓްކުރުމާއި ގުޅިގެންނެވެ. ހާދިސާގެ މަޢުލޫމާތު ލިބުމާއެކު މ. އަތޮޅު ފުލުހުންގެ ލޯންޗުން، ދޯންނާއި މީހުން ހޯދުމުގެ މަސައްކަތް ފަށައި އެމްއެންޑީއެފް ކޯސްޓްގާޑާވެސް އެ ޚަބަރު ހިއްސާކުރި އެވެ.
އެ ޚަބަރު ލިބުމާއެކު، އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑް ތާޑް ސްކޮޑްރަންއިން، އެ ދޯނި ހޯދުމުގެ މަސައްކަތް ފެށިއެވެ. މ. މުލީގައި އޮންނަ ”ކޯސްޓްގާޑް ހާބަރ ކްރާފްޓް 114“ އިން ދޯނި ހޯދުމުގެ މަސައްކަތް ފެށީ ރޭ 23:20 ގަ އެވެ. އަދި، ދަންވަރު 2 ޖަހާއެހާކަންހާއިރު، އެމްއެންޑީއެފް ވައިގެ ބާރުން އެ ދޯނި ހޯދުމަށްޓަކައި ”ޔޫއޭވީ“ ޑްރޯން، ދޯނި ގެއްލުނުކަމަށް ބުނާ ސަރަހައްދަށް އުދުއްސާލި އެވެ. އަދިވެސް އޮޕަރޭޝަނުގައި ދަނީ ޑްރޯން ބޭނުންކުރަމުންނެވެ.
ޑައިވިންގް އެކްސްކާޝަންތަކަށް ބޭނުންކުރަމުން އަންނަ ފަރިހި-2 ދޯނި ފަރުމަހަށް ފުރީ ހުކުރުދުވަހު ހަވީރު 4 ޖަހާ އެހާކަންހާއިރުއެވެ. އޭގައި މަހަށް ދިޔައީ މާފުށްޓަށް ނިސްބަތްވާ ތިން މީހުންނެވެ. ރޭގަނޑު 8 ޖަހާލާއިރު އެނބުރި އަންނާނެކަމަށް ބުނެ އެމީހުން މަހަށް ފުރިނަމަވެސް 8 ޖަހާ ބޮޑުވިފަހުންވެސް އެމީހުން އެނބުރި ނާންނާތީ ދޯނީގެ ވެރި ފަރާތްތަކަމަށްވާ އިބްރާހިމް ފައިސަލް ފުލުހަށާއި ކޯސްޓްގާޑަށް ރިޕޯޓްކުރި އެވެ. ފުލުހަށާއި އެމްއެންޑީއެފަށް ރިޕޯޓްކުރީ މަހަށް ދިޔަ އެއްވެސް މީހެއްގެ ފޯނަށް ގުޅޭގޮތް ނުވުމުންނެވެ.
ފުލުހުން ވަނީ ދޯންޏާއި އެ މީހުންނާ ބެހޭ އެއްވެސް މަޢުލޫމާތެއް ލިބިފައިވާނަމަ ފުލުހުންގެ އެމަރޖެންސީ ނަންބަރު 119 އަށް ނުވަތަ ކޯސްޓްގާޑަށް ގުޅައި މަޢުލޫމާތު ހިއްސާކުރުމަށް އެދިފަ އެވެ.
ސަމާލުކަމަށް: ގެއްލިގެން ހޯދަމުންދާ ދޯޏްނަކީ، ކ. މާފުށީ ޒުވާން ވިޔަފާރިވެރިޔާ އާސިމް މުހައްމަދުފުޅު (ސިމްބެ) އަތުން މަޑުއްވަރީ އިބްރާހިމް ފައިސަލް ގަނެފައިވާ ދޯންޏެކެވެ. އެހެންނަމަވެސް އަދި ރަޖިސްޓްރީ އޮތީ އިބްރާހިމްގެ ނަމަށް ބަދަލުނުކޮށެވެ. މި ހާދިސާ އާއި ގުޅިގެން ފުލުހަށާއި، އެމްއެންޑީއެފްއަށް ރިޕޯޓްކުރިއިރުވެސް އެ ވާހަކަ ފާހަގަކޮށްފައިވާނެކަމަށް އިބްރާހިމް މައުލޫމާތު ދީފައި ވެއެވެ.